រដ្ឋធានីកៀវ៖ ក្រោយពេលរំដោះបានតំបន់ទីក្រុងខឺរសុនរួចមក កងទ័ពការពារទឹកដីរបស់អ៊ុយក្រែន កំពុងតែរៀចំគម្រោង វាយរំដោះតំបន់ (Kherson ឈ្មោះខេត្ត និង ទីក្រុង) នេះទាំងមូល រហូតធ្វើឲ្យទាហានរុស្ស៊ី ព្រួយបារម្ភ បង្កើនខ្សែការពារ និង ប្រកាសអាសន្ន។
ទីភ្នាក់ងារសារព័ត៌មាន AP បានចេញផ្សាយ កាលពីថ្ងៃព្រហស្បតិ៍ ទី២៤ ខែវិច្ឆិកា ថា ក្រុមទាហានលបបាញ់របស់អ៊ុយក្រែន បានកែសម្រួលវិសាលភាពរបស់គាត់ ហើយបានបាញ់កាំភ្លើង Caliber-50 ទៅកាន់ទាហានរុស្ស៊ី ឆ្លងទន្លេឌីនីប្រូ។ នៅមុននេះ កងទ័ពការពារទឹកដីអ៊ុយក្រែន បានប្រើប្រាស់យន្តហោះគ្មានមនុស្សបើក ឬ ដ្រូន ដើម្បីស្វែងរកទាហានរុស្ស៊ី។
ក្រោយការដកទ័ពចេញពីទីក្រុង Kherson នាភាគខាងត្បូង ប្រទេសអ៊ុយក្រែន អស់រយៈពេលពីរសប្តាហ៍កន្លងមកនេះ កម្លាំងទាហានរុស្ស៊ី នៅតែបន្ដបាញ់ផ្លោង ដាក់ទីក្រុងនោះដដែ។ ចំណែកអ៊ុយក្រែន ក៏បានវាយបក តបតទៅលើទាហានរុស្ស៊ី ដោយប្រើប្រាស់អាវុធធុនធ្ងន់ បាញ់ពីចម្ងាយ។
លោកឧត្ដមសេនីយ៍ វ៉ាឌីម ស្គីប៊ីតស្គី (Vadym Skibitskyi) អនុប្រធានស៊ើបការណ៍សម្ងាត់យោធាអ៊ុយក្រែន បានប្រាប់ដល់សារព័ត៌មាន Kyiv Post ថា កងទ័ពរុស្ស៊ី ប្រហែល ៣០ ០០០នាក់ ដែលបានដកចេញ ពីច្រាំងខាងលិច ទន្លេឌីនីប្រូ (Dnieper) កាលពីដើមខែនេះ កំពុងតែបង្កើនកម្លាំង នៅក្នុងតំបន់ហ្សាប៉ូរីហ្សា (Zaporizhia) និង តំបន់ខឺរសុន (Kherson) នៅក្នុងសង្គ្រាម រយៈពេលសសប្តាហ៍ទី៣៩កន្លងមកនេះ។
លោកឧត្ដមសេនីយ៍ បានបញ្ជាក់ ថា «កម្លាំងទាហានរុស្ស៊ី កំពុងតែរង់ចាំការវាយលុករបស់យើង ហើយវាជាមូលហេតុ ធ្វើឲ្យពួកគេ បង្កើតខ្សែការពារ នៅក្នុងខឺរសុន។ តំបន់នេះ មានព្រំដែនរដ្ឋបាលជាប់ជាមួយនឹងឧបទ្វីបគ្រីមៀ (Crimea) ដែលរុស្ស៊ី បានរឹបអូសយក កាលពីអំឡុងឆ្នាំ២០១៤។
អ៊ុយក្រែន បានអះអាង ថា «ឥឡូវ កម្លាំងទាហានរុស្ស៊ី កំពុងតែការពារគោលដៅ នៅតំបន់ហ្សាប៉ូរីហ្សា។ រីឯទីក្រុងគ្រីវយី រីហ៍ (Kryvyi Rih) និង ខឺរសុន (Kherson) ក៏សត្រូវកំពុងតែបង្កើនប្រព័ន្ធការពារ និង បង្កើនការដឹកជញ្ជូន។ ប៉ុន្តែ រុស្ស៊ី នៅតែមិនបញ្ឈប់ការបាញ់កាំភ្លើងធំ ដាក់មកលើទីតាំងរបស់កងទ័ពយើង នៅច្រាំងខាងស្តាំ ទន្លេឌីនីប្រូនោះដែរ»។
រហូតមកដល់ពេលនេះ ទាហានរុស្ស៊ី បាន និង កំពុងតែផ្តល់អាទិភាពដល់ការកាន់កាប់តំបន់លូហានស្ក៍ (Luhansk) និងដូណែត (Donetsk) នៅភាគខាងកើត ប្រទេសអ៊ុយក្រែន។ ពួកគេ បានប្រើប្រាស់កាំភ្លើងធំ បាញ់ផ្លោងយ៉ាងខ្លាំង ស្រោចមកលើកងទ័ពការពារទឹកដីរបស់អ៊ុយក្រែន នៅក្នុងតំបន់នោះ អស់រយៈពេញមួយសប្តាហ៍កន្លងមកហើយ។
ថ្វីបើប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានកេណ្ឌទ័ព រហូតដល់ ៣០០ ០០០នាក់ កាលពីខែកញ្ញា និង តុលា យ៉ាងណាក្ដី ប៉ុន្ដែក្រុងមូស្គូ នៅតែមិនមានកម្លាំងគ្រប់គ្រាន និង គ្រឿងសឹក សម្រាប់ការគ្រប់គ្រងតំបន់ទាំងនោះឲ្យបានរឹងមាំនៅឡើយ៕
