រដ្ឋធានីប៊ែរឡាំង៖ អាល្លឺម៉ង់ ជាប្រទេសមានតម្រូវការថាមពលច្រើនជាងគេបំផុតមួយ នៅតំបន់អឺរ៉ុប ប៉ុន្ដែដោយសារការហ៊ុមព័ទ្ធទណ្ឌកម្មរបស់លោកសេរី ប្រឆាំងនឹងសង្គ្រាមរបស់រុស្ស៊ី ធ្វើឲ្យប្រទេសមហាសេដ្ឋកិច្ចលំដាប់លេខ៤ នៅលើពិភពលោកមួយនេះ ប្រឈមមុខនឹងកង្វះខាតឧស្ម័ន ទើបមានគម្រោង ងាកទៅពឹងផ្អែក លើប្រទេសអ៊ីរ៉ង់។
សារព័ត៌មាន IFP បានចេញផ្សាយ កាលពីព្រឹក ថ្ងៃអង្គារ ទី៦ ខែធ្នូ ថា បើតាមេដឹកនាំគណបក្សស្ដាំនិយមរបស់អាល្លឺម៉ង់ (AfD) លោក ទីណូ គ្រូប៉ាលឡា (Tino Chrupalla) បានឲ្យដឹង ថា ដើម្បីបំពេញតាមតម្រូវការថាមពល នៅក្នុងប្រទេសមហាសេដ្ឋកិច្ចកំពូល នៅតំបន់អឺរ៉ុបមួយនេះ អាល្លឺម៉ង់ នឹងចរចាជាមួយនឹងប្រទេសអ៊ីរ៉ង់ ស្ដីពីការផ្គត់ផ្គង់ថាមពល។
លោក Tino Chrupalla បានប្រាប់ដល់កាសែត Die Welt កាលពីថ្ងៃអាទិត្យ កន្លងទៅនេះ ថា «ក្នុងនាមជា AfD យើងតំណាងឱ្យគោលនយោបាយការបរទេស នឹងជំរុញឲ្យមានការចាប់អារម្មណ៍ សម្រាប់ផលប្រយោជន៍របស់ប្រទេសយើង។ ប៉ុន្ដែប្រសិនបើយើង ចង់ទូទាត់ សម្រាប់ការខ្វះចន្លោះលើឧស្ម័រុស្ស៊ី យើងចាំបាច់ត្រូវការអ្នកផ្គត់ផ្គង់ទាំងអស់។ មួយវិញទៀត ដើម្បីធ្វើម្ចាស់ការតាមអ្វីដែលអាចធ្វើទៅបាន យើងក៏នឹងត្រូវការទិញឧស្ម័ន មកពីប្រទេសអ៊ីរ៉ង់ ផងដែរ»។
បើបូករួមជាមួយនឹងរុស្ស៊ី ផង អ៊ីរ៉ង់ មានប្រភពឧស្ម័នច្រើនជាងគេបំផុត នៅលើពិភពលោក។ ប៉ុន្ដែបើតាមសភាឧស្សាហកម្ម និង ពាណិជ្ជកម្មអាល្លឺម៉ង់-អ៊ីរ៉ង់ បានឲ្យដឹង ថា នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ការនាំចេញឧស្ម័ន ចេញពីអ៊ីរ៉ង់ ទៅកាន់ប្រទេសអាល្លឺម៉ង់ មានតិចតួចណាស់។
ជាមួយគ្នានេះដែរ ប្រទេសមហាយក្ស២ នៅតំបន់អាស៊ី រួមមាន ចិន និង ឥណ្ឌា នៅតែបន្ដនាំចូលថាមពល ពីប្រទេសរុស្ស៊ី ដដែល បើទោះជារងសម្ពាធ ពីបស្ចិមលោក និង សម្ពន្ធមិត្តយ៉ាងណាក៏ដោយ៕
