រាជធានីបាងកក៖ សមាជិកសភាថៃ មកពីបណ្ដាគណបក្សយោធានិយម បានខ្ទាស់ជើងដល់សម្ពន្ធភាពចម្រុះចំនួន៨គណបក្ស រារាំងដល់មេដឹកនាំគណបក្សប្រឆាំងឈ្នះឆ្នោត មិនឲ្យឈរឈ្មោះជាថ្មី សម្រាប់ការកាន់កាប់តំណែងនាយករដ្ឋមន្ដ្រីទី៣០ ស្របគ្នានឹងតុលាការធម្មនុញ្ញ បានសម្រេចព្យួរសមាជិកសភារបស់លោក ភីថា។
សារព័ត៌មានរបស់ថៃ Bangkok Post បានចេញផ្សាយ កាលពីល្ងាច ថ្ងៃពុធ ទី១៩ ខែកក្កដា ឆ្នាំ២០២៣ ថា សម្ពន្ធភាពចម្រុះ ចំនួន៨គណបក្ស ដឹកនាំ ដោយគណបក្សឆ្ពោះទៅមុខ (Move Forward Party) ហៅកាត់ MFP កំពុងតែស្វះស្វែង បង្កើតរដ្ឋាភិបាលថ្មីរបស់ប្រទេសថៃ។ គណបក្សទាំងនេះ បានសម្រេចតែងតាំងជាថ្មី សម្រាប់បេក្ខភាពនាយករដ្ឋមន្ដ្រី ជូនទៅលោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ ខណៈសភាទាំង២ របស់ប្រទេសថៃ បានបើកប្រជុំរួម នៅថ្ងៃពុធ សម្រាប់ជ្រើសរើសតំណែងកំពូល ដឹកនាំប្រទេស។ នេះជាការប៉ុនប៉ងលើកទី២របស់លោក ភីថា ដើម្បីស្នើសុំការយល់ព្រម ពីសមាជិករដ្ឋសភា និង ព្រឹទ្ធសភា ក្រោយពេលគាត់មិនបានទទួលសំឡេងគាំទ្រភាគច្រើន តាមច្បាប់កំណត់ យ៉ាងតិច ចំនួន៣៧៥សំឡេង មកពីក្នុងចំណោមសមាជិកសភាទាំង២។
គណបក្សភឿថៃ បានតែងតាំងជាថ្មីដល់លោក ភីថា ទៅកាន់សភា សម្រាប់តំណែងនាយករដ្ឋមន្ដ្រី កាលពីវេលាម៉ោង៩ និង ៣៨នាទី ថ្ងៃពុធ ទី១៩ ខែកក្កដា។ ជាការប្រឆាំងតបតនោះ គណបក្សរួបរួមជាតិថៃ (United Thai Nation ហៅកាត់ UTN ) របស់លោក ប្រាយុទ្ធ ចាន់អូចា (Prayut Chan-o-cha) ភ្លាមៗនោះ បានជំទាស់ទៅនឹងការតែងតាំងបេក្ខភាពនាយករដ្ឋមន្ដ្រីរបស់លោក ភីថា។ គណបក្សយោធានិយមមួយនេះ បានលើកឡើង អំពីបទប្បញ្ញត្តិរបស់សភា ដោយហាមដល់អ្នកបានទទួលបរាជ័យ ហើយត្រូវតែងតាំងជាថ្មី នៅក្នុងសម័យប្រជុំសភា សម្រាប់ការប៉ុនប៉ងកាន់កាប់តំណែងកំពូលនេះ។ នៅក្នុងការការពារតបតវិញនោះ សមាជិកសភាសំខាន់ៗរបស់គណបក្ស MFP បានលើកឡើង អំពីភាពស្របច្បាប់ សម្រាប់រតែងតាំងជាថ្មីរបស់លោក ភីថា ។
