រដ្ឋធានីកៀវ៖ ការបះបោរដោយប្រដាប់អាវុធ ពីកម្លាំងទាហានស៊ីឈ្នួលវ៉ាគណឺរ នៅក្នុងប្រទេសរុស្ស៊ី បានធ្វើឲ្យពិភពលោកទាំងមូល ផ្ដោតការយកចិត្តទុកដាក់ខ្លាំង ជាពិសេស បណ្ដាប្រទេសមហាអំណាចលោកខាងលិច ហើយមេដឹកនាំអ៊ុយក្រែន ក៏បានប្រាប់ អំពីការបង្ហាញសញ្ញាមិនល្អ នៃរបបគ្រប់គ្រង នៅរុស្ស៊ី ដល់ប្រធានាធិបតីសហរដ្ឋអាមេរិក។
សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីព្រឹក ថ្ងៃចន្ទ ទី២៦ ខែមិថុនា ថា ប្រធានាធិបតីអ៊ុយក្រែន លោក វ៉ូឡូឌីមៀ (Volodymyr Zelenskyy) និង សមភាគីសហរដ្ឋអាមេរិក លោក ចូ បៃដិន (Joe Biden) បានពិភាក្សាគ្នា តាមទូរស័ព្ទ អំពីស្ថានការណ៍វឹកវរចុងក្រោយបំផុត នៅក្នុងប្រទេសរុស្ស៊ី។ ការបះបោររបស់កម្លាំងទាហានស៊ីឈ្នួលវ៉ាគណឺរ (Wagner) កំពុងតែបង្ហាញសញ្ញាមិនល្អ ក្រោមការគ្រប់គ្រងអំណាចរបស់លោក វ្ល៉ាឌីមៀ ពូទីន ប្រធានាធិបតីរុស្ស៊ី។
ក្រុមមន្ដ្រីរដ្ឋាភិបាលក្រុងកៀវ បានអះអាង ថា លោកប្រធានាធិបតី ហ្សេឡែនស្គី និង លោកប្រធានាធិបតី បៃដិន បានចេញរំលែក អំពីការវាយតម្លៃរបស់ពួកគាត់ នៅក្នុងការវិវឌ្ឍស្ថានការណ៍ចុងក្រោយបំផុត កាលពីពេលថ្មីៗនេះ នៅក្នុងប្រទេសរុស្ស៊ី។ ជាមួយគ្នានេះ បណ្ដាមេដឹកនាំមេដឹកនាំប្រទេសមហាអំណាចលោកខាងលិច និង សម្ពន្ធមិត្ត បានតាមដានយ៉ាងយកចិត្តទុកដាក់ និង ធ្វើការយ៉ាងប្រយ័ត្នប្រយែងបំផុត នៅក្នុងការធ្វើអត្ថាធិប្បាយណាមួយ ពាក់ព័ន្ធនឹងបញ្ហាវិបត្ដិដ៏ធ្ងន់ធ្ងរ នៅរុស្ស៊ី នាពេលថ្មីៗនេះ។
លោកប្រធានាធិបតី វ៉ូឡូឌីមៀ ហ្សេឡែនស្គី បានបញ្ជាក់ ថា «ព្រឹតិ្ដការណ៍ចុងក្រោយ កាលពីចុងប្ដាហ៍កន្លងទៅថ្មីៗនេះ បានបង្ហាញ អំពីសញ្ញាមិនល្អ ក្រោមរបបគ្រប់គ្រងរបស់ លោក វ្ល៉ាឌីមៀ ពូទីន ប្រធានាធិបតីរុស្ស៊ី។ បញ្ហានេះ ពិភពលោក ត្រូវតែបង្កើននូវការដាក់សម្ពាធ ប្រឆាំងនឹងរុស្ស៊ី រហូតល្គឹកណា សណ្ដាប់ធ្នាប់របស់ពិភពលោក ត្រូវបានស្ដារឲ្យល្អឡើងវិញ»។
បន្ថែមពីលើនេះ លោកប្រធានាធិបតីសហរដ្ឋអាមេរិក និង អ៊ុយក្រែន បានពិភាក្សាគ្នា លើការពង្រីកកិច្ចសហប្រតិបត្ដិការ នៅក្នុងវិស័យការពារជាតិបន្ថែមទៀត ជាពិសេស បង្កើនជំនួយគ្រឿងសព្វាវុធបាញ់ចម្ងាយ នៅលើសមរភូមិរបស់អ៊ុយក្រែន។
ដោយឡែក សេតវិមានរបស់ប្រធានាធិបតីសហរដ្ឋអាមេរិក បានបញ្ជាក់ ថា មេដឹកនាំទាំង២ បានពិភាក្សាគ្នា អំពីព្រឹត្ដិការណ៍ថ្មីៗ នៅក្នុងប្រទេសរុស្ស៊ី។ ប៉ុន្ដែមន្ដ្រីសហរដ្ឋអាមេរិក មិនផ្ដល់ព័ត៌មានលម្អិតណានោះឡើយ។
