រដ្ឋធានីវ៉ាស៊ីនតោន៖ ក្រោយពេលកងទ័ពរបស់សហរដ្ឋអាមេរិក បានប្រើប្រាស់យន្ដហោះចម្បាំងបំបាំងកាយដ៏ទំនើបរបស់ខ្លួន ប្រភេទ F-22 បាញ់ទម្លាក់បាឡុងរបស់ចិន ដែលសង្ស័យជាយានអវកាសឈ្លបយកការណ៍នោះមក ប៉ុន្ដែឥឡូវនេះ មន្ដ្រីយោធាសហរដ្ឋអាមេរិក បានអះអាង អំពីការរកឃើញសេនស័រ (Sensor) របស់បាឡុងចិន ហើយកំពុងតែយកវាទៅពិសោធន៍ ដើម្បីស្វែងរកការពិត។
សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃអង្គារ ទី១៤ ខែកុម្ភៈ ឆ្នាំ២០២៣ ថា មន្ដ្រីយោធារបស់សហរដ្ឋអាមេរិក បានបញ្ជាក់ ថា ឧបករណ៍ចាប់សញ្ញា (ឬ sensor) ពីបាឡុងសង្ស័យជាយានចារកម្មរបស់ចិន លើកដំបូង ត្រូវបានបាញ់ទម្លាក់ នៅលើដែនទឹករបស់សហរដ្ឋអាមេរិក ត្រូវបានរកឃើញហើយ នៅក្នុងមហាសមុទ្រអាត្លង់ទិក។
ទីបញ្ជាការភូមិភាគខាងជើងរបស់កងទ័ពសហរដ្ឋអាមេរិក បានបញ្ជាក់ ថា ក្រុមអ្នកស្រាវជ្រាវបានរកឃើញកម្ទេចកម្ទីសំខាន់ៗ ពីកន្លែងបាឡុង ដែលត្រូវបានបាញ់ទម្លាក់នោះ រួមទាំងឧបករណ៍ចាប់សញ្ញាអាទិភាព (ឬ sensor) និង បំណែកអេឡិកត្រូនិកទាំងអស់ ដែលបានកំណត់អត្តសញ្ញាណ។ ឥឡូវនេះ ទីភ្នាក់ងារ FBI កំពុងតែត្រួតពិនិត្យមើលវត្ថុតាងទាំងអស់ ដែលសហរដ្ឋអាមេរិក បាននិយាយ ថា វាជាឧបករណ៍ប្រើប្រាស់ សម្រាប់ស៊ើបយកការណ៍ នៅលើទីតាំងយោធាដ៏រសើបរបស់សហរដ្ឋអាមេរិក។
កងទ័ពសហរដ្ឋអាមេរិក បានបាញ់ទម្លាក់វត្ថុហោះនៅលើអាកាស ចំនួន៣ផ្សេងទៀត ចាប់តាំងពីការបាញ់ទម្លាក់បាឡុងរបស់ចិន ជាលើកដំបូង នៅថ្ងៃទី៤ ខែកុម្ភៈ ឆ្នាំ២០២៣។
ក្រុមមន្ដ្រីយោធារបស់សហរដ្ឋអាមេរិក បានបញ្ជាក់ ថា ឧបករណ៍សំខាន់ៗ នៃបាឡុងរបស់ចិន ត្រូវបានរកឃើញ កាលពីថ្ងៃចន្ទ នៅឆ្នេរសមុទ្រ រដ្ឋសៅការ៉ូលីណា (South Carolina)។ ប៉ុន្ដែបើតាមបណ្ដាញទូរទស្សន៍ CBS បានឲ្យដឹង ថា អង់តែនរបស់បាឡុង មានប្រវែង ចន្លោះពី៩ទៅ១២ម៉ែត្រ ក៏ស្ថិតក្នុងចំណោមឧបករណ៍ ដែលបានរកឃើញនោះដែរ។
ក្រុមមន្ដ្រីសហរដ្ឋអាមេរិក បានអះអាង ថា បាឡុង ដែលហោះរយៈកម្ពស់ខ្ពស់នោះ មានប្រភពដើម នៅក្នុងប្រទេសចិន ហើយត្រូវបានប្រើប្រាស់ សម្រាប់ឈ្លបយកការណ៍។ ប៉ុន្ដែចិន បានបញ្ជាក់ ថា បាឡុងនោះ ជាយានអវកាសតាមដានអាកាសធាតុ ហើយវាបានហោះវង្វេងផ្លូវ ដោយសារតែមានខ្យល់បោកបក់ខ្លាំង។
ក្រោយពេលកើតមានឧបទ្ទវហេតុ នៃការបាញ់ទម្លាក់បាឡុងចិនជាលើកដំបូងនោះមក យន្ដហោះចម្បាំងរបស់កងទ័ពសហរដ្ឋអាមេរិក ក៏បានបាញ់វត្ថុហោះនៅក្នុងរយៈកម្ពស់ខ្ពស់ ចំនួន៣ផ្សេងទៀត ដែលហោះនៅលើរដ្ឋអាឡាស្ការបស់សហរដ្ឋអាមេរិក, នៅលើដែនដីយូគុន (Yukon) របស់កាណាដា និង នៅបឹងហ៊ូរុន (Huron) ព្រំដែន រវាងប្រទេសទាំង២នេះ។
បើតាមបណ្ដាញផ្សព្វផ្សាយ ជាច្រើន បានរាយការណ៍ ថា ការបាញ់វត្ថុហោះហើរ នៅលើបឹងហ៊ូរុននោះ គឺកងទ័ពសហរដ្ឋអាមេរិក បានប្រើប្រាស់មីស៊ីលមួយគ្រាប់ ប្រភេទ Sidewinder (សាយវិនឌ័រ) ដោយបាញ់ចេញពីយន្ដហោះចម្បាំង F-16 ។ ចំណែកមីស៊ីលប្រភេទនេះ មានតម្លៃ រហូតដល់ជាង ៤០០ ០០០ដុល្លារ នៅក្នុង១ដើម៕