គណបក្សឆ្ពោះទៅមុខ (MFP) បានឈ្នះនៅក្នុងការបោះឆ្នោតសកលរបស់ថៃ កាលពីថ្ងៃទី១៤ ខែកក្កដា ដោយទទួលបានចំនួន១៥១អាសនៈ នៅក្នុងរដ្ឋសភា ខណៈគណបក្សភឿថៃ (Pheu Thai Party) របស់កូនស្រីពៅរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ដ្រីថៃ ជាអ្នកឈ្នះលំដាប់លេខ២ ជាមួយនឹងចំនួន១៤១អាសនៈ។ ប៉ុន្ដែបន្ទាប់ក្រោយមក គណបក្សឆ្ពោះទៅមុខ បានចងសម្ពន្ធភាព ជាមួយនឹងគណបក្សប្រឆាំងចំនួន៧ផ្សេងទៀត ដោយមានសមាជិកសភាសរុប ៣១២នាក់។ សម្ពន្ធភាពទាំង៨គណបក្សនេះ មានគោលបំណងដ៏សំខាន់ នៅក្នុងការបង្កើតរដ្ឋាភិបាលថ្មី បន្ដដឹកនាំប្រទេសថៃ ធ្វើដំណើរឆ្ពោះទៅមុខ។
ស្របគ្នានេះ ឥស្សជនសំខាន់ៗរបស់គណបក្សភឿថៃ (Pheu Thai) បានផ្ដល់អនុសាសន៍ ថា ការតែងតាំងលោក ភីថា មិនអាចបន្តជារៀងរហូតបាននោះឡើយ ព្រោះថា ប្រជាជនថៃ កំពុងតែមានការព្រួយបារម្ភយ៉ាងខ្លាំង ចំពោះការបង្កើតរដ្ឋាភិបាលថ្មី និង ការដោះស្រាយបញ្ហាជាអាយុជីវិតរបស់ជាតិ។ គណបក្សភឿថៃ ក៏បានប្រកាសផងដែរ អំពីការតែងតាំងលោក ស្រេថា ថាវីស៊ីន (Srettha Thavisin) ជាបេក្ខភាពនាយករដ្ឋមន្ត្រីមួយរូបរបស់គណបក្សភឿថៃ ប្រសិនបើករណីរបស់លោក ភីតា ត្រូវសភាច្រានចោល។
លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ កាលពីប៉ុន្មានថ្ងៃមុននេះ បានបញ្ជាក់ អំពីគោលជំហររបស់គាត់ ថា គាត់នឹងបើកផ្លូវឱ្យគណបក្សភឿថៃ ជាដៃគូ ធ្វើដំណើរទៅកាន់កាប់តំណែងនាយករដ្ឋមន្ដ្រី និង បង្កើតរដ្ឋាភិបាល ប្រសិនបើគាត់ទទួលបានសំឡេងគាំទ្រតិចជាង១០ភាគរយ នៃការដែលគាត់បានទទួល នៅក្នុងការបោះឆ្នោតជុំទី១ សម្រាប់តំណែងនាយករដ្ឋមន្ត្រី កាលពីថ្ងៃទី ១៣ ខែកក្កដា ឆ្នាំ២០២៣។
តុលាការធម្មនុញ្ញ បានសម្រេចចិត្ត លើកយកសំណុំរឿងភាគហ៊ុនរបស់លោក ភីថា នៅក្នុងក្រុមហ៊ុនប្រព័ន្ធផ្សព្វផ្សាយ iTV ដែលលែងដំណើរ ជាយូរមកហើយ មកពិនិត្យ ក្រោយពេលគណៈកម្មការរៀបចំការបោះឆ្នោតរបស់ប្រទេសថៃ បានប្ដឹងទៅកាន់ស្ថាប័នមួយនេះ ដើម្បីសម្រេច អំពីសិទ្ធិជាសមាជិកសភារបស់គាត់ ពាក់ព័ន្ធនឹងចោទប្រកាន់ អំពីការរំលោភបំពានមកលើច្បាប់បោះឆ្នោត។ នៅទីបំផុត តុលាការធម្មនុញ្ញថៃ កាលពីថ្ងៃពុធ ក៏បានសម្រេចព្យួរជាបណ្ដោះអាសន្ន សម្រាប់សមាជិកសភារបស់លោក ភីថា។ សកម្មភាពបែបនេះ បានធ្វើឡើង នៅថ្ងៃតែមួយ ខណៈសភាបានបដិសេធនូវការតែងតាំងបេក្ខភាពនាយករដ្ឋមន្ដ្រីជាថ្មីរបស់លោក ភីថា ៕
