រាជធានីគួឡាឡាំពួ៖ ក្រោយពេលសម្ពន្ធភាពគណបក្សប្រឆាំងរបស់លោក អាន់វ៉ា អ៊ីប្រាហ៊ីម (Anwar Ibrahim) បានឈ្នះអាសនៈច្រើនជាងគេ នៅក្នុងការបោះឆ្នោតស ហើយមិនមានសំឡេងភាគច្រើនគ្រប់គ្រាន់ តាមច្បាប់កំណត់ ចំនួន១១២អាសនៈ នៅក្នុងរដ្ឋសភា ប៉ុន្ដែចុងក្រោយ ព្រះមហាក្សត្រម៉ាឡេស៊ី បានសម្រេចព្រះទ័យតែងតាំងគាត់ ជានាយករដ្ឋមន្ដ្រីថ្មី ដឹកនាំប្រទេស៥ឆ្នាំទៅមុខទៀត។
សារព័ត៌មាន CNBC បានចេញផ្សាយ កាលពីព្រឹក ថ្ងៃព្រហស្បតិ៍ ទី២៤ ខែវិច្ឆិកា ថា នៅទីបំផុត លោក Anwar Ibrahim បានក្លាយជានាយករដ្ឋមន្ត្រីម៉ាឡេស៊ី ខណៈលោក Datuk Seri Mohamad Hasan អាចក្លាយជាឧបនាយករដ្ឋមន្ត្រី នៅក្នុងរដ្ឋាភិបាលចម្រុះ ក្រោយពេលចូលគាល់ព្រះមហាក្សត្រ ហើយពិភាក្សាគ្នា អំពីការបង្កើតរដ្ឋាភិបាល កាលពីថ្ងៃពុធ ហើយព្រះបរមរាជវាំង បានប្រកាសពីករតែងតាំងប្រមុខរដ្ឋាភិបាលថ្មីនេះ។
នៅក្នុងការបោះឆ្នោតសកល កាលពីសប្ដាហ៍មុន សម្ពន្ធភាពគណបក្សប្រឆាំង Pakatan Harapan (PH) ដឹកនាំដោយលោក អាន់វ៉ា អ៊ីប្រាហ៊ីម (Anwar Ibrahim) ទទួលបានឈ្នះអាសនៈ ចំនួន៨០ ប៉ុន្ដែគណបក្សនេះ នៅខ្វះចំនួន៣០អាសនៈ នៅក្នុងសំឡេងភាគច្រើន ចាំបាច់ត្រូវមានចំនួន១១២អាសនៈ នៅក្នុងរដ្ឋសភា។ ដោយឡែក គណបក្ស Perikatan Nasional (PN) ក្រោមការដឹកនាំរបស់លោក មូហ៍យីដឌីន យ៉ាសស៊ីន (Muhyiddin Yassin) អតីតនាយករដ្ឋមន្ដ្រីម៉ាឡេស៊ី ទទួលបានអាសនៈចំនួន៧៣។
មេដឹកនាំគណបក្សទាំង២នេះ រួមទាំង លោក Anwar និង លោក Muhyiddin កំពុងតែព្យាយាមស្វះស្វែងរកសំឡេងភាគច្រើន នៅក្នុងរដ្ឋសភា សម្រាប់ការបង្កើតរដ្ឋាភិបាលថ្មី ទើបព្រះមហាក្សត្រម៉ាឡេស៊ី ស៊ូលតង់ អាប់ឌូលឡាហ៍ ស៊ូលតង់ អាហ៍ម៉ាដ សាហ៍ (Sultan Abdullah Sultan Ahmad Shah) សព្វព្រះទ័យកោះហៅមេដឹកនាំទាំង២នេះ មកប្រជុំពិភាក្សាគ្នា ដើម្បីបង្ហាញផ្លូវដល់ការបង្កើតរដ្ឋាភិបាល។
ព្រះមហាក្សត្រម៉ាឡេស៊ី បានមានព្រះរាជបន្ទូល ទៅកាន់ក្រុមអ្នកសារព័ត៌មាន កាលពីថ្ងៃអង្គារ នៅខាងក្រៅវិមានរដ្ឋាភិបាល ថា «ព្រះអង្គនឹងសម្រេចព្រះទ័យ នៅក្នុងពេលដ៏ឆាប់ៗនេះ។ ជាមួយគ្នានេះ ទ្រង់ក៏ស្នើសុំដល់ប្រជាជាតិម៉ាឡេស៊ី ទាំងអស់ ត្រូវតែទទួលយកនូវការសម្រេចព្រះទ័យណាមួយ ជុំវិញការបង្កើតរដ្ឋាភិបាលថ្មី»។
ព្រះមហាក្សត្រម៉ាឡេស៊ី បានសម្រេចព្រះទ័យបែបនេះ ក្រោយពេលទ្រង់បានកោះប្រជុំក្រុមប្រឹក្សាពិសេសមួយ ដើម្បីទទួលយកការយល់ឃើញ អំពីព្រះចៅស៊ូលតង់ដទៃទៀត ជុំវិញបញ្ហាបង្កើតរដ្ឋាភិបាលថ្មី។ ព្រះអង្គទ្រង់ មានព្រះទ័យជឿជាក់ ថា លោក អាន់វ៉ា និង ក្រុមគណបក្សចម្រុះប៉ាកាតាន់ ហារ៉ាប៉ាន់ (Pakatan Harapan ឬ PH) របស់គាត់ មានសំឡេងគាំទ្រគ្រប់គ្រាន់ នៅក្នុងរដ្ឋសភា សម្រាប់ឈានដល់ការបង្កើតរដ្ឋាភិបាល ដឹកនាំប្រទេសម៉ាឡេស៊ី នៅក្នុងរយៈពេល៥ឆ្នាំទៅខាងមុខ។
លោក អាន់វ៉ា អ៊ីប្រាហ៊ីម មានវ័យ៧៥ឆ្នាំ នឹងត្រូវស្បថចូលកាន់តំណែង ជានាយករដ្ឋមន្ត្រីទី១០ នៃសហព័ន្ធន៍ម៉ាឡេស៊ី នៅក្នុងព្រះបរមរាជវាំង អ៊ីស្តាណា ណេហ្ការ៉ា (Istana Negara) នាវេលាម៉ោង៥ល្ងាច ថ្ងៃព្រហស្បតិ៍ (វេលានៅក្នុងរាជធានីគូឡាឡាំពួ) ៕