រាជធានីបាងកក៖ ស្របពេលមានភាពមិនទាន់ប្រាកដប្រជា ជុំវិញការជ្រើសរើសមេដឹកនាំគណបក្សឆ្ពោះទៅមុខ សម្រាប់នាយករដ្ឋមន្ដ្រីថ្មីរបស់ប្រទេសថៃ នៅថ្ងៃទី១៣ ខែកក្កដា ខាងមុខនេះ គណបក្សរួបរួមជាតិថៃ (UTN) របស់លោកនាយករដ្ឋមន្ដ្រី ប្រាយុទ្ធ ចាន់-អូ-ចា និង គណបក្សភូមិចៃថៃ (Bhumjaithai) របស់លោក អានូទីន ឆានវីរ៉ាគូល (Anutin Charnvirakul) បានប្រឆាំងនឹងការបង្កើតរដ្ឋាភិបាលមតិភាគតិច។
សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃចន្ទ ទី១០ ខែកក្កដា ថា គណបក្សរួបរួមជាតិថៃ (UTN) និង គណបក្សភូមិចៃថៃ (Bhumjaithai) បានបញ្ចេញសំឡេង ប្រឆាំងនឹងការប៉ុនប៉ងណាមួយ ដើម្បីបង្កើតរដ្ឋាភិបាលមតិភាគតិច ស្របពេលការបោះឆ្នោតជ្រើសរើសនាយករដ្ឋមន្ដ្រីថ្មី នឹងចូលមកដល់ នៅថ្ងៃព្រហស្បតិ៍ (ទី១៣ ខែកក្កដា)។
លោក ភីរ៉ាផាន សាលីរ៉ាថាវីផាក (Pirapan Salirathavibhaga) មេដឹកនាំគណបក្សរួបរួមជាតិថៃ (UTN) បានបញ្ជាក់ តាមបណ្ដាញសង្គមហ្វេសប៊ុក ថា គណបក្សរបស់គាត់ នឹងមិនតែងតាំងលោកនាយករដ្ឋមន្ដ្រី ប្រាយុទ្ធ ចាន់-អូ-ចា (Prayut Chan-o-cha) ឬ ខ្លួនរបស់គាត់ផ្ទាល់ សម្រាប់បេក្ខភាពនាយករដ្ឋមន្ត្រី នឹងត្រូវសភាបោះឆ្នោត នៅថ្ងៃព្រហស្បតិ៍នោះឡើយ ព្រោះគណបក្សរបស់គាត់ មិនគាំទ្រ ដល់ការបង្កើតរដ្ឋាភិបាលភាគតិច។
លោកប្រធានបក្ស UTN បានសង្កត់ធ្ងន់ ថា គណបក្សរបស់គាត់ នឹងមិនបោះឆ្នោត ជ្រើសរើសបេក្ខជននាយករដ្ឋមន្ត្រី មកពីគណបក្សណាមួយ មានគោលនយោបាយ ផ្ទុយនឹងរដ្ឋធម្មនុញ្ញជាពិសេស នៅពេលគណបក្សនោះ ស្វះស្វែងរកការកែប្រែច្បាប់ ពាក់ព័ន្ធនឹងការប្រមាថព្រះមហាក្សត្រ និង សសរស្តម្ភដ៏សំខាន់ៗ ចំនួន៣របស់ប្រទេស រួមមាន ជាតិ សាសនា និង ព្រះមហាក្សត្រ។
លោកប្រធានគណបក្សរួបរួមជាតិថៃ បានបន្ថែម ថា គាត់បានចាត់ឱ្យលោក អេកាណា ប្រមផាន់ (Akanat Promphan) អគ្គលេខាធិការគណបក្ស UTN ត្រូវតែប្រកាន់ជំហរបែបនេះ សម្រាប់ការពិចារណារបស់គណបក្ស ហើយអនុម័តជាគោលការណ៍ សម្រាប់ដំណោះស្រាយ នៅក្នុងកិច្ចប្រជុំ នៅថ្ងៃអង្គារ។ កិច្ចប្រជុំនេះ នឹងត្រូវកំណត់នូវការប្ដេជ្ញា អំពីរបៀបដែលគណបក្ស នឹងត្រូវបោះឆ្នោតជ្រើសរើសនាយករដ្ឋមន្ដ្រី នៅថ្ងៃព្រហស្បតិ៍។
