រដ្ឋធានីវ៉ាស៊ីនតោន៖ អាកាសយានិកម្នាក់ បានបើកយន្ដហោះធុនតូច បុកបង្គោលភ្លើងកៀប ជាប់នៅលើអាកាសមានរយៈពេលជាច្រើនម៉ោង ទម្រាំក្រុមសង្គ្រោះជួយអន្ដរាគមន៍ យកចេញបាន ហើយមនុស្សប្រហែលជាង១សែននាក់ អត់មានអគ្គិសនីប្រើប្រាស់ កាលពីរាត្រី ថ្ងៃអាទិត្យ ស្ថិតក្នុងរដ្ឋម៉ារីឡែនដ៍ (Maryland) ដែលមានចម្ងាយត្រឹមតែ ប្រហែល៤៨គីឡូម៉ែត្រ ពីរដ្ឋធានីវ៉ាស៊ីនតោន សហរដ្ឋអាមេរិក។
សារព័ត៌មាន Richmond Times បានចេញផ្សាយ កាលពីព្រឹក ថ្ងៃចន្ទ ទី២៨ ខែវិច្ឆិកា ថា មនុស្ស ចំនួន២នាក់ ត្រូវបានសង្គ្រោះ ពីយន្តហោះខ្នាតតូចមួយគ្រឿង កាលពីវេលារំលងអធ្រាត្រ ឈានចូល ថ្ងៃចន្ទ ស្ថិតក្នុងរដ្ឋ Maryland ក្រោយពេលយន្ដហោះរបស់ពួកគេ បានបុកបង្គោលបណ្តាញអគ្គិសនី ជាប់នៅលើអាកាស មានកម្ពស់ ប្រហែល៣០ម៉ែត្រ អស់រយៈពេលជាច្រើនម៉ោង។
លោក ស្កុត ហ្គោលស្ដេន (Scott Goldstein) ប្រធានផ្នែកពន្លត់អគ្គិភ័យតំបន់ម៉ុងហ្គោមឺរី (Montgomery ) រដ្ឋម៉ារីឡែនដ៍ (Maryland) បានបញ្ជាក់ ថា យន្ដហោះខ្នាតតូចនោះ ត្រូវបានយកចេញ ពីបង្គោលភ្លើងអគ្គិសនី នៅវេលាម៉ោង១២ និង ១៦នាទីរំលងអធ្រាត្រ ឈានចូលថ្ងៃចន្ទ។ ចំណែកមនុស្ស២នាក់ នៅក្នុងយន្ដហោះនោះ បានរួចផុតពីគ្រោះថ្នាក់ ដល់អាយុជីវិត។ ប៉ុន្ដែនៅក្នុងហេតុការណ៍នោះ បានបង្កឱ្យប្រជាជន ១២០ ០០០នាក់ គ្មានអគ្គិសនីប្រើប្រាស់ ខណៈភ្លើងបំភ្លឺផ្លូវ និង ភ្លើងសញ្ញាចរាចរណ៍ ក៏បានកាត់ផ្ដាច់មួយរយៈពេលផងដែរ។
បើតាមសេចក្ដីរាយការណ៍ បានឲ្យដឹង ថា យន្ដហោះខ្នាតតូច ដែលបានជួបនឹងគ្រោះថ្នាក់នោះ ជាប្រភេទ Mooney M20J បានហោះចេញពីតំបន់វ៉េសឆេសស្ទ័រ (Westchester) រដ្ឋ New York ឆ្ពោះទៅចុះចត នៅក្នុងអាកាសយានដ្ឋាន តំបន់ Montgomery។ ប៉ុន្ដែយន្ដហោះទៅមិនទាន់ដល់គោលដៅផង ក៏បានជួបនឹងហេតុការណ៍បែបនេះតែម្ដង ហើយក៏សំណាងល្អ ដោយអ្នកនៅក្នុងយន្ដហោះ មិនជួបនឹងគ្រោះថ្នាក់៕
