រដ្ឋធានីកៀវ៖ ស្ពានតភ្ជាប់ពីឧបទ្វីបគ្រីមៀ ទៅកាន់ដីគោករបស់ប្រទេសរុស្ស៊ី ក្លាយជាផ្លូវដ៏សំខាន់ សម្រាប់កម្លាំងទាហាន និង ការដឹកជញ្ជូនអាវុធយុទ្ធភណ្ឌសំខាន់ៗ នៅក្នុងសង្គ្រាមឈ្លានពាន នៅក្នុងប្រទេសអ៊ុយក្រែន ប៉ុន្ដែស្ពាននេះ បានរងការវាយប្រហារ អស់រយៈពេលជាច្រើនខែកន្លងមកហើយ ហើយទើបតែពេលនេះ មន្ដ្រីជាន់ខ្ពស់ក្រុងកៀវ បានអះអាង អំពីឧបទ្ទវហេតុវាយប្រហារ ទៅលើស្ពាននោះ។
សារព័ត៌មានរបស់អូស្ដ្រាលី 9 News (ណាញញូស) បានចេញផ្សាយ កាលពីព្រឹក ថ្ងៃចន្ទ ទី១០ ខែកក្កដា ថា លោកស្រី ហានណា ម៉ាលីយ៉ា (Hanna Maliar) អនុរដ្ឋមន្ដ្រីក្រសួងការពារជាតិអ៊ុយក្រែន បានបញ្ចេញនូវអ្វីហាក់បីដូចជាការទទួលស្គាល់យ៉ាងច្បាស់បំផុត ថា កងកម្លាំងអ៊ុយក្រែន បានទទួលខុសត្រូវ ចំពោះការវាយប្រហារ កាលពីខែតុលា ឆ្នាំ២០២២ ទៅលើស្ពានតភ្ជាប់ពីដីគោករបស់រុស្ស៊ី មកកាន់ឧបទ្វីបគ្រីមៀ ដែលរដ្ឋាភិបាលក្រុងម៉ូស្គូ បានគ្រប់គ្រង ចាប់តាំងពីការដណ្តើមកាន់កាប់ឧបទ្វីបមួយនេះ នៅក្នុងអំឡុងឆ្នាំ២០១៤ រហូតមក។
លោកស្រី អនុរដ្ឋមន្ដ្រី បានបញ្ជាក់ នៅលើបណ្ដាញសង្គមតេឡេក្រាម ថា «លោកស្រី បានចុះបញ្ជីសមិទ្ធផលរបស់អ៊ុយក្រែន ចំនួន១២ ចាប់តាំងពីការចាប់ផ្តើមវាយលុកលុយទ្រង់ទ្រាយធំរបស់រុស្ស៊ី កាលពី៥០០ថ្ងៃមុន។ ប៉ុន្ដែកាលពី២៧៣ថ្ងៃមុននេះ យើងបានវាយប្រហារជាលើកដំបូង ទៅលើស្ពានគ្រីមៀ សម្រាប់រារាំងដល់ការដឹកជញ្ជូនរបស់ក្រុងមូស្គូ សម្រាប់ផ្គត់ផ្គង់ដល់ទាហានរុស្ស៊ី ដែលកំពុងតែឈ្លានពាន នៅលើទឹកដីរបស់អ៊ុយក្រែន»។
សារនៅលើបណ្ដាញសង្គមតេឡេក្រាមដដែលនោះ ក៏បានបញ្ជាក់ អំពីការវាយប្រហារទៅលើនាវាចម្បាំងដ៏ទំនើបបំផុតរបស់រុស្ស៊ី Moskva កាលពី៤៥១ថ្ងៃមុន និង ការរំដោះកោះពស់ កាលពី៣៧៣ថ្ងៃមុន។
ការវាយប្រហារលើស្ពាន Kerch (ឃើច) ឬ ស្ពានគ្រីមៀ មិនត្រឹមតែបង្កនូវការរំខាន ដល់ការដឹកជញ្ជូនដ៏សំខាន់ ពីដីគោករបស់រុស្ស៊ី មកកាន់ឧបទ្វីបគ្រីមៀ សម្រាប់បម្រើសកម្មភាពដល់ការវាយលុករបស់ទាហានរុស្ស៊ី នៅលើទឹកដីរបស់អ៊ុយក្រែន ប៉ុណ្ណោះទេ ប៉ុន្ដែវាថែមទាំងធ្វើឱ្យប៉ះទង្គិចផ្លូវចិត្ត សម្រាប់រដ្ឋាភិបាលក្រុងមូស្គូ ហើយវាក្លាយជាការឃោសនាដ៏ធំ សម្រាប់ក្រុងកៀវ ផងដែរ។ ការវាយប្រហារនេះ បានកើតឡើង ត្រឹមតែរយៈពេល១ថ្ងៃ នៃខួបកំណើត៧០ឆ្នាំរបស់លោកប្រធានាធិបតី ពូទីន ហើយក្រុមមន្ដ្រីអ៊ុយក្រែន បានបង្ហោះវីដេអូ ចំអកឲ្យ ថា រីករាយថ្ងៃកំណើតរបស់លោកប្រធានាធិបតី។
ការបង្ហោះសាររបស់លោកស្រីអនុរដ្ឋមន្ដ្រីក្រសួងការពារជិតអ៊ុយក្រែន នាំឲ្យមានការចាប់អារម្មណ៍ពីបណ្ដាញផ្សព្វផ្សាយរបស់រុស្ស៊ី និង ក្រុមមន្ដ្រីក្រុងមូស្គូ ខណៈលោកស្រី ម៉ារីយ៉ា ហ្សាខារ៉ូវ៉ា (Maria Zakharova) អ្នកនាំពាក្យ ក្រសួងការបរទេសរុស្ស៊ី បានហៅរដ្ឋាភិបាលរបស់លោកប្រធានាធិបតី ហ្សេឡែនស្គី ជារបបភេរវករ៕