រាជធានីបាងកក៖ ក្រោយពេលសមាជិកព្រឹទ្ធសភា ត្រូវបានលើកបន្ទុក ដោយពួកយោធា បានបង្ហាញនូវការមិនពេញចិត្ដ ចំពោះចេតនាធ្វើវិសោធនកម្មលើមាត្រា១១២ ពាក់ព័ន្ធនឹងការប្រមាថដល់ព្រះមហាក្សត្រ នោះមក ប្រធានគណបក្សឆ្ពោះទៅមុខ បានព្រមានដល់សមាជិកព្រឹទ្ធសភា កុំប្រើប្រាស់គោលបំណង នៃគណបក្សរបស់គាត់ មកធ្វើជាឧបសគ្គរារាំង ដល់ការធ្វើជានាយករដ្ឋមន្ដ្រី និង បង្កើតរដ្ឋាភិបាលថ្មីរបស់គាត់។
សារព័ត៌មានថៃ Bangkok Post បានចេញផ្សាយ នៅថ្ងៃអង្គារ ទី២៧ ខែមិថុនា ថា លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (Move Forward Party) ហៅកាត់ MFP បានព្រមានដល់សមាជិកព្រឹទ្ធសភា កុំឱ្យប្រើប្រាស់គោលបំណងរបស់គណបក្សរបស់គាត់ ជុំវិញការធ្វើវិសោធនកម្មច្បាប់ ស្តីពីការប្រមាថ មកធ្វើជាលេស រារាំងដល់ការបោះឆ្នោតរបស់គាត់ ជានាយករដ្ឋមន្ត្រី ព្រោះសកម្មភាពទាំងនេះ នឹងធ្វើឱ្យប៉ះពាល់ដល់ស្ថាប័នប្រឆាំងនឹងប្រជាជន។
លោកប្រធានគណបក្សឆ្ពោះទៅមុខ បានថ្លែង នៅថ្ងៃអង្គារ ថា ការប៉ុនប៉ងណាមួយ នៅក្នុងការប្រើប្រាស់ផែនការរបស់គណបក្ស MFP សម្រាប់ធ្វើវិសោធនកម្ម លើមាត្រា ១១២ នៃក្រមព្រហ្មទណ្ឌ សម្រាប់រារាំង ដល់រូបគាត់ ក្លាយជានាយករដ្ឋមន្ត្រី នឹងក្លាយជាបញ្ហាដ៏គួរឲ្យព្រួយបារម្ភបំផុត។
លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ បានបញ្ជាក់ ខណៈដឹកនាំសមាជិកសភាថ្មី មកពីគណបក្សរបស់គាត់ ទៅរាយការណ៍ជូនលេខាធិការដ្ឋានសភា ថា «សកម្មភាពរារាំងបែបនេះ ស្មើនឹងការអនុញ្ញាតឱ្យសំឡេងរបស់ប្រជាជន ប៉ះទង្គិចដោយផ្ទាល់ ជាមួយស្ថាប័ននោះ ហើយយវាមិនសមរម្យ និង បង្កគ្រោះថ្នាក់បំផុត»។
លោកប្រធានគណក្សឈ្នះឆ្នោត រូបនេះ បានសង្កត់ធ្ងន់ ថា «មាត្រា១១២ ការពារស្ថាប័នព្រះមហាក្សត្រ កុំឲ្យមានការប្រមាថ ប៉ុន្ដែត្រូវបានគេយកមកប្រើប្រាស់ ជាឧបករណ៍នយោបាយ ប្រឆាំងនឹងអ្នកមានទស្សនៈផ្សេងគ្នា ហើយវាក្លាយជារឿងមិនល្អសោះ សម្រាប់ស្ថាប័នជាច្រើន។ គាត់នឹងត្រូវតែថែរក្សាប្រព័ន្ធរាជាធិបតេយ្យអាស្រ័យរដ្ឋធម្មនុញ្ញ នៅក្នុងប្រទេសថៃ»។
លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ បានបន្ថែម ថា «គណបក្សជាច្រើននៅតែយល់ខុសគ្នា។ ការធ្វើវិសោធនកម្មនេះ មិនមែនជាការដកហូតចេញនោះទេ ព្រោះយើងត្រូវតែពិភាក្សាគ្នា ជាមួយនឹងសមាជិកព្រឹទ្ធសភា។ ពួកគេកំពុងតែចាប់ផ្តើមយល់ ថា ដើម្បីថែរក្សារបបរាជានិយមអាស្រ័យរដ្ឋធម្មនុញ្ញ ត្រូវតែមានការផ្លាស់ប្តូរសមស្រប ខណៈប្រទេសថៃកំពុងតែស្ថិតក្នុងដំណាក់កាលអន្តរកាល»។
ជាមួយនឹងសំណួរស្នើសុំការធ្វើអត្ថាធិប្បាយ ជុំវិញបញ្ហាសមាជិកព្រឹទ្ធសភា បានប្រកាសមិនបោះឆ្នោតដល់គាត់ ធ្វើជានាយករដ្ឋមន្ត្រី នោះ លោក ភីថា បានអះអាង ថា គាត់សង្ឃឹម ថា ពួកគេនឹងប្រកាន់ខ្ជាប់នូវគោលការណ៍ មិនប្រឆាំងនឹងសំឡេងរបស់ប្រជាជន។ គណបក្សរបស់គាត់ បានទទួលអាសនៈសភា ចំនួន១៥១ នៅក្នុងការបោះឆ្នោត កាលពីថ្ងៃទី១៤ ខែឧសភា ហើយវាជាសំឡេងច្រើនជាងគណបក្សផ្សេងៗទៀត។
រដ្ឋធម្មនុញ្ញថៃ អនុញ្ញាតឱ្យសមាជិកព្រឹទ្ធសភា ចូលរួមជាមួយសមាជិកសភា នៅក្នុងការបោះឆ្នោតជ្រើសរើសនាយករដ្ឋមន្ត្រី ដោយក្នុងនោះមានសមាជិកសភា ជាប់ឆ្នោតចំនួន ៥០០នាក់ និង សមាជិកព្រឹទ្ធសភា ចំនួន២៥០នាក់ ត្រូវបានតែងតាំង ដោយពួកយោធា។ ប៉ុន្ដែដើម្បីក្លាយជានាយករដ្ឋមន្ត្រី លោក ភីថា ត្រូវការសំឡេងគាំទ្រភាគច្រើន យ៉ាងតិច ៣៧៦សំឡេង មកពីក្នុងចំណោមសមាជិកសភាទាំង២ សរុប៧៥០នាក់ ខណៈសម្ពន្ធមិត្តទាំង៨គណបក្សរបស់គាត់ មានសមាជិកសភា សរុបត្រឹមតែ៣១៣នាក់។
បើទោះជាយ៉ាងណា លោក ភីថា បានអះអាង ថា គាត់នឹងមានការគាំទ្រគ្រប់គ្រាន់ ពីក្នុងព្រឹទ្ធសភា សម្រាប់ធានាដល់ការបោះឆ្នោតជ្រើសរើសគាត់ ធ្វើជានាយករដ្ឋមន្ត្រីថ្មីរបស់ប្រទេសថៃ៕
