រដ្ឋធានីកៀវ៖ ជាមួយនឹងការរំពឹងទុក អំពីកញ្ចប់ជំនួយការពារជាតិលើកទី៤២របស់សហរដ្ឋអាមេរិក មានទំហំទឹកប្រាក់៨០០លានដុល្លារបន្ថែមទៀត ដោយរាប់បញ្ចូលទាំងគ្រាប់បែកចង្កោមបាញ់ជាមួយនឹងកាំភ្លើងផ្លោង Howitzer (ហូវីតហ្ស៊ឺ) ទំហំ១៥៥មិល្លីម៉ែត្រ រថយន្ដប្រយុទ្ធ រថយន្ដចម្បាំងដឹកកងទ័ព និង គ្រាប់រំសេវ សម្រាប់ប្រព័ន្ធបាញ់គ្រាប់រ៉ុក្កែតចម្រុះហាយម៉ាស ផងនោះ មេដឹកនាំក្រុងកៀវ កំពុងតែជំរុញដល់សហរដ្ឋអាមេរិក និង អង្គការណាតូ ផ្ដល់ជំនួយយន្ដហោះចម្បាំងដ៏ទំនើបផលិតនៅសហរដ្ឋអាមេរិក ប្រភេទ F-16 មកឲ្យប្រទេសអ៊ុយក្រែន។
សារព័ត៌មានរបស់សិង្ហបុរី បានចេញផ្សាយ នៅថ្ងៃសុក្រ ទី៧ ខែកក្កដា ថា មេដឹកនាំអ៊ុយក្រែន កំពុងតែជំរុញដល់បណ្ដាប្រទេសមហាអំណាចលោកខាងលិច និង អង្គការណាតូ ត្រូវតែផ្គត់ផ្គង់យន្ដហោះចម្បាំង ផលិតដោយលោកខាងលិច ជាពិសេស យន្ដហោះ F-16 មកជួយដល់រដ្ឋាភិបាលក្រុងកៀវ។ សកម្មភាពទាំងនេះ បានកើតឡើង ស្របពេលកម្លាំងទាហានការពារទឹកដីរបស់អ៊ុយក្រែន កំពុងតែបើកយុទ្ធនាការ វាយបក ទៅលើកម្លាំងទាហានរុស្ស៊ី ដើម្បីរំដោះទឹកដីរបស់ពួកគេ ត្រឡប់មកវិញ។
លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានផ្ដល់បទសម្ភាសន៍មួយ ដល់បណ្ដាញទូរទស្សន៍របស់អូស្ដ្រាលី ABC News កាលពីថ្ងៃព្រហស្បតិ៍ ថា «យន្ដហោះចម្បាំង ឬ ក៏គ្រឿងយុទ្ធភណ្ឌណាមួយ ដែលយើងកំពុងតែត្រូវការបន្ទាន់នោះ នឹងត្រូវផ្ដល់មកដល់យើង ឲ្យបានទាន់ពេលវេលា សម្រាប់ការវាយបករុលទៅមុខឲ្យបានលឿនបំផុត ដើម្បីសង្គ្រោះជីវិតមនុស្សបន្ថែមទៀត និង ដើម្បីឈរជើងឲ្យបានរឹងមាំ»។
ប្រទេសដាណាម៉ាក និង ហូល្លង់ដ៍ ក្លាយជាសមាជិករបស់អង្គការណាតូ កំពុងតែនាំមុខគេ នៅក្នុងកិច្ចខិតខំប្រឹងប្រែងរបស់សម្ពន្ធមិត្តអន្ដរជាតិ បណ្ដុះបណ្ដាលជំនាញបើកបរយន្ដហោះចម្បាំងរបស់លោកខាងលិច ដល់កងទ័ពអាកាសរបស់អ៊ុយក្រែន។ សកម្មភាពទាំងនេះ សម្រាប់ថែរក្សាយន្ដហោះចម្បាំង ហើយចុងក្រោយផ្ដល់យន្ដហោះ F-16 ដ៏ទំនើប ផលិត នៅសហរដ្ឋអាមេរិក ទៅដល់ប្រទេសអ៊ុយក្រែន។
សហរដ្ឋអាមេរិក បានផ្គត់ផ្គង់ជំនួយយោធា ទៅដល់កងទ័ពអ៊ុយក្រែន ចាប់តាំងពីការផ្ទុះសង្គ្រាម នៅថ្ងៃទី២៤ ខែកុម្ភៈ ឆ្នាំ២០២២ រហូតមកដល់ពេលនេះ កើនឡើងដល់៤០ពាន់លានដុល្លារ៕