រដ្ឋធានីកៀវ៖ ក្រោយការបំផ្លិចបំផ្លាញ នៅក្នុងសង្គ្រាមរបស់មេដឹកនាំវិមានក្រឹមឡាំង លោក វ្ល៉ាឌីមៀ ពូទីន អស់រយៈពេលជិត២៨០ថ្ងៃកន្លងមកនេះ អ៊ុយក្រែន បានត្រៀមខ្លួនរួចជាស្រេច សម្រាប់ទប់ទល់នឹងការវាយប្រហារជាថ្មី ពីកម្លាំងទាហានរុស្ស៊ី ប្រឆាំងនឹងហេដ្ឋារចនាសម្ព័ន្ធសំខាន់ៗ ខណៈក្រុមបុគ្គលិក កំពុងតែប្រឹងប្រែងស្ដារបណ្ដាញថាមពល ទឹក និង កម្ដៅឡើងវិញ នៅក្នុងរដ្ឋធានីកៀវ ។
សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី២៨ ខែវិច្ឆិកា ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានព្រមាន ថា រុស្ស៊ី នឹងវាយប្រហារដោយមីស៊ីលជាថ្មី មកលើប្រទេសរបស់គាត់។ ជាមួយគ្នានេះ លោកប្រធានាធិបតី កំពុងតែជំរុញឲ្យកម្លាំងការពារទឹកដី និង ប្រជាជនអ៊ុយក្រែន ត្រូវតែត្រៀមខ្លួន ទប់ទល់ដល់ការដាច់ចរន្ដអគ្គិសនី នៅក្នុងសប្ដាហ៍ថ្មីនេះ។
ការព្រមានរបស់មេដឹកនាំអ៊ុយក្រែន កាលពីថ្ងៃអាទិត្យ បានកើតឡើង ខណៈព្រិលទឹកកក កំតែធ្លាក់ខ្លាំង នៅក្នុងរដ្ឋធានីកៀវ ហើយសីតុណ្ហភាព បានចុះត្រជាក់ខ្លាំង ជាមួយនឹងការព្យាករណ៍ អំពីការធ្លាក់អ័ព្ទពេញមួយយប់។
អាជ្ញាធរក្រុង បានបញ្ជាក់ ថា ក្រុមបុគ្គលិក នឹងជិតបញ្ចប់ការស្តារឡើងវិញនូវថាមពល ទឹក និង កម្ដៅ។ ប៉ុន្តែកម្រិតប្រើប្រាស់នៅតែខ្ពស់ ហើយនេះមានន័យថា នឹងអាចដាច់ចរន្តអគ្គិសនី នៅតាមតំបន់មួយចំនួន។ រីឯមនុស្ស រាប់លាននាក់ រស់នៅក្នុង និង ជុំវិញទីក្រុងកៀវ កំពុងតែប្រឈមមុខនឹងការរំខាន ដោយសាររលក នៃការវាយឆ្មក់តាមអាកាស ពីទាហានរុស្ស៊ី។
លោក ហ្សេឡែនស្គី បានបញ្ជាក់ នៅក្នុងសុន្ទរកថាប្រចាំរាត្រីរបស់គាត់ ថា «ខ្ញុំយល់ថា ក្រុមភេរវករ កំពុងតែរៀបចំគម្រោង វាយប្រហារជាថ្មី។ យើងដឹងបញ្ហានេះ ជារឿងពិត។ ដរាបណា កម្លាំងទាហានរុស្ស៊ី មានមីស៊ីល នៅក្នុងដៃ ពួកគេពិតជានៅមិនសុខនោះឡើយ»។
លោកប្រធានាធិបតី បានបន្ថែម ថា នៅក្នុងរយៈពេលប៉ុន្មានសប្តាហ៍ខាងមុខនេះ អាចនឹងមានការពិបាក ដូចសប្តាហ៍មុន ខណៈមានការវាយប្រហារ មកលើហេដ្ឋារចនាសម្ព័ន្ធអគ្គិសនី ធ្វើឱ្យប្រជាជនអ៊ុយក្រែន អត់មានអគ្គិសនីប្រើប្រាស់យ៉ាងធ្ងន់ធ្ងរបំផុត ចាប់តាំងពីកម្លាំងទាហានរុស្ស៊ី បានចូលឈ្លានពាន កាលពីថ្ងៃទី២៤ ខែកុម្ភៈ រហូតមក។
មេដឹកនាំអ៊ុយក្រែន រូបនេះ បានសង្កត់ធ្ងន់ ថា «កម្លាំងការពារទឹកដីរបស់យើង បានត្រៀមខ្លួនរួចរាល់អស់ហើយ។ ប្រទេសទាំងមូល ក៏បានត្រៀមខ្លួនរួចរាល់ហើយដែរ។ យើងនឹងធ្វើការតាមសេណារីយ៉ូទាំងអស់ ដោយរួមជាមួយនឹងដៃគូនានារបស់យើង»៕
