រដ្ឋធានីកៀវ៖ ស្របពេលកម្លាំងទាហានស៊ីឈ្នួលរបស់រុស្ស៊ី Wagner បានទៅបោះមូលដ្ឋានយោធា នៅក្នុងប្រទេសបេឡារុស ក្រោយការបះបោរមិនសម្រេច ប្រឆាំងនឹងមន្ដ្រីជាន់ខ្ពស់ក្រសួងការពារជាតិរុស្ស៊ី នោះមក កម្លាំងទាហានរបស់រដ្ឋាភិបាលក្រុងមូស្គូ បានវាយប្រហារដោយគ្រាប់បែក ទៅលើភោជនីយដ្ឋានដ៏មមាញឺកមួយ ដោយបានសម្លាប់មនុស្សជាច្រើននាក់ នៅកណ្ដាលទីក្រុងក្រាម៉ាតូសខ៍ (Kramatorsk) ស្ថិតក្នុងតំបន់ដូណែតស្ក៍ (Donetsk) នាភាគខាងកើតរបស់ប្រទេសអ៊ុយក្រែន។
សារព័ត៌មាន Al Jazeera បានចេញផ្សាយ នៅព្រឹក ថ្ងៃពុធ ទី២៨ ខែមិថុនា ថា ការវាយប្រហាររបស់រុស្ស៊ី ទៅលើទីក្រុងក្រាម៉ាតូសខ៍ បានសម្លាប់មនុស្សយ៉ាងតិច៤នាក់ និង រាប់សិបនាក់ផ្សេងទៀត បានរងរបួស។ ស្របគ្នានេះដែរ បណ្ដាប្រទេសជាច្រើន នៅក្នុងតំបន់សមុទ្របាល់ទិក (Baltic) កំពុងតែព្រួយបារម្ភយ៉ាងខ្លាំង អំពីក្រុមទាហាន Wagner Group ដែលបាននិរទេស ចេញពីរុស្ស៊ី នាពេលនេះ កំពុងតែបង្ហាញខ្លួន បោះទីតាំងឈរជើង នៅក្នុងប្រទេសបេឡារុស ដែលជាសម្ពន្ធមិត្តដ៏ជិតស្និទ្ធបំផុតរបស់រុស្ស៊ី។
ក្រុមមន្ដ្រីអ៊ុយក្រែន បានអះអាង ថា មីស៊ីលមួយគ្រាប់ បានវាយប្រហារទៅហាងភីហ្សា ស្ថិតនៅកណ្ដាលទីក្រុងក្រាម៉ាតូសខ៍ កាលពីព្រលប់ ថ្ងៃអង្គារ ដោយបានសម្លាប់មនុស្ស ចំនួន៤នាក់ ហើយក្នុងនោះក៏មានកុមារម្នាក់ផងដែរ។ ចំណែកគ្រាប់មីស៊ីលទី២ ក៏បានវាយប្រហារទៅលើភូមិមួយ នៃទីក្រុងនេះ បណ្ដាលឲ្យមនុស្ស៥នាក់ផ្សេងទៀត រងរបួស។ ភោជនីយដ្ឋាន រងការវាយប្រហារនេះ គឺនៅមុនម៉ោង៨យប់ (វេលាក្នុងតំបន់) មានមនុស្សជាច្រើន បានចូលទទួលទានអាហារពេលល្ងាច ហើយចំនួនអ្នកស្លាប់ អាចនឹងកើតឡើងបន្ថែមទៀត។
លោក អាឡិកសានដឺរ លូកាសែនកូ (Alexander Lukashenko) ប្រធានាធិបតីបេឡារុស បានឱ្យដឹង ថា ការវាយប្រហារនេះ បានកើតឡើង ចំពេលមានការធ្លាក់ចុះជាបន្តបន្ទាប់ ក្រោយការការបះបោររបស់កម្លាំងទាហានស៊ីឈ្នួល Wagner ដឹកនាំដោយលោក យ៉ែវហ្គេនី ព្រីហ្គោហ្ស៊ីន។ ស្របពេលនេះដែរ កម្លាំងទាហាន Wagner ក៏បានមកដល់ប្រទេសបេឡារុស ដែលនៅជិតខាងរបស់ប្រទេសរុស្ស៊ី ផងដែរ។
លោក យ៉ែវហ្គេនី ព្រីហ្គោហ្ស៊ីន វ័យ៦២ឆ្នាំ ជាស្ថាបនិក ក្រុមហ៊ុនទាហានស៊ីឈ្នួល Wagner បានបញ្ជាក់ ថា គាត់បានដឹកនាំនូវការបះបោរនេះ សម្រាប់សង្គ្រោះដល់កម្លាំងប្រដាប់អាវុធរបស់គាត់ ក្រោយពេលមានបញ្ជាឲ្យដាក់ពួកគេ ស្ថិតក្រោមការគ្រប់គ្រងរបស់ក្រសួងការពារជាតិរុស្ស៊ី។ ថៅកែទាហានស៊ីឈ្នួលរូបនេះ បានចាត់ទុកក្រសួងការពារជាតិរុស្ស៊ី អនុវត្ដគ្មានប្រសិទ្ធភាព នៅក្នុងសង្គ្រាមនៅអ៊ុយក្រែន។
ដោយឡែក សារព័ត៌មាន South China Morning Post បានរាយការណ៍ ថា ការវាយប្រហារទៅលើភោជនីយដ្ឋាន នៅទីក្រុងក្រាម៉ាតូសខ៍ បានសម្លាប់មនុស្សចំនួន៤នាក់ និង ៤៧នាក់ផ្សេងទៀតរងរបួស ខណៈគ្រាប់មីស៊ីលមួយគ្រាប់ផ្សេងទៀត បានវាយប្រហារទៅលើភូមិមួយ នៅក្នុងទីក្រុងនោះដែរ បានបង្កឲ្យ៥នាក់រងរបួស។ ទីក្រុងក្រាម៉ាតូសខ៍នេះ មានមនុស្ស ប្រហែល ១៥០ ០០០នាក់រស់នៅ ហើយទីក្រុងដ៏ធំមួយនេះ នៅតែស្ថិតក្រោមការគ្រប់គ្រងរបស់អ៊ុយក្រែន ដដែល៕
