រដ្ឋធានីកៀវ៖ ស្របពេលកងទ័ពការពារទឹកដីរបស់អ៊ុយក្រែន កំពុងតែវាយប្រយុទ្ធគ្នាយ៉ាងសាហាវ ប្រឆាំងនឹងកម្លាំងទាហានរុស្ស៊ី ដើម្បីរំដោះទឹកដី ចេញពីការគ្រប់គ្រងរបស់ក្រុងមូស្គូនោះ ឥឡូវនេះ ក៏មានសេចក្ដីរាយការណ៍ដ៏គួរឲ្យភ្ញាក់ផ្អើលមួយ គឺរដ្ឋាភិបាលក្រុងកៀវ បានជម្លៀសទាហានរងរបួសរបស់ខ្លួន តាមយន្ដហោះគ្មានមនុស្សបើក ឬ ដ្រូន ចេញពីសមរភូមិប្រយុទ្ធ។
សារព័ត៌មាន Insider បានចេញផ្សាយ នៅថ្ងៃអង្គារ ទី៨ ខែសីហា ថា បើតាមសារព័ត៌មាន The Economist បានរាយការណ៍ ថា អ៊ុយក្រែន កំពុងតែប្រើប្រាស់យន្ដហោះគ្មានមនុស្សបើក ឬ ដ្រូនដឹកជញ្ជូន បញ្ជូនកងទ័ពរងរបួស ចេញពីសមរភូមិ។ ដ្រូនទាំងនោះ អាចផ្ទុកទម្ងន់ រហូតដល់ប្រហែលជាង១៨០គីឡូក្រាម ហើយវាអាចហោះហើរ នៅក្នុងចម្ងាយផ្លូវ ប្រហែល ជាង៦៩គីឡម៉ែត្រ។
ពាណិជ្ជកម្ម
សារព័ត៌មាន The Economist បានរាយការណ៍បន្ដ ថា រដ្ឋាភិបាលក្រុងកៀវ បានជម្លៀសកងទ័ពការពារទឹកដីរបស់អ៊ុយក្រែន ដែលរងរបួស នៅក្នុងប្រយុទ្ធគ្នា ជាមួយនឹងកម្លាំងទាហានរុស្ស៊ី តាមដ្រូន។ សកម្មភាពបែបនេះ គឺជាអ្វីដែលបានកើតឡើងជាលើកដំបូង នៅលើសមរភូមិ នៃប្រទេសអឺរ៉ុបខាងកើតមួយនេះ។
បច្ចុប្បន្ន អ៊ុយក្រែន កំពុងតែដាក់ពង្រាយយន្តហោះគ្មានមនុស្សបើក ឬ ដ្រូនធំៗ អាចផ្ទុកទម្ងន់ រហូតដល់ជាង១៨០គីឡូក្រាម ហើយវាអាចហោះហោះ នៅក្នុងចម្ងាយ ប្រហែលជាង៦៩គីឡូម៉ែត្រ។ ប៉ុន្ដែគេមិនដឹងច្បាស់ ថាតើអ៊ុយក្រែន បានប្រើប្រាស់យន្តហោះដ្រូនប្រភេទនេះចំនួនប៉ុន្មានដងរួចមកហើយ សម្រាប់ការដឹកជញ្ជូនទាហានរងរបួស។ រីឯតួលេខជនរងគ្រោះ កំពុងតែកើនឡើងជាលំដាប់ នៅក្នុងអំឡុងពេលកើតមានជម្លោះ រវាងប្រទេសទាំង២នេះ។
ទីភ្នាក់ងារសារព័ត៌មាន Reuters បានរាយការណ៍ ថា បើតាមឯកសាររបស់ទីភ្នាក់ងារស៊ើបការណ៍សម្ងាត់ នៃក្រសួងការពារជាតិសហរដ្ឋអាមេរិក បានប៉ាន់ប្រមាណ កាលពីខែមេសា ថា អ៊ុយក្រែន មានកងទ័ពរងរបួស រហូតដល់ ១១៣ ៥០០នាក់ ខណៈរុស្ស៊ី មានទាហានរងរបួស ចំនួន ១៨០ ០០០នាក់ គិតចាប់តាំងពីក្រុងមូស្គូ បានបើកការឈ្លានពានទ្រង់ទ្រាយធំ កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។