លោក ភីរ៉ាផាន សាលីរ៉ាថាវីផាក បានបន្ថែម ថា «នេះជាសារយ៉ាងច្បាស់ និង បង្ហាញ អំពីគោលជំហរដ៏ប្រាកដ ហើយនឹងមិនចាំបាច់ ទុកសម្រាប់ការបកស្រាយណាមួយនោះដែរ។ ការងាររបស់យើង ត្រូវតែការពារប្រទេស បញ្ចៀសពីគ្រោះមហន្តរាយ»។
លោក អានូទីន ឆានវីរ៉ាគូល (Anutin Charnvirakul) មេដឹកនាំគណបក្សភូមិចៃថៃ ហើយជាឧបនាយករដ្ឋមន្ដ្រី និង ជារដ្ឋមន្ដ្រីក្រសួងសុខាភិបាលសាធារណៈ នៅក្នុងរដ្ឋាភិបាលចាំផ្ទះរបស់លោក ប្រាយុទ្ធ បានបញ្ជាក់ ថា គណបក្សរបស់គាត់ បានបង្ហាញជំហរយ៉ាងច្បាស់ ថា គណបក្សនេះ នឹងមិនគាំទ្រដល់រដ្ឋាភិបាលមតិភាគតិច និង ការធ្វើវិសោធនកម្មរដ្ឋធម្មនុញ្ញ ពាក់ព័ន្ធនឹងច្បាប់ប្រមាថព្រះមហាក្សត្រ។
បើទោះជាយ៉ាងណា មេដឹកនាំគណបក្សភូមិចៃថៃ បានបដិសេធធ្វើអត្ថាធិប្បាយ លើយុទ្ធនាការរបស់មេដឹកនាំគណបក្សឆ្ពោះទៅមុខ (MFP) លោក ភីថា លីមចារឿនរ៉ាត (Pita Limjaroenrat) ពាក់ព័ន្ធនឹងការប្រមូលនូវការគាំទ្រ សម្រាប់ជួយដល់គាត់ ឲ្យក្លាយជានាយករដ្ឋមន្ត្រី ខណៈអ្នករិះគន់របស់គណបក្ស MFP ត្រូវគេមើលឃើញ ថា កំពុងតែដាក់សម្ពាធ ទៅលើព្រឹទ្ធសភា នៅមុនការបោះឆ្នោត នៅថ្ងៃព្រហស្បតិ៍។
លោក ភីថា លីមចារឿនរ៉ាត ជាបេក្ខភាពនាយករដ្ឋមន្ត្រី តែមួយគត់របស់គណបក្ស MFP ដោយមានសំឡេងគាំទ្រ ចំនួន៣១២ មកពីសមាជិកសភារបស់គណបក្សសម្ពន្ធភាព ចំនួន៨ ខណៈនៅខ្វះត្រឹមតែ៦៤សំឡេងប៉ុណ្ណោះ សម្រាប់ការក្លាយជានាយករដ្ឋមន្ដ្រី។ ជាមួយគ្នានេះ លោក ភីថា ក៏បានអំពាវនាវទៅកាន់ព្រឹទ្ធសភា ដើម្បីជួយដោះស្រាយបញ្ហាខ្វះសំឡេងគាំទ្រនេះ។
លោក អានូទីន បានបន្ថែម ថា ប្រធានសភា នឹងត្រូវសម្រេចចិត្ត ថា នឹងត្រូវតែធ្វើអ្វីបន្ទាប់ទៀត នៅក្នុងករណី លោក ភីថា មិនអាចប្រមូលនូវការគាំទ្រឲ្យបានគ្រប់គ្រាន់ ក្រោយការបោះឆ្នោត នៅជុំទី២។ បញ្ហានេះ គាត់មិនបានបំភិតបំភ័យ ចំពោះការរំពឹងទុក ក្រោយការបោះឆ្នោតជ្រើសរើសនាយករដ្ឋមន្ត្រី ដោយកត់សម្គាល់ ថា សមាជិកសភា និង សមាជិកព្រឹទ្ធសភា គួរតែមានសេរីភាព នៅក្នុងអនុវត្តន៍នូវការវិនិច្ឆ័យរបស់ពួកគេ។
នៅពេលសួរថា តើគណបក្សភូមិចៃថៃ នឹងចូលរួមជាមួយសម្ពន្ធភាពគណបក្សចម្រុះដែរទេ ប្រសិនបើគណបក្សភឿថៃ (Pheu Thai) ជាគណបក្សធំទី២ បានដឹកនាំបង្កើតក្រុមចម្រុះ? លោក អានូទីន បានអះអាង ថា វានឹងអាស្រ័យទៅលើគោលនយោបាយ និង គោលការណ៍ណែនាំ។ ប៉ុន្ដែឥឡូវនេះ វាមិនមែនជាពេលវេលា សម្រាប់ការពិចារណា អំពីរឿងនេះឡើយ៕
