ទីក្រុងលូហ្សាមប៊ូ (Luxembourg)៖ ស្របពេលប្រទេសរុស្ស៊ី កំពុងតែប្រឈមមុខនឹងវិបត្ដិដ៏ធ្ងន់ធ្ងរ បង្កឡើង ដោយកម្លាំងទាហានស៊ីឈ្នួល Wagner កាលពីថ្ងៃសៅរ៍ ទី២៤ ខែមិថុនា នោះ ក្រុមរដ្ឋមន្ដ្រីសហភាពអឺរ៉ុប ក៏កំពុងតែជួបប្រជុំគ្នា នៅក្នុងប្រទេសលូហ្សាមប៊ូ ហើយបានឯកភាពគ្នា បង្កើនជំនួយយោធា មានទំហំទឹកប្រាក់ រហូតដល់៣,៥ពាន់លានអឺរ៉ូ ឬ ស្មើនឹងប្រហែល៣,៨៥ពាន់លានដុល្លារអាមេរិក ខណៈសហរដ្ឋអាមេរិក ក៏បានប្រកាស អំពីការផ្ដល់ជំនួយយោធាថ្មី ចំនួន៥០០លានដុល្លារ។
ទីភា្នក់ងារសារព័ត៌មានរបស់អាល្លឺម៉ង់ បានចេញផ្សាយ នៅថ្ងៃអង្គារ ទី២៧ ខែមិថុនា ថា ក្រុមរដ្ឋមន្ដ្រីការបរទេសទាំង២៧ប្រទេស នៃសហភាពអឺរ៉ុប កាលពីថ្ងៃចន្ទ បានជួបប្រជុំ នៅក្នុងប្រទេសលូហ្សាមប៊ូ ហើយបានសម្រេចបង្កើនមូលនិធិយោធា សម្រាប់ប្រទេសអ៊ុយក្រែន រហូតដល់៣,៨៥ពាន់លានដុល្លារបន្ថែមទៀត។
លោក ចូសេប ប័ររ៉ែល (Josep Borrell) ប្រធានគោលនយោបាយការបរទេសសហភាពអឺរ៉ុប បានសរសេរ នៅលើបណ្ដាញសង្គមធ្វីធើរ ថា «យើងនឹងបន្ដបង្កើននូវកិច្ចគាំទ្រយោធារបស់យើង កើនឡើងទ្វេដង ទាំងការផ្គត់ផ្គង់សម្ភារសឹក និង ការបណ្ដុះបណ្ដាលផ្នែកយោធា។ វិធានការទាំងនេះ នឹងប្រព្រឹត្ដ នៅក្នុងរយៈយូរតាមតែអាចធ្វើទៅបាន»។
លោកប្រមុខការទូតសហភាពអឺរ៉ុបរូបនេះ បានបញ្ជាក់ ខណៈមកដល់ប្រទេសលូហ្សាមប៊ួ ថា ការបន្តគាំទ្រដល់ប្រទេសអ៊ុយក្រែន នៅថ្ងៃនេះ ពិតជាមានសារៈសំខាន់ជាងពេលណាៗទាំងអស់ ព្រោះធ្វើឡើង ស្របពេលមានការបះបោរ ពីកម្លាំងទាហានស៊ីឈ្នួលរបស់រុស្ស៊ី Wagner បានផ្ទុះឡើង កាលពីចុងសប្តាហ៍មុន។
លោក ឌីមីត្រូ គូឡេបា (Dmytro Kuleba) រដ្ឋមន្ដ្រីក្រសួងការបរទេសអ៊ុយក្រែន ដែលបានចូលរួម នៅក្នុងកិច្ចប្រជុំនោះ តាមរយៈតំណវីដេអូ (Videolink) បានបញ្ជាក់ ថា «គាត់បានជំរុញឲ្យសហភាពអឺរ៉ុប ជំរុញឲ្យរុស្ស៊ី ចាញ់កាន់តែលឿនបំផុត តាមរយៈការបង្កើននូវកិច្ចគាំទ្រដល់ប្រទេសអ៊ុយក្រែន ឲ្យខ្លាំងក្លាបន្ថែមទៀត»។
បើតាមទិន្នន័យរបស់សហភាពអឺរ៉ុប បានឲ្យដឹង ថា សហភាពអឺរ៉ុប បានផ្ដល់ជំនួយយោធាដល់រដ្ឋាភិបាលក្រុងកៀវ រួចមកហើយ ចំនួន ៣,៦ពាន់លានអឺរ៉ូ (លុយអឺរ៉ុប) ចាប់តាំងពីលោកប្រធានាធិបតី វ្ល៉ាឌីមៀ ពូទីន បានបញ្ជាឲ្យកងទ័ពរុស្ស៊ី បើកទ្វារព្រំដែន វាយប្រហារចូលលុកលុយ នៅក្នុងប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២ រហូតមក។
ស្របគ្នានេះដែរ សហរដ្ឋអាមេរិក ក៏នឹងផ្តល់កញ្ចប់ជំនួយយោធាថ្មី សម្រាប់អ៊ុយក្រែន មានទឹកប្រាក់ រហូតដល់ ៥០០លានដុល្លារ។ ជំនួយជាគ្រឿងសឹកទាំងនេះ នឹងត្រូវប្រកាស នៅថ្ងៃអង្គារ។
ក្រុមមន្ដ្រីសហរដ្ឋអាមេរិក បានបញ្ជាក់ ថា កញ្ចប់ជំនួយថ្មីនេះ នឹងត្រូវផ្ដល់ទៅឲ្យកងទ័ពអ៊ុយក្រែន នាពេលនេះ ក៏រាប់បញ្ចូលទាំង រថចម្បាំង សម្រាប់ការវាយលុក មានដូចជា រថយន្តប្រយុទ្ធ ប្រភេទ Bradley (ប្រ៊េដលី) ចំនួន ៣០គ្រឿង និង រថពាសដែកដឹកកងទ័ព ប្រភេទ Stryker (ស្ដ្រៃឃើរ) ចំនួន២៥គ្រឿង។ បន្ថែមពីលើនេះ កងទ័ពអ៊ុយក្រែន ក៏នឹងទទួលបានគ្រាប់រំសេវ សម្រាប់ប្រព័ន្ធរ៉ុក្កែត HIMARS (ហាយម៉ាស) ហើយមីស៊ីលប្រឆាំងរថក្រោះ មានជាអាទិ៍ Javelins (ចាវេលីន) និង មីស៊ីលសម្រាប់ប្រព័ន្ធការពារដែនអាកាស Patriot (ផេទ្រីយ៉ូត) និង មីស៊ីលបាញ់លើស្មាប្រឆាំងនឹងយន្ដហោះ ប្រភេទ Stinger (ស្ទីងជើរ) ផងដែរ។
ការផ្គត់ផ្គង់គ្រឿងសឹករបស់បណ្ដាប្រទេសមហាអំណាចលោកខាងលិច បានកើតឡើងព្រមគ្នា ស្របពេលការបះបោរប្រដាប់អាវុធ នៅក្នុងប្រទេសរុស្ស៊ី។ សកម្មភាពទាំងនេះ កំពុងតែជួយជ្រោមជ្រែង កាន់តែខ្លាំងឡើង ដល់អ៊ុយក្រែន ហើយក៏ជាការបង្កើនសម្ពាធ កាន់តែធ្ងន់មកលើលោកប្រធានាធិបតី ពូទីន នៅក្នុងសង្គ្រាម នៅលើទឹកដីប្រទេសជិតខាងរបស់ខ្លួន៕
