រដ្ឋធានីកៀវ៖ ដោយសារតែការត្អូញត្អែររបស់ថៅកែក្រុមហ៊ុនទាហានស៊ីឈ្នួលវ៉ាគណឺរ (Wagner) អស់រយៈពេលជាច្រើនខែកន្លងមក នៅតែមិនសូវអើពើ ជាមួយនឹងសំណើរបស់គាត់ អំពីការផ្គត់ផ្គង់គ្រឿងសព្វាវុធ និង សម្ភារយោធា ក៏ដូចជា ការស្លាប់ទាហានរបស់ខ្លួនរាប់ម៉ឺននាក់ នៅលើសមរភូមិ ទើបជំរុញឲ្យគាត់ ឈានដល់ការបញ្ជាកងកម្លាំងប្រដាប់អាវុធរបស់ខ្លួន សម្រុកចូលទៅក្នុងប្រទេសរុស្ស៊ី វិញ ប៉ុន្ដែឥឡូវនេះ ក៏មានសេចក្ដីរាយការណ៍ អំពីការចុះទៅសួរសុខទុក្ខដល់កងទ័ព ពីប្រមុខការពារជាតិរបស់ក្រុងមូស្គូ។
សារព័ត៌មាន Al Jazeera បានចេញផ្សាយ កាលពីរសៀល ថ្ងៃចន្ទ ទី២៦ ខែមិថុនា ឆ្នាំ២០២៣ ថា លោក ស៊ើរហ្គេ សយហ្គូ (Sergei Shoigu) រដ្ឋមន្ដ្រីក្រសួងការពារជាតិរុស្ស៊ី បានចុះទៅសួរសុខទុក្ខដល់កម្លាំងទាហានរបស់ខ្លួន កំពុងតែធ្វើសង្គ្រាម នៅក្នុងប្រទេសអ៊ុយក្រែន។ នេះជាការបង្ហាញមុខ ជាសាធារណៈលើកដំបូងរបស់ប្រមុខការពារជាតិរុស្ស៊ី ចាប់តាំងពីការបះបោររបស់កម្លាំងទាហានស៊ីឈ្នួលវ៉ាគណឺរ បានផ្ទុះឡើង កាលពីចុងសប្ដាហ៍កន្លងទៅថ្មីៗនេះ។
ដោយឡែក លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានបញ្ជាក់ ថា គាត់បានពិភាក្សាគ្នាតាមទូរស័ព្ទ ជាមួយនឹងសមភាគីសហរដ្ឋអាមេរិក លោក ចូ បៃដិន (Joe Biden) អំពីព្រឹតិ្ដការណ៍វិវឌ្ឍចុងក្រោយ នៅក្នុងប្រទេសរុស្ស៊ី។ ការបះបោរបស់កម្លាំងទាហានស៊ីឈ្នួល Wagner កំពុងតែបង្ហាញ អំពីភាពទន់ខ្សោយ នៃរបបគ្រប់គ្រងរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន។
លោក យ៉ែវហ្គេនី ព្រីហ្គោហ្ស៊ីន ស្ថាបនិកទាហានស៊ីឈ្នួលរបស់រុស្ស៊ី Wagner បានកើតមានជម្លោះ ជាមួយនឹងក្រសួងការពារជាតិរុស្ស៊ី អស់រយៈពេលជាច្រើនខែកន្លងមកហើយ ជុំវិញបរាជ័យ នៅក្នុងសង្គ្រាម នៅអ៊ុយក្រែន។ ប៉ុន្ដែជម្លោះនេះ កាន់តែទុំជោរទៅ រហូតឈានដល់ការបះបោរឡើង កាលពីថ្ងៃសុក្រ ទី២៣ ខែមិថុនា ឆ្នាំ២០២៣។
សារព័ត៌មាន គ្រប់គ្រងដោយរដ្ឋរុស្ស៊ី RIA បានរាយការណ៍ ថា ក្រសួងការពារជាតិរុស្ស៊ី បានប្រកាសយ៉ាងច្បាស់ ថា លោក សយហ្គូ នៅតែជារដ្ឋមន្ដ្រីដដែល។ ប៉ុន្ដែសេចក្ដីរាយការណ៍នោះ មិនបានបញ្ជាក់ អំពីពេលវេលា និង ទីកន្លែង ដែលលោករដ្ឋមន្ដ្រី បានធ្វើដំណើរទៅជួបជាមួយនឹងមេបញ្ជាការ នៅតំបន់ប្រតិបត្ដិការខាងលិចនោះឡើយ៕
