រាជធានីឡុងដ៍៖ ថ្វីបើប្រធានាធិបតីបេឡារុស លោកអាឡិកសានដឺរ លូកាសេនកូ (Alexander Lukashenko) បានជួយសម្របសម្រួល ដោះស្រាយវិបត្ដិដ៏ធ្ងន់ធ្ងរ បញ្ចៀសនូវការបង្ហូរឈាមគ្នាឯង រវាងកងទ័ពរដ្ឋាភិបាលរុស្ស៊ី និង កម្លាំងទាហានស៊ីឈ្នួល នៅក្នុងប្រទេសរុស្ស៊ី បញ្ចប់ភ្លាមៗយ៉ាងណាក្ដី ប៉ុន្ដែអតីតមេទ័ពកំពូលរបស់ចក្រភពអង់គ្លេស នៅតែជំរុញឲ្យអ៊ុយក្រែន ត្រៀមខ្លួនការពារ ទប់ទល់នឹងកម្លាំងទាហានស៊ីឈ្នួល Wagner អាចនឹងវាយប្រហារ ចេញពីបេឡារុស ដើម្បីដណ្ដើមកាន់កាប់ទីក្រុងកៀវ សាជាថ្មី។
បណ្ដាញទូរទស្សន៍អារ៉ាប់អន្ដរជាតិ Alarabiya News បានផ្សាយ នៅថ្ងៃចន្ទ ទី២៦ ខែមិថុនា ឆ្នាំ២០២៣ ថា អតីតនាយអគ្គសេនាធិការកងទ័ពរបស់ចក្រភពអង់គ្លេស លោកឧត្តមសេនីយ៍ រីឆាដ ដានណាត (Richard Dannatt) បានថ្លែង កាលពីថ្ងៃអាទិត្យ ថា អ៊ុយក្រែន គួរតែពង្រឹងកិច្ចការពាររបស់ខ្លួនបន្ថែមទៀត សម្រាប់ត្រៀមខ្លួន ទប់ទល់ប្រឆាំងនឹងការវាយប្រហារដ៏ខ្លាំងក្លា ពីកម្លាំងទាហានស៊ីឈ្នួលរបស់រុស្ស៊ី Wagner ដឹកនាំដោយលោក យ៉ែវហ្គេនី ព្រីហ្គោហ្ស៊ីន (Yevgeny Prigozhin)។ កម្លាំងទាហានស៊ីឈ្នួលរបស់រុស្ស៊ី Wagner ទំនងជាអាចនឹងចាប់ផ្ដើម ប្រតិបត្ដិការយោធា វាយប្រហារជាថ្មី ចេញពីប្រទេសបេឡារុស ដើម្បីដណ្ដើមកាន់កាប់ទីក្រុងកៀវ។
លោកឧត្ដមសេនីយ៍ រូបនេះ បានប្រាប់បណ្ដាញទូរទស្សន៍ Sky News ថា «វាជាការពិតណាស់ ថៅកែក្រុមហ៊ុនទាហានឯកជន Wagner លោក យ៉ែវហ្គេនី ព្រីហ្គោហ្ស៊ីន បានធ្វើដំណើរទៅកាន់ប្រទេសបេឡារុស។ ករណីនេះ ក្លាយជាបញ្ហាដ៏គួរឲ្យព្រួយបារម្ភបំផុតមួយ សម្រាប់អ៊ុយក្រែន។ ប្រសិនបើលោក ព្រីហ្គោហ្ស៊ីន នៅតែរក្សាកម្លាំងប្រយុទ្ធដ៏មានប្រសិទ្ធភាពរបស់គាត់ នៅជុំវិញខ្លួនរបស់គាត់ គឺគាត់ក៏នៅតែជាការគំរាមកំហែងជាថ្មី មកលើប្រទេសអ៊ុយក្រែន ខណៈរដ្ឋធានីកៀវរបស់ប្រទេសអឺរ៉ុបខាងកើតមួយនេះ នៅជិតបំផុត នៃប្រទេសបេឡារុស ដែលជាសម្ពន្ធមិត្តដ៏ជិតស្និទ្ធរបស់រុស្ស៊ី ហើយក៏ជាទីកន្លែង នៃការចាប់ផ្ដើមសង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បានផ្ទុះឡើង នៅថ្ងៃទី២៤ ខែកុម្ភៈ ឆ្នាំ២០២២ផងដែរ។
លោកឧត្ដមសេនីយ៍ ដានណាត អតីតនាយអគ្គសេនាធិការកងទ័ពចក្រភពអង់គ្លេស បានបញ្ជាក់ ថា «ការវាយប្រហារដណ្ដើមកាន់កាប់ទីក្រុងកៀវ នៅតែអាចកើតមានឡើង ដោយសារតែរុស្ស៊ី នៅតែអាចប្រើប្រាស់កម្លាំងទាហានស៊ីឈ្នួល Wagner សម្រាប់ការដណ្ដើមកាន់កាប់រដ្ឋធានីកៀវ សាជាថ្មី។ ដោយឡែក ការបះបោរដោយកម្លាំងប្រដាប់អាវុធ ពីកម្លាំងទាហាន Wagner ក៏នឹងធ្វើឲ្យប្រធានាធិបតីរុស្ស៊ី លោក វ្ល៉ាឌីមៀ ពូទីន ប្រឈមនឹងការអាម៉ាស់បំផុតមួយ ចាប់តាំងពីគាត់បានឡើងកាន់កាប់អំណាច រហូតមក។ វាជាការពិតណាស់ នេះបានបង្ហាញនូវការថមថយឥទ្ធិពលច្រើន សម្រាប់លោក ពូទីន ខណៈកម្លាំងយោធារបស់រុស្ស៊ី កំពុងតែជ្រួលច្របល់»។
លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ថៅកែទាហានស៊ីឈ្នួល Wagner កាលពីថ្ងៃសុក្រ ចុងសប្ដាហ៍មុន បានចូលកាន់កាប់ទីបញ្ជាការយោធាដ៏ធំរបស់រុស្ស៊ី នៅតំបន់រូស្ដូ-អន-ដូន (Rostov-on-Don) សម្រាប់ប្រតិបត្តិការសង្គ្រាម នៅក្នុងប្រទេសអ៊ុយក្រែន។ បន្ទាប់មក កម្លាំងទាហានឯកជនទាំងនេះ បានបន្តដំណើរតម្រង់ទិសដៅ ទៅកាន់រដ្ឋធានីមូស្គូ នៅក្នុងគោលបំណងផ្ដួលរំលំលោក ស៊ើរហ្គេ សយហ្គូ (Sergei Shoigu) រដ្ឋមន្ដ្រីក្រសួងការពារជាតិរុស្ស៊ី និង លោកឧត្ដមសេនីយ៍ វ៉ាឡេរី ជេរ៉ាស៊ីម៉ូវ (Valery Gerasimov) នាយអគ្គសេនាធិការកងទ័ពរុស្ស៊ី ចេញពីតំណែង។ កម្លាំងទាហានឯកជនវ៉ាគណឺរ (Wagner) ក៏បានអះអាង អំពីការទម្លាក់ឧទ្ធម្ភាគចក្រ និង យន្តហោះយោធារបស់រុស្ស៊ី ជាច្រើនគ្រឿង ។
សកម្មភាពទាំងនេះ បានជំរុញឲ្យរុស្ស៊ី ដាក់ពង្រាយកងទ័ពជាដំបូង សម្រាប់ការពាររដ្ឋធានីមូស្គូ។ ប៉ុន្ដែក្រុងមូស្គូ បានដកកម្លាំងទាហានទាំងនោះចេញវិញ កាលពីថ្ងៃអាទិត្យ ស្របពេលកម្លាំងទាហានស៊ីឈ្នួល Wagner បានសម្រេចចិត្ត បង្វែរក្បួនទ័ពរបស់ពួកគេ ត្រឡប់ថយក្រោយ ឆ្ពោះទៅកាន់បន្ទាយរបស់ខ្លួនវិញ ក្រោយពេលមានការសម្របសម្រួល ពីប្រធានាធិបតីបេឡារុស លោកអាឡិកសានដឺរ លូកាសេនកូ (Alexander Lukashenko) ជាសម្ពន្ធមិត្តដ៏ជិតស្និទ្ធរបស់មេដឹកនាំវិមានក្រឹមឡាំង លោក វ្ល៉ាឌីមៀ ពូទីន។
ថ្វីបើរដ្ឋាភិបាលក្រុងមូស្គូរបស់លោកប្រធានាធិបតី ពូទីន បានចោទប្រកាន់ ចំពោះការបះបោរប្រដាប់អាវុធ ពីបទក្បត់ជាតិ ប្រឆាំងនឹងលោក ព្រីហ្គោហ្ស៊ីន និង កម្លាំងទាហានរបស់គាត់ ខណៈបណ្ដាប្រទេសមហាអំណាចពិភពលោក កំពុងតែតាមដានយ៉ាងយកចិត្តទុកដាក់យ៉ាងណាក្ដី ប៉ុន្ដែព្រឹត្តិការណ៍នេះ ក៏គ្មានអ្នកណាម្នាក់ មិននឹកស្មានដល់ ថា កម្លាំងទាហានស៊ីឈ្នួល Wagner បានបញ្ឈប់សកម្មភាពរបស់ខ្លួនទៅវិញភ្លាមៗនោះដែរ។ វិបត្ដិដ៏ធ្ងន់ធ្ងរនៅក្នុងប្រទេសរុស្ស៊ី បានថយកម្ដៅទៅវិញ ក្រោយពេលមានការព្រមព្រៀងមួយ ក្រោមការសម្របសម្រួល ពីលោក អាឡិកសានដឺរ លូកាសេនកូ ប្រធានាធិបតីបេឡារុស ជាសម្ពន្ធមិត្តដ៏ជិតស្និទ្ធបំផុតរបស់លោក វ្ល៉ាឌីមៀ ពូទីន។ ការសម្រេចចិត្តចុងក្រោយ បានតម្រូវឲ្យលោក ព្រីហ្គោហ្ស៊ីន និរទេសទៅកាន់បេឡារុស ជាប្រទេសជិតខាងរបស់រុស្ស៊ី ដែលបានគាំទ្រ នៅក្នុងសង្គ្រាមឈ្លានពានរបស់ក្រុងមូស្គូ ប្រឆាំងនឹងអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។
លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំង បានឲ្យដឹង ថា នៅក្នុងកិច្ចព្រមព្រៀងនេះ គឺក្រុងមូស្គូ ក៏បានសម្រេចទម្លាក់ចោលរាល់ការចោទប្រកាន់របស់ខ្លួន ប្រឆាំងនឹងលោក យ៉ែវហ្គេនី ព្រីហ្គោហ្ស៊ី និង កម្លាំងទាហានរបស់គាត់ ពីបទក្បត់ជាតិ សម្រាប់សកម្មភាពបះបោរប្រដាប់អាវុធនេះ។ ទន្ទឹមគ្នានេះដែរ លោក ព្រីហ្គោហ្ស៊ីន ក៏បានដឹកនាំកម្លាំងទាហាន Wagner របស់គាត់ វិលបន្ទាយយោធារបស់ខ្លួនវិញ៕
