រដ្ឋធានីកៀវ៖ នៅក្នុងសង្គ្រាមឈ្លានពានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) អស់រយៈពេលជាង៩ខែកន្លងមកនេះ បានបំផ្លិចបំផ្លាញពាសពេញប្រទេសអ៊ុយក្រែន ហើយឥឡូវនេះ អនុប្រធានធនាគារពិភពលោក (World Bank) បានប៉ាន់ប្រមាណ ថា អ៊ុយក្រែន ត្រូវការលុយ រាប់ពាន់លានដុល្លារសហរដ្ឋអាមេរិក សម្រាប់ការស្ថាបនាប្រទេសឡើងវិញ ក្រោយការបញ្ចប់សង្គ្រាម។
សារព័ត៌មាន GAMINGDEPUTY បានចេញផ្សាយ កាលពីថ្ងៃចន្ទ ទី៥ ខែធ្នូ ថា លោកស្រី អានណា ប៊ីជឺរដេ (Anna Bjerde) អនុប្រធាន ធនាគារពិភពលោក បានផ្ដល់បទសម្ភាសន៍ដល់សារព័ត៌មានអូទ្រីស Die Presse ផ្សាយជាភាសាអាល្លឺម៉ង់ ថា «កាលពីមុន យើងបានចេញផ្សាយតួលេខមួយ ត្រូវបានគណនារួមគ្នាជាមួយគណៈកម្មការអឺរ៉ុប និង រដ្ឋាភិបាលអ៊ុយក្រែន។ តើត្រូវការប្រាក់ប៉ុន្មាន សម្រាប់ការកសាងប្រទេសអ៊ុយក្រែន ឡើងវិញ ហើយវាត្រូវធ្វើឡើងតាមមាត្រដ្ឋាន ឬ ស្ដង់ដាររបស់អឺរ៉ុប ជា…ឧទាហរណ៍ទាក់ទងនឹងប្រសិទ្ធភាពថាមពល…? បើតាមការគិត ត្រឹមដើមខែមិថុនា អ៊ុយក្រែន នឹងត្រូវការថវិកា រហូតដល់៣៥០ពាន់លានអឺរ៉ូ (លុយសហភាពអឺរ៉ុប) ឬស្មើនឹងប្រហែលជាង៣៦៨ពាន់លានដុល្លារសហរដ្ឋអាមេរិក»។
លោកស្រី អនុប្រធាន ធនាគារពិភពលោក បានបន្ថែម ថា ដោយសារសង្គ្រាម នៅក្នុងប្រទេសអ៊ុយក្រែន កំពុងតែបន្ដ ឥឡូវ តួលេខនេះ បានកើនឡើងគួរឱ្យកត់សម្គាល់ ហើយវាពិតជាមានការកើនឡើង រហូតដល់ ចន្លោះពី៥០០ទៅ៦០០ពាន់លានអឺរ៉ូ ឬស្មើនឹងប្រហែលជាង ៥២៦ពាន់លាន ទៅជាង៦៣២ពាន់លានដុល្លារសហរដ្ឋអាមេរិក។ នៅចុងឆ្នាំ២០២២នេះ ចំនួនប្រជាជន នៅក្នុងប្រទេសអ៊ុយក្រែន រហូតដល់៨លាននាក់ នឹងរស់នៅក្នុងភាពក្រីក្រ។
បើតាមលោកស្រី Anna Bjerde អនុប្រធានធនាគារពិភពលោក បានឲ្យដឹង ថា ផលវិបាក នៃវិបត្ដិមនុស្សធម៌ នៅអ៊ុយក្រែន ក្លាយជាមហន្តរាយដ៏ធ្ងន់បំផុត ដោយសារតែមនុស្ស ជិត១០លាននាក់ នឹងរស់នៅក្នុងភាពក្រីក្រ។ ការស្ដារប្រទេសឡើងវិញ នឹងត្រូវចំណាយប្រាក់ យ៉ាងហោចណាស់ ក៏៥០០ពាន់លានអឺរ៉ូ ហើយអត្រាភាពក្រីក្រ នៅក្នុងអ៊ុយក្រែន នឹងកើនឡើង រហូតដល់២៥ភាគរយ។ ជាមួយគ្នានេះ ធនគារពិភពលោក បានព្យាករ ថា ផលិតផលក្នុងស្រុកសរុប (GDP) នៅក្នុងប្រទេសអ៊ុយក្រែន បានធ្លាក់ចុះ ដល់៣៥ភាគរយ នៅក្នុងឆ្នាំ២០២២។
អង្គការសហប្រជាជាតិ បានអះអាង កាលពីខែសីហា កន្លងទៅ ថា មនុស្ស រហូតដល់ប្រហែល២០លាននាក់ អាចនឹងត្រូវរុញច្រាន ចូលទៅក្នុងភាពក្រីក្រខ្លាំងបំផុត ដោយសារជម្លោះ រវាងក្រុងមូស្គូ និង ក្រុងកៀវ កំពុងតែបន្ដវាយប្រយុទ្ធគ្នា នៅក្នុងប្រទេសអ៊ុយក្រែន។
លោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់ បានបញ្ជាក់ ថា ការស្ថាបនាប្រទេសអ៊ុយក្រែន ឡើងវិញ នឹងក្លាយទៅជាគម្រោងជំនួយបរទេស មានប្រាក់រាប់រយពាន់លាន នៅក្នុងសតវត្សទី២១នេះ ហើយវាជាឱកាស កសាងប្រទេសឲ្យមានស្ថិរភាព និង រឹងមាំជាងពេលមុន៕