រដ្ឋធានីតេអ៊ីរ៉ង់៖ កីឡាករបាល់ទាត់ជម្រើសជាតិអ៊ីរ៉ង់ម្នាក់ មានដើមកំណើតឃើដ បានបង្ហាពីការគាំទ្ររបស់ខ្លួន ដល់បាតុកម្មតវ៉ាយ៉ាងកក្រើកប្រទេស ចាប់តាំងពីខែកញ្ញារហូតមក បានធ្វើឲ្យអាជ្ញាធរក្រុងតេអ៊ីរ៉ង់ ខឹងសម្បា រហូតឈានដល់ការដាក់ នៅក្នុងពន្ធនាគារ។
ទីភ្នាក់ងារសារព័ត៌មាន AFP បានចេញផ្សាយ កាលពីថ្ងៃសុក្រ ទី២៥ ខែវិច្ឆិកា ថា អតីតកីឡាករបាល់ទាត់ ឈ្មោះ វ៉ូរីយ៉ា ហ្កាហ្វូរី (Voria Ghafouri) ធ្លាប់លេងឲ្យក្រុមជម្រើសជាតិអ៊ីរ៉ង់ ចំនួន ២៨លើក រហូតដល់ឆ្នាំ២០១៩ ក៏ត្រូវបានចាប់ខ្លួន ក្រោយការបញ្ចប់ការហ្វឹកហាត់ នៅក្នុងក្លឹបបាល់ទាត់មួយ។ កីឡាកររូបនេះ បានរងការចោទប្រកាន់ ពីការឃោសនាព័ត៌មាន ប្រឆាំងនឹង សាធារណរដ្ឋអ៊ិស្លាមអ៊ីរ៉ង់ ប៉ុន្ដែរដ្ឋាភិបាល មិនបានបង្ហាញព័ត៌មានលម្អិតនោះឡើយ។
រហូតមកដល់ពេលនេះ អ៊ីរ៉ង់ កំពុងស្ថិតក្នុងភាពចលាចលផ្ទៃក្នុង ដោយសារការផ្ទុះបាតុកម្មវ៉ាពាសពេញប្រទេស ចាប់តាំងពីខែកញ្ញា រហូតមក ក្រោយពេលប៉ូលិសសីលធម៌របស់ប្រទេសមួយនេះ ចាប់ខ្លួនស្ដ្រីវ័យក្មេងម្នាក់ ឈ្មោះ ម៉ាហាសា អាមីនី (Mahsa Amini) អាយុ២២ យកទៅឃុំឃាំង ហើយស្លាប់នៅក្នុងគុក ក្រោយការចាប់ខ្លួន មិនបានប៉ុន្មានថ្ងៃផង។ ប៉ូលិសសីលធម៌របស់អ៊ីរ៉ង់ បានចាប់ខ្លួននាង Mahsa Amini មានដើមកំណើតជាជនជាតិឃើដ ដោយសារតែការស្លៀកសម្លៀកបំពាក់មិនសមរម្យ តាមការកំណត់សម្រាប់ស្ត្រីអ៊ីរ៉ង់៕