ទីក្រុងតៃប៉ិ៖ ក្រោយពេលបណ្ដាញទូរទស្សន៍របស់ចក្រភពអង់គ្លេស បានរាយការណ៍ អំពីកម្មវិធីបាឡុងចារកម្មរបស់ក្រុងប៉េកាំង តម្រង់គោលដៅ ទៅលើប្រទេសជប៉ុន និង កោះតៃវ៉ាន់ នោះមក កងទ័ពរបស់រដ្ឋាភិបាលក្រុងតៃប៉ិ កំពុងតែតាមដាននូវសកម្មភាពណាមួយរបស់បាឡុងហោះ នៅក្នុងរយៈកម្ពស់ខ្ពស់ ហោះចេញពីចិនដីគោក ដោយគំរាមបាញ់កម្ទេចោល។
សារព័ត៌មាន Channel News Asia បានផ្សាយ នៅថ្ងៃពុធ ទី២៨ ខែមិថុនា ថា មន្ដ្រីចារកម្មមួយរូបរបស់ក្រសួងការពារជាតិតៃវ៉ាន់ បានអះអាង ថា កងទ័ពតៃវ៉ាន់ នឹងបាញ់ទម្លាក់បាឡុងទាំងឡាយណារបស់ចិនដីគោក ប្រសិនបើវាបង្ហាញនូវការគំរាមកំហែង មកលើដែនកោះរបស់ខ្លួន។
សេចក្តីថ្លែងការណ៍របស់ក្រសួងការពារជាតិតៃវ៉ាន់ កាលពីថ្ងៃអង្គារ (ទី២៧ ខែមិថុនា) បានកើតឡើង ស្របពេលមានរបាយការណ៍ជាថ្មី អំពីកម្មវិធី «បាឡុងចារកម្ម» របស់ក្រុងប៉េកាំងនៅក្នុងតំបន់ ជាមួយនឹងការរកឃើញចុងក្រោយរបស់ BBC បានបង្ហាញ ថា តៃវ៉ាន់ និង ជប៉ុនកំពុងតែក្លាយជាគោលដៅ នៅក្នុងតំបន់អាស៊ីបូព៌ា។
បណ្ដាញទូរទស្សន៍ BBC បានរាយការណ៍ ថា «រូបភាពជាច្រើន នៃបាឡុង បានឆ្លងកាត់តំបន់អាស៊ីបូព៌ា» ក្រោយពេលមានគម្រោងរួមគ្នា ជាមួយក្រុមហ៊ុនបញ្ញាសិប្បនិម្មិត Synthetaic ដែលបានវិភាគទិន្នន័យ តាមផ្កាយរណប។ របាយការណ៍នោះ បានអះអាង ថា មានភស្តុតាងអំពីបាឡុង បានហោះឆ្លងកាត់ប្រទេសជប៉ុន និង តៃវ៉ាន់ នៅក្នុងអំឡុងខែកញ្ញា ឆ្នាំ២០២១។
ប្រទេសជប៉ុន ក៏បានបញ្ជាក់ផងដែរ ថា បាឡុង បានហោះហើរពីលើដែនអាកាសរបស់ខ្លួន ហើយកងទ័ពជប៉ុន បានត្រៀមលក្ខណៈរួចរាល់ សម្រាប់ការបាញ់កម្ទេចបាឡុងទាំងអស់ នាពេលអនាគត។
ជាមួយនឹងការប្រកាស អំពីយុទ្ធសាស្ត្រស្រដៀងគ្នានេះ នៅក្នុងសន្និសីទសារព័ត៌មានមួយកាលពីថ្ងៃអង្គារ លោកឧត្តមសេនីយ៍ លីន វ៉ែន-ហ៊ួង (Lin Wen-huang) នាយផែនការប្រតិបត្តិការរួម នៃក្រសួងការពារជាតិតៃវ៉ាន់ បានបញ្ជាក់ ថា «ប្រសិនបើបាឡុងទាំងនេះ បង្កការបំភិតបំភ័យ ឬ គំរាមកំហែងដល់កោះតៃវ៉ាន់ យើងនឹងបាញ់ទម្លាក់ និង បំផ្លាញបាឡុងទាំងនោះចោល ដើម្បីថែរក្សាដល់សន្តិសុខរបស់យើង»។
លោកវរសេនីយ៍ឯក ឡូ ចេង-យូ (Lo Cheng-yu) មន្ដ្រីយោធា នៃមជ្ឈមណ្ឌលស៊ើបការណ៍សម្ងាត់របស់ក្រសួងការពារជាតិតៃវ៉ាន់ បានបញ្ជាក់ ថា កងទ័ព បានបោះមូលដ្ឋាន នៅជុំវិញច្រកសមុទ្រតៃវ៉ាន់ ក្រោមការគ្រប់គ្រងប្រកបដោយប្រសិទ្ធភាព និង កំពុងតែតាមដានរាល់សកម្មភាពរបស់បាឡុង ហោះនៅក្នុងរយៈកម្ពស់ខ្ពស់ ចេញមកពីប្រទេសចិន៕