រដ្ឋធានីកៀវ៖ ដោយសារតែទាហានរុស្ស៊ី បានបង្កើនការវាយប្រហារ មិនរើសគោលដៅ បំផ្លិចបំផ្លាញហេដ្ឋារចនាសម្ព័ន្ធស៊ីវិលសំខាន់ៗពាសពេញប្រទេស ទើបអាល្លឺម៉ង់ បានសម្រេចចិត្តបញ្ជូនប្រព័ន្ធការពារដែនអាកាសរបស់ខ្លួន ជាលើកដំបូង ទៅដល់ប្រទេសអ៊ុយក្រែន ប៉ុន្ដែឥឡូវនេះ កងទ័ពក្រុងកៀវ បានត្អូញត្អែរ ពីការខ្វះខាតមីស៊ីល សម្រាប់ប្រព័ន្ធការពារដែនអាកាសប្រភេទនេះ ដើម្បីទប់ទល់ការវាយប្រហាររបស់ក្រុងមូស្គូ។
សារព័ត៌មាន The Eurasian Times បានចេញផ្សាយ កាលពីថ្ងៃទី២៩ ខែវិច្ឆិកា ថា ប្រព័ន្ធការពារដែនអាកាសលើកទី១ នៅក្នុងចំណោមប្រព័ន្ធការពារដែនអាកាសចំនួន៤របស់អាល្លឺម៉ង់ ប្រភេទ IRIS-T ត្រូវបញ្ជូនដល់ប្រទេសអ៊ុយក្រែន កាលពីក្នុងអំឡុងខែតុលា ក្រោយពេលទាហានរុស្ស៊ី បានទម្លាក់គ្រាប់បែក ពីលើអាកាសយ៉ាងខ្លាំង មិនធ្លាប់មានពីមុនមក។ ប៉ុន្ដែទោះជាយ៉ាងណាក៏ដោយ បញ្ហានៅត្រង់ថា អ៊ុយក្រែន នៅតែមិនទាន់ទទួលបានការផ្គត់ផ្គង់មីស៊ីលគ្រប់គ្រាន់ សម្រាប់ប្រតិបត្តិការ លើប្រព័ន្ធការពារ IRIS-T នេះនៅឡើយ។
ក្រុមមន្ដ្រីអាល្លឺម៉ង់ កាលពីខែតុលា បានប្រកាស ថា ក្រុងប៊ែរឡាំង បានបញ្ជូនប្រព័ន្ធប្រតិបត្ដិការការពារដែនអាកាស IRIS-T SLM និង គ្រាប់មីស៊ីលមួយចំនួន សម្រាប់ប្រព័ន្ធការពារដែនអាកាសប្រភេទនេះ ហើយនឹងមានគម្រោងបញ្ជូនបន្ថែម ចំនួន៣គ្រឿងបន្ដទៀត ដើម្បីជួយដល់ប្រទេសអ៊ុយក្រែន។
ទោះជាយ៉ាងណា រហូតមកដល់ពេលនេះ កងទ័ពអាកាសរបស់អ៊ុយក្រែន បានស្នើសុំដល់ក្រុងប៊ែរឡាំង ជួយបង្កើនប្រព័ន្ធការពារដែនអាកាសរបស់ខ្លួន ជាមួយនឹងការផ្គត់ផ្គង់មីស៊ីល IRIS-T បន្ថែមទៀត ខណៈក្រុងមូស្គូ កំពុងតែបន្ដបាញ់មីស៊ីល ស្រោចដូចគ្រាប់ភ្លៀង។
បណ្ដាញផ្សាយ «សំឡេងថ្មីរបស់អ៊ុយក្រែន» បានរាយការណ៍ ថា លោក យូរីយ អ៊ីណាត (Yuriy Ihnat) អ្នកនាំពាក្យ បញ្ជាការដ្ឋានកងទ័ពអាកាសអ៊ុយក្រែន បានថ្លែង នៅតាមកញ្ចក់ទូរទស្សន៍ជាតិ ថា អ៊ុយក្រែន ត្រូវការចាំបាច់បំផុតនូវមីស៊ីល សម្រាប់ប្រព័ន្ធការពារដែនអាកាសរបស់អាល្លឺម៉ង់ ប្រភេទ IRIS-T ។ បើទោះជាយ៉ាងនេះក្តី អ្នកនាំពាក្យ រូបនេះ មិនបានបញ្ជាក់លម្អិត ថាតើកងទ័ពអ៊ុយក្រែន បច្ចុប្បន្ន កំពុងតែប្រឈមមុខនឹងការខ្វះខាតមីស៊ីល សម្រាប់ប្រព័ន្ធការពារ IRIS-T ដែរឬយ៉ាងណានោះទេ។
អ្នកនាំពាក្យ កងទ័ពអាកាសអ៊ុយក្រែន រូបនេះ បានបញ្ជាក់ ថា «តម្រូវការចាំបាច់បំផុត នាពេលនេះ ខ្ញុំចង់ឲ្យមានគ្រាប់មីស៊ីលគ្រប់គ្រាន់ សម្រាប់ប្រព័ន្ធការពារដែនអាកាស IRIS-T ។ បញ្ហានេះ ពិតជាស្មុគស្មាញខ្លាំងណាស់ ព្រោះប្រព័ន្ធការពារដែនអាកាសជំនាន់ថ្មី… យើងត្រូវការអាវុធបែបនេះបន្ថែមទៀត។ គ្រឿងយុទ្ធោបករណ៍ប្រភេទនេះ ត្រូវបានរចនាឡើង សម្រាប់ជំនួសប្រព័ន្ធការពារចាស់ៗរបស់យើង»។
កម្លាំងទាហានរុស្ស៊ី បានកំណត់គោលដៅយ៉ាងសំខាន់ វាយប្រហារទៅលើបណ្តាញអគ្គិសនីរបស់អ៊ុយក្រែន ហើយបានរុញច្រានប្រទេសនេះ ឲ្យស្ថិតក្នុងភាពងងឹតសូន្យសុង ចំពេលរដូវរងាខ្លាំងចូលមកដល់។ បច្ចុប្បន្ននេះ កងទ័ពការពារទឹកដីអាវុធអ៊ុយក្រែន កំពុងតែប្រតិបត្តិការយ៉ាងទូលំទូលាយ ជាមួយនឹងប្រព័ន្ធការពារដែនអាកាស IRIS-T ផ្គត់ផ្គង់ដោយអាល្លឺម៉ង់ និង ប្រព័ន្ធការពាដែនអាកាស NASAMS ផ្គត់ផ្គង់ដោយសហរដ្ឋអាមេរិក សម្រាប់ទប់ទល់ ប្រឆាំងនឹងមីស៊ីលរបស់រុស្ស៊ី៕