បើទោះជាយ៉ាងណាក៏ដោយ សេចក្ដីរាយការណ៍ទាំងនេះ នៅមិនទាន់មានតួលេខផ្ទៀងផ្ទាត់ថា មានទាហានអ៊ុយក្រែន ឬរុស្សី ប៉ុន្មាននាក់បានរងរបួស ឬ ស្លាប់ នៅក្នុងការប្រយុទ្ធគ្នានោះដែរ ព្រោះប្រទេសទាំងពីរ មិនបានផ្តល់តួលេខលម្អិត អំពីកងទ័ពរបស់ពួកគេនោះឡើយ។
អ៊ុយក្រែន បានព្យាបាលកងទ័ពរបស់ខ្លួន រងរបួស ជាមួយនឹងក្រុមគ្រូពេទ្យនៅជួរមុខ នាភាគខាងលិចរបស់ប្រទេសអ៊ុយក្រែន ដែលនៅឆ្ងាយពីសមរភូមិ ហើយទាហានខ្លះទៀត ត្រូវដឹកតាមរថភ្លើង បញ្ជូនទៅព្យាបាល នៅតាមបណ្តាប្រទេសផ្សេងៗទៀត នៅតំបន់អឺរ៉ុប។
ជាមួយគ្នានេះដែរ ទីភ្នាក់ងារស៊ើបការណ៍សម្ងាត់របស់ចក្រភពអង់គ្លេស បានបញ្ជាក់ នៅក្នុងខែកក្កដា ថា ទាហានរុស្ស៊ី រងគ្រោះថ្នាក់ អាចស្លាប់កើនឡើង ដល់៥០ភាគរយ ដោយសារតែការផ្គត់ផ្គង់ផ្នែកវេជ្ជសាស្ដ្រមិនបានល្អ។ ស្របគ្នានេះដែរ ទាហានរុស្ស៊ី ដែលត្រូវបានចាប់ខ្លួន ក៏បានរៀបរាប់ អំពីការទុកចោលទាហានរងរបួស រហូតដល់ស្លាប់ផងដែរ។
សេចក្ដីរាយការណ៍នោះ បានកត់សម្គាល់ឃើញ ថា ការប្រើប្រាស់យន្តហោះគ្មានមនុស្សបើក ឬ ដ្រូនរបស់អ៊ុយក្រែន សម្រាប់ដឹកជញ្ជូនកងទ័ពរងរបួស ក្លាយជាឧទាហរណ៍មួយ អំពីរបៀបដែលអ៊ុយក្រែន កំពុងតែបង្រៀនមេរៀន អំពីការប្រើប្រាស់បច្ចេកវិទ្យាថ្មីៗ តាមរបៀបថ្មី អាចផ្តល់ផលប្រយោជន៍ ដល់កងទ័ព សម្រាប់ប្រទេសដទៃទៀត។ បន្ថែមពីលើនេះ អ៊ុយក្រែន ក៏អាចកែច្នៃបង្កើតអាវុធរបស់ខ្លួន សម្រាប់ប្រយុទ្ធប្រឆាំងនឹងទាហានរុស្ស៊ី ហើយសង្គ្រាមនេះ ក៏កំពុងតែប្រើប្រាស់នូវការសាកល្បងអាវុធទំនើបៗមួយចំនួន ជាទ្រង់ទ្រាយធំលើកដំបូង ផងដែរ។
រដ្ឋមន្ត្រីការពារជាតិអ៊ុយក្រែន និង ក្រុមអ្នកជំនាញខាងឧស្សាហកម្ម បានប្រាប់ដល់កាសែត Financial Times កាលពីខែមុន ថា ពួកគេកំពុងតែទទួលបានការយល់ដឹងដ៏មានតម្លៃ សម្រាប់ប្រទេសណាតូ តាមរយៈការប្រើប្រាស់អាវុធទំនើបៗមួយចំនួន នៅលើសមរភូមិ។
The Economist បានរាយការណ៍ថា សហរដ្ឋអាមេរិក ក៏បានផ្តល់ជំនួយ ជួយអ៊ុយក្រែន បង្កើតការចុះឈ្មោះអ្នករបួស ដែលជាមូលដ្ឋានទិន្នន័យ អំពីរបៀបដែលទាហានត្រូវបានរងរបួស ការព្យាបាល និង ជោគវាសនារបស់ពួកគេ ហើយនឹងក្លាយជាព័ត៌មានដ៏មានប្រយោជន៍ សម្រាប់អ៊ុយក្រែន សម្ពន្ធមិត្ត និង ផ្ដល់ឱសថយ៉ាងទូលំទូលាយ ដោយមានបញ្ហាមួយចំនួន ស្រដៀងគ្នានឹងធ្លាប់បានធ្វើ នៅក្នុងប្រទេសអាហ្វហ្គានីស្ថាន និង អ៊ីរ៉ាក់ រួចមកហើយដែរ៕
