រដ្ឋធានីវ៉ាស៊ីនតោន៖ ក្រោយការបះបោរដោយប្រដាប់អាវុធរបស់កម្លាំងទាហានស៊ីឈ្នួល Wagner នៅក្នុងប្រទេសរុស្ស៊ី នោះមក រដ្ឋាភិបាលក្រុងវ៉ាស៊ីនតោន ក៏បានប្រកាសយ៉ាងច្បាស់លាស់ អំពីគោលជំហររបស់ខ្លួន សម្រាប់ធ្វើឲ្យមានទំនុកចិត្ត ដល់ក្រុងមូស្គូ។
សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីព្រឹក ថ្ងៃអង្គារ ទី២៧ ខែមិថុនា ឆ្នាំ២០២៣ ថា ក្រសួងការបរទេសសហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍របស់ខ្លួន ថា ប្រេសិតរបស់សហរដ្ឋអាមេរិក បានទាក់ទងដោយផ្ទាល់ ទៅកាន់រដ្ឋាភិបាលក្រុងមូស្គូ នៅក្នុងអំឡុងមានការបះបោរ ត្រូវបានបង្កឡើង ដោយកម្លាំងទាហានស៊ីឈ្នួលរបស់រុស្ស៊ី Wagner កាលពីថ្ងៃសៅរ៍ ទី២៤ ខែមិថុនា។ ករណីនេះ សហរដ្ឋអាមេរិក ចង់ប្រាប់ដល់ភាគីរុស្ស៊ី ឲ្យមានទំនុកចិត្តកាន់តែច្បាស់ ថា រដ្ឋាភិបាលក្រុងវ៉ាស៊ីនតោន មិនជាប់ពាក់ព័ន្ធណាមួយ ជាមួយនឹងវិបត្ដិដ៏ធ្ងន់ធ្ងរចុងក្រោយបំផុត នៅក្នុងប្រទេសរុស្ស៊ី នោះឡើយ។
មន្ដ្រីនាំពាក្យ ក្រសួងការបរទេសសហរដ្ឋអាមេរិក លោក ម៉ាធូ មីលល័រ (Matthew Miller) បានថ្លែងទៅកាន់ក្រុមអ្នកកាសែត ថា លោកស្រី លីនណេ ត្រាស៊ី (Lynne Tracy) ឯកអគ្គរដ្ឋទូតរបស់សហរដ្ឋអាមេរិក ប្រចាំនៅរដ្ឋធានីងមូស្គូ ប្រទេសរុស្ស៊ី ក៏ដូចជា ក្រុមមន្ត្រីសហរដ្ឋអាមេរិក បានទាក់ទងទៅកាន់ស្ថានទូតរុស្ស៊ី ប្រចាំនៅរដ្ឋធានីវ៉ាស៊ីនតោន និង មន្ដ្រីរដ្ឋាភិបាលក្រុងមូស្គូ កាលពីថ្ងៃសៅរ៍ចុងសប្ដាហ៍ កន្លងទៅនេះ ដើម្បីបញ្ជាក់ឲ្យបានច្បាស់ ថា «សហរដ្ឋអាមេរិក ពិតជាមិនជាប់ពាក់ព័ន្ធ ជាមួយនឹងសកម្មភាពបះបោរ ត្រូវបានបង្កឡើង ដោយកម្លាំងទាហានឯកជនវ៉ាគណឺររបស់លោក យ៉ែវហ្គេនី ព្រីហ្គោហ្ស៊ីន» នោះទេ។
លោកស្រី លីនណេ ត្រាស៊ី ប្រេសិតរបស់សហរដ្ឋអាមេរិក បានបញ្ជាក់ ថា «បញ្ហាជាចម្បង យើងរំពឹងទុកជាមុន ថា ប្រទេសរុស្ស៊ី នឹងនៅតែរក្សានូវកាតព្វកិច្ចរបស់ខ្លួន សម្រាប់កាតព្វកិច្ចរបស់ខ្លួន ការពារដល់ស្ថានទូតរបស់យើង និង ការពារដល់បុគ្គលិកស្ថានទូតរបស់យើង ស្ថិតក្នុងរដ្ឋធានីមូស្គូ។ ទន្ទឹមគ្នានេះ សហរដ្ឋអាមេរិក សូមបញ្ជាក់ឡើងវិញ អំពីអ្វីដែលយើងបាននិយាយជាសាធារណៈ ថា ការបះបោរប្រដាប់អាវុធនេះ ជារឿងផ្ទៃក្នុងរបស់រុស្ស៊ី ដែលបានកើតឡើង នៅក្នុងប្រទេសរុស្ស៊ី។ ប៉ុន្ដែសហរដ្ឋអាមេរិក មិនបានចូលមកជាប់ពាក់ព័ន្ធ នៅក្នុងព្រឹត្ដិការណ៍នេះឡើយ»៕