បើទោះជាយ៉ាងណា សេតវិមាន គ្រាន់តែបានបញ្ជាក់ ថា មេដឹកនាំទាំង២ បានពិភាក្សាគ្នា អំពីសកម្មភាពវាយបករបស់អ៊ុយក្រែន ដែលកំពុងតែបន្ដ។ បន្ថែមពីលើនេះ សហរដ្ឋអាមេរិក បានអះអាងជាថ្មី អពីកិច្ចគាំទ្ររបស់ក្រុងវ៉ាស៊ីនតោន ជួយដល់ក្រុងកៀវ ដោយរាប់បញ្ចូលទាំងការបន្ដផ្ដល់ជំនួយសន្ដិសុខ សេដ្ឋកិច្ច និង មនុស្សធម៌។
លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ស្ថាបនិកក្រុមហ៊ុនទាហានស៊ីឈ្នួលវ៉ាគណឺរ (Wagner) បានបង្កឱ្យមានវិបត្តិនយោបាយ នៅក្នុងប្រវត្តិសាស្ត្រថ្មីៗរបស់រុស្ស៊ី តាមរយៈការបះបោរប្រដាប់អាវុធ នៃកម្លាំងទាហានរបស់គាត់។ ថៅកែទាហានឯកជនរូបនេះ កាលពីថ្ងៃសុក្រ ទី២៣ ខែមិថុនា ឆ្នាំ២០២៣ បានប្ដេជ្ញាផ្តួលរំលំរដ្ឋមន្ដ្រីក្រសួងការពារជាតិរុស្ស៊ី លោក ស៊ើរហ្គេ សយហ្គូ (Sergei Shoigu) និង លោកឧត្ដមសេនីយ៍ វ៉ាឡេរី ជេរ៉ាស៊ីម៉ូវ (Valery Gerasimov) នាយអគ្គសេនាធិការកងទ័ពរុស្ស៊ី ចេញពីតំណែង។ ក្រៅពីនេះ កម្លាំងទាហានឯកជនវ៉ាគណឺរ (Wagner) ក៏បានអះអាង អំពីការទម្លាក់ឧទ្ធម្ភាគចក្រ និង យន្តហោះយោធារបស់រុស្ស៊ី ជាច្រើនគ្រឿងផងដែរ។
លោក យ៉ែវហ្គេនី ព្រីហ្គោហ្ស៊ីន ថៅកែទាហានឯកជនវ៉ាគណឺរ កាលពីចុងសប្តាហ៍កន្លងទៅថ្មីៗនេះ បានណែនាំដល់កម្លាំងទាហានស៊ីឈ្នួលរបស់គាត់ ឱ្យដណ្តើមកាន់កាប់ទីបញ្ជាការយោធាដ៏ធំរបស់រុស្ស៊ី នៅតំបន់រូស្ដូ-អន-ដូន (Rostov-on-Don) សម្រាប់ប្រតិបត្តិការសង្គ្រាម នៅក្នុងប្រទេសអ៊ុយក្រែន ហើយក្រោយមកមក ចាប់ផ្តើមការហែក្បួនទ័ព ឆ្ពោះទៅកាន់ទីក្រុងមូស្គូ។ ប៉ុន្ដែបន្ទាប់មក គាត់បានបញ្ជាឱ្យទាហានរបស់គាត់ ផ្លាស់ប្តូរទិសដៅបកក្បាលត្រឡប់ វិលចូលបន្ទាយវិញ។ សកម្មភាពនឹកស្មានមិនដល់នេះ បានកើតឡើង ក្រោយពេលមានកិច្ចព្រមព្រៀងមួយ ត្រូវបានធ្វើឡើង កាលពីថ្ងៃសៅរ៍ ក្រោមការសម្របសម្រួលពីប្រធានាធិបតីបេឡារុស លោក អាឡិចសានដឺរ លូកាសែនកូ (Alexander Lukashenko)។ ការបះបោរនេះ បានធ្វើឱ្យមនុស្សជាច្រើន នៅទូទាំងប្រទេសរុស្ស៊ី និង ពិភពលោក មានការភ្ញាក់ផ្អើលយ៉ាងខ្លាំង។ ប៉ុន្ដែសកម្មភាពរបស់ទាហានឯកជនវ៉ាគណឺរ បានបញ្ចប់ទៅវិញ ដោយគ្មានការបង្ហូរឈាមដាក់គ្នា ហើយលោក ព្រីហ្គោហ្ស៊ីន ត្រូវនិរទេសទៅកាន់ប្រទេសបេឡារុស៕