រដ្ឋធានីមូស្គូ៖ ថ្វីបើចលនាបះបោររបស់កម្លាំងទាហានស៊ីឈ្នួលវ៉ាគណឺរ ត្រូវបានដោះស្រាយឲ្យធូរស្រាលទៅវិញ ដោយមិនមានការបង្ហូរឈាម ក្រោមការសម្របសម្រួលពីប្រធានាធិបតីបេឡារុស លោក អាឡិកសានដឺរ លូកាសេនកូ ជាមួយនឹងការទម្លាក់ចោលនូវការចោទប្រកាន់ពីបទក្បត់ជាតិ ប្រឆាំងនឹងក្រុមបះបោរយ៉ាងណាក្ដី ប៉ុន្ដែអាជ្ញាធររុស្ស៊ី នៅតែស៊ើបអង្កេត លើករណីនេះដដែល។
សារព័ត៌មាន Al Jazeera បានចេញផ្សាយ កាលពីរាត្រី ថ្ងៃចន្ទ ទី២៦ ខែមិថុនា ថា លោក ដានីយ៉ែល ហ័រគីន (Daniel Hawkins) ជាអ្នកកាសែតមួយរូប នៅក្នុងទីក្រុងមូស្គូ បានអះអាង ថា លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ស្ថាបនិកក្រុមហ៊ុនទាហានស៊ីឈ្នួលរបស់រុស្ស៊ី Wagner នៅតែស្ថិតក្រោមការស៊ើបអង្កេត ពីអាជ្ញាធរក្រុងមូស្គូ ជុំវិញករណីដឹកនាំកម្លាំងប្រដាប់អាវុធបះបោររបស់គាត់។
លោក Daniel Hawkins បានបន្ថែម ថា «ដំបូងឡើយ លោកប្រធានាធិបតី ពូទីន បានបញ្ជាក់ ថា រាល់ការចោទប្រកាន់ទាំងអស់ នឹងត្រូវទម្លាក់ចោល ប៉ុន្ដែសំណុំរឿងទាំងនេះ ហាក់បីដូចជាកំពុងតែស្ថិតនៅលើតុជាថ្មីបន្ដទៀត។ បញ្ហាជាច្រើន នឹងអាស្រ័យលើការឆ្លើយតបរបស់វិមានក្រឹមឡាំង ចំពោះសេចក្ដីថ្លែងការណ៍របស់ពូទីន»។
ដោយឡែក លោក យ៉ែវហ្គេនី ព្រីហ្គោហ្ស៊ីន បានបញ្ជាក់ នៅក្នុងការធ្វើអត្ថាធិប្បាយរបស់គាត់ ក្រោយការបះបោរ កាលពីថ្ងៃសៅរ៍ សប្ដាហ៍មុន ថា «ប្រសិនបើសកម្មភាពយោធារបស់រុស្ស៊ី នៅលើទឹកដីរបស់អ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ត្រូវបានអនុវត្ដឡើង ដោយកម្លាំងមានការហ្វឹកហ្វឺនដ៏ត្រឹមត្រូវរបស់ Wagner សម្រាប់ប្រតិបត្ដិការយោធាពិសេសនោះ អាចនឹងត្រូវបញ្ចប់ ត្រឹមតែរយៈពេល១ថ្ងៃប៉ុណ្ណោះ»។
លោកថៅកែទាហានស៊ីឈ្នួលរបស់រុស្ស៊ី រូបនេះ ក៏បានបញ្ជាក់ផងដែរ ថា Wagner ដង្ហែក្បួនទ័ព នៅចុងសប្ដាហ៍នេះ ទៅកាន់រដ្ឋធានីមូស្គូ ដើម្បីបង្ហាញ អំពីការព្រួយបារម្ភជាច្រើន លើបញ្ហាសន្ដិសុខ នៅទូទាំងប្រទេសរុស្ស៊ី។
ដោយឡែក លោក ជេមស៍ ក្លេវើរលី (James Cleverly) រដ្ឋមន្ត្រីក្រសួងការបរទេសចក្រភពអង់គ្លេស បានថ្លែងទៅកាន់រដ្ឋសភារបស់អង់គ្លេស ថា ថ្វីបើកម្លាំងទាហានស៊ីឈ្នួល Wagner របស់រុស្ស៊ី ដឹកនាំដោយលោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) កាលពីថ្ងៃសៅរ៍ កន្លងទៅនេះ មិនទទួលបានជោគជ័យយ៉ាងណាក្ដី ប៉ុន្ដែសកម្មភាពបែបនេះ បានបង្ហាញអំពីការប្រឈមមុខមិនធ្លាប់មានពីមុនមក សម្រាប់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin)។ ករណីនេះ បញ្ជាក់យ៉ាងច្បាស់ណាស់ ថា ការប្រឆាំងកំពុងតែលេចឡើង នៅក្នុងការគាំទ្ររបស់រុស្ស៊ី សម្រាប់សង្គ្រាម»។
បើទោះជាយ៉ាងណា វិមានក្រឹមឡាំង កាលពីថ្ងៃអាទិត្យ បានថ្លែង ថា កម្លាំងទាហាន Wagner អាចនឹងចុះកិច្ចសន្យាជាមួយនឹងក្រសួងការពារជាតិរុស្ស៊ី ក្រោយពួកគេវិលត្រឡប់ទៅកាន់បន្ទាយរបស់ពួកគេវិញ។
ទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី RIA Novosti បានរាយការណ៍ ថា លោក វ្ល៉ាឌីមៀ ពូទីន ប្រធានាធិបតីរុស្ស៊ី បានពិភាក្សាតាមទូរស័ព្ទ ជាមួយនឹងអធិរាជ នៃប្រទេសកាតារ ព្រះអង្គម្ចាស់ សេក តាមីម ប៊ិន ហាម៉ាដ អាល់ ថានី (Sheikh Tamim bin Hamad Al Thani)ដែលគាំទ្រចំពោះវិមានក្រឹមឡាំង ទាក់ទងនឹងការបះបោររបស់ Wagner កាលពីថ្ងៃសៅរ៍។
ទីភ្នាក់ងារសារព័ត៌មានរបស់រុស្ស៊ី Interfax ក៏បានរាយការណ៍ផងដែរ ថា លោក ពូទីន បាននិយាយជាមួយប្រធានាធិបតីអ៊ីរ៉ង់ លោក អេប្រាហ៊ីម រ៉ៃស៊ី (Ebrahim Raisi) បានបង្ហាញនូវការគាំទ្រយ៉ាងពេញទំហឹង ចំពោះការដឹកនាំរបស់រុស្ស៊ី។
