រដ្ឋធានីកៀវ៖ សង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅក្នុងមានសេចក្ដីរាយការណ៍ អំពីហិង្សាផ្លូវភេទ រាប់រយករណី ហើយលោកស្រីទី១អ៊ុយក្រែន បានចោទប្រកាន់ទៅលើទាហានរបស់ក្រុងមូស្គូ ពីការប្រើប្រាស់សកម្មភាពដូចសត្វធាតុបែបនេះ ជាអាវុធ សម្រាប់ការធ្វើសង្គ្រាម ប្រឆាំងនឹងជនស៊ីវិល។
សារព័ត៌មានរបស់ឥណ្ឌា Republic World បានចេញផ្សាយ កាលពីព្រឹក ថ្ងៃអង្គារ ទី២៩ ខែវិច្ឆិកា ថា លោកស្រី អូឡែណា ហ្សេឡែនស្កា (Olena Zelenska) ភរិយារបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) កាលពីថ្ងៃចន្ទ បានជំរុញឲ្យមានការរួបរួមគ្នាជាសកលឆ្លើយតប ចំពោះការប្រើប្រាស់អំពើហិង្សាផ្លូវ ជាអាវុធ នៅក្នុងសង្គ្រាម ប្រឆាំងនឹងអ៊ុយក្រែន។
ថ្លែងនៅក្នុងសន្និសីទ«ស្ដីការទប់ស្កាត់អំពើហិង្សាផ្លូវភេទ នៅក្នុងគំនិតផ្តួចផ្តើមលើជម្លោះ» នៅទីក្រុងឡុងដ៍ លោកស្រី Zelenska បានបញ្ជាក់ ថា ការស៊ើបអង្កេត គ្រាន់តែជាផ្នែកតូចមួយ នៃចំនួនឧក្រិដ្ឋកម្មពិតប្រាកដ ត្រូវបានប្រព្រឹត្តឡើង នៅក្នុងជម្លោះ នៅអ៊ុយក្រែន។ ឥឡូវ ក្រុមរដ្ឋអាជ្ញាក្រុងកៀវ កំពុងតែស៊ើបអង្កេត ទៅលើបទឧក្រិដ្ឋជាង១០០ករណី បង្កឡើង ដោយទាហានរុស្ស៊ី។
លោកស្រី បានសង្កត់ធ្ងន់ ថា «មានឱកាសជាច្រើន សម្រាប់អ្នកឈ្លានពាន បានពង្រីកការបន្ទាបបន្ធោក ដល់ជនជាតិអ៊ុយក្រែន ដោយការប្រើប្រាស អំពើហិង្សាផ្លូវភេទ និង ឧក្រិដ្ឋកម្មផ្លូវភេទ ដែលជាអាវុធរបស់ពួកគេ។ អ្នកគ្រប់គ្នា ដឹងរួចមកហើយ អំពីចំនួន នៃករណីចាប់រំលោភដ៏ច្រើននេះ ព្រោះទាហានរុស្ស៊ី បានធ្វើឡើងជាចំហ ជុំវិញបញ្ហាអសីលធម៌នេះ។ ប៉ុន្ដែជនរងគ្រោះទាំងអស់ មិនហ៊ាននិយាយ អំពីសកម្មភាពរបស់ទាហានរុស្ស៊ី ដោយសារភ័យខ្លាចពួកគេវិលត្រឡប់ មកធ្វើរឿងបែបនេះបន្ដទៀត»។
លោកស្រីទី១ នៃប្រទេសអ៊ុយក្រែន បានបន្ថែម ថា «នោះជាអ្វីដែលមានសារសំខាន់បំផុត សម្រាប់ការទទួលស្គាល់បញ្ហាទាំងនេះ ជាឧក្រិដ្ឋកម្មសង្គ្រាម ហើយត្រូវតែនាំជនល្មើស យកមកផ្ដន្ទាទោស។ ដូច្នេះពិភពលោក ត្រូវតែមានការឆ្លើយតប ចំពោះបញ្ហានេះ។ ប៉ុន្ដែជាអកុសល ឧក្រិដ្ឋកម្មសង្គ្រាមបែបនេះ នឹងបន្តកើតមាន នៅក្នុងពិភពលោក ខណៈទាហានគិតថា ពួកគេអាចប្រព្រឹត្តទៅបាន ដោយមិនមានការដាក់ទោសទណ្ឌណាមួយ»។
លោកស្រី Zelenska បានបន្ដ ថា រដ្ឋាភិបាលអ៊ុយក្រែន បានបង្កើតកម្មវិធីទ្រទ្រង់ ដើម្បីជួយដល់ជនរងគ្រោះ ពីសង្គ្រាមនេះ។ លោកស្រី សង្ឃឹម ថា អាចនឹងជាជំហានទី១ ឆ្ពោះទៅដល់ការស៊ើបអង្កេត និង កាត់ទោសដល់ជនល្មើស។
លោក ជេមស៍ ក្លេវ័រលី (James Cleverly) រដ្ឋមន្ដ្រីក្រសួងការបរទេសចក្រភពអង់គ្លេស កាលពីសប្ដាហ៍មុន បានប្រកាសផ្ដល់ជំនួយថ្មី ដល់ប្រទេសអ៊ុយក្រែន នៅក្នុងដំណើរទស្សនកិច្ច នៅរដ្ឋធានីកៀវ ដោយរួមបញ្ចូលទាំង កិច្ចគាំពារដល់ជនរងគ្រោះ ពីអំពើហិង្សាផ្លូវភេទ បង្កឡើងដោយទាហានរុស្ស៊ី ផងដែរ៕
