រដ្ឋធានីញូវដេលី៖ នារីវ័យក្មេង ជនជាតិឥណ្ឌា រស់នៅរដ្ឋអាសសាម (Assam) នាភាគខាងកើត ត្រូវបានឪពុកម្ដាយ ឬ អាណាព្យាបាល ចាប់ឲ្យរៀបការ ទាំងនៅជាអនីតិជន ហើយឥឡូវនេះ អាជ្ញាធរ នៅក្នុងរដ្ឋនោះ បានចាប់ផ្ដើម បង្ក្រាបទ្រង់ទ្រាយធំ ដោយបានចាប់ឃាត់ខ្លួនប្ដីរបស់ពួកនាង នាំទៅឃុំឃាំង ក្រោយការចោទប្រកាន់ ពីការរៀបការ នៅក្នុងវ័យមិនទាន់គ្រប់អាយុ។
សារព័ត៌មាន BBC បានចេញផ្សាយ កាលពីថ្ងៃអាទិត្យ ទី១២ ខែកុម្ភៈ ថា នាង ម៉ូមីណា ខាទុន (Momina Khatun) ជានារីវ័យក្មេងមួយរូប នៅក្នុងចំណោមស្ដ្រីឥណ្ឌា រស់នៅរដ្ឋអាសសាម នាភាគខាងកើត ប្រទេសឥណ្ឌា។ នាងបានរៀបការ នៅក្នុងអាយុក្រោម១៨ឆ្នាំ ហើយឥឡូវនេះ នាងកំពុងតែប្រឈមមុខនឹងបញ្ហាផ្លូវចិត្តយ៉ាងខ្លាំង ក្រោយពេលប្ដីរបស់នាង ក៏ដូចជា ប្ដីរបស់ស្ដ្រីវ័យក្មេង ជនជាតិឥណ្ឌាផ្សេងទៀត ត្រូវបានអាជ្ញាធរ ចាប់ខ្លួន ជុំវិញការៀបការទាំងនៅជាកុមារ។
អាជ្ញាធររដ្ឋអាសសាម បានអះអាង ថា អាជ្ញាធរកំពុងតែលុបបំបាត់នូវការរៀបការតាមប្រពៃណី ដោយខុសច្បាប់។ ប៉ុន្ដែនាង Khatun និង ស្ដ្រីឥណ្ឌាផ្សេងទៀត ដែលមានប្ដីរបស់ពួកនាង កំពុងតែជាប់ឃុំឃាំង បានអះអាង ថា អាជ្ញាធរបានធ្វើឲ្យពួកនា រស់នៅទាំងក្ដីអស់សង្ឃឹម។ នាង Khatun ដែលរំពឹង ថា នឹងមានទារកហើយនោះ នឹងមិនមានការចាប់ផ្ដើមជីវិត ប្រកបដោយសុខស្រួលនោះឡើយ៕