រដ្ឋធានីសេអ៊ូល៖ ក្រោយពេលរដ្ឋាភិបាលក្រុងសេអ៊ូល កំពុងតែពិចារណាពីការដាក់ទណ្ឌកម្មជាឯកតោភាគី ប្រឆាំងនឹងក្រុងព្យុងយ៉ាង មិនបានប៉ុន្មានថ្ងៃផង ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) កាលពីព្រឹក ថ្ងៃព្រហស្បតិ៍ បានគំរាមកំហែង និង ប្រមាថយ៉ាងធ្ងន់ធ្ងរ ប្រឆាំងនឹងកូរ៉េខាងត្បូង ដោយការប្រៀបប្រដូចប្រធានាធិបតីកូរ៉េខាងត្បូង និង រដ្ឋាភិបាលរបស់គាត់ ជាឆ្កែព្រៃ។
សារព័ត៌មានរបស់ឥណ្ឌា Hindustan Times បានចេញផ្សាយ កាលពីព្រឹក ថ្ងៃព្រហស្បតិ៍ ទី២៤ ខែវិច្ឆិកា ថា ការធ្វើអត្ថាធិប្បាយ ប្រកបដោយសម្ដីគំរោះគំរើយរបស់លោកស្រី គីម យ៉ូជុង (Kim Yo Jong) ប្អូនស្រីបង្កើតរបស់មេដឹកនាំកូរ៉េខាងជើង បានកើតឡើង ត្រឹមតែរយៈពេល២ថ្ងៃ ក្រោយក្រសួងការបរទេសកូរ៉េខាងត្បូង បានអះអាង ថា រដ្ឋាភិបាលក្រុងសេអ៊ូល កំពុងតែពិនិត្យមើល អំពីលទ្ធភាព នៃការដាក់ទណ្ឌកម្ម ជាឯកតោភាគីបន្ថែមទៀត ប្រឆាំងនឹងក្រុងព្យុងយ៉ាង ដើម្បីរារាំងដល់ការបាញ់សាកល្បងមីស៊ីលរបស់ប្រទេសឯកោមួយនេះ។
ក្រសួងការបរទេសកូរ៉េខាងត្បូង បានបញ្ជាក់ ថា ការពិចារណា លើការដាក់ទណ្ឌកម្ម និង ការគាបសង្កត់ ទៅលើការវាយប្រហារតាមអ៊ីនធើរណេតរបស់កូរ៉េខាងជើង ដែលជាប្រភពថវិកាដ៏សំខាន់ថ្មីមួយ សម្រាប់កម្មវិធីអាវុធរបស់ក្រុងព្យុងយ៉ាង ក៏ដូចជា ការបង្កហេតុ ដោយការបាញ់សាកល្បងនុយក្លេអ៊ែរ កាលពីពេលថ្មីៗនេះ…ជាដើម។
លោកស្រី គីម យ៉ូជុង (Kim Yo Jong) បានបញ្ជាក់ នៅក្នុងសេចក្ដីថ្លែងការណ៍មួយ ហើយត្រូវបានយកទៅផ្សព្វផ្សាយ ដោយបណ្ដាញផ្សព្វផ្សាយរបស់រដ្ឋ កូរ៉េខាងជើង ថា «ខ្ញុំឆ្ងល់ ថាតើអ្វីទៅជាការដាក់ទណ្ឌកម្ម ដែលក្រុមកូរ៉េខាងត្បូង ធ្វើឡើង ហើយវាមិនខុសអ្វីពីឆ្កែព្រៃ កំពុងតែស៊ីសាច់ជាប់ឆ្អឹង ដែលផ្តល់ឲ្យដោយសហរដ្ឋអាមេរិក នោះឡើយ»។
ស្ដ្រីដ៏មានអំណាចនៅកូរ៉េខាងជើង រូបនេះ បានសង្កត់ធ្ងន់ ថា «យើងសូមព្រមានដល់មនុស្សល្ងង់ ម្តងទៀត ថា ការដាក់ទណ្ឌកម្ម និង សម្ពាធដ៏អស់សង្ឃឹមរបស់សហរដ្ឋអាមេរិក និង ឧបាយកលរបស់កូរ៉េខាងត្បូង ប្រឆាំងនឹងកូរ៉េខាងជើង នឹងបន្ថែមថាមពលដល់អរិភាព និង កំហឹងទៅវិញទេ»៕