រដ្ឋធានីវីលនីស៖ សង្គ្រាមរបស់ក្រុងមូស្គូ នៅលើទឹកដីរបស់អ៊ុយក្រែន បាន និង កំពុងតែបង្កនូវការភ័យខ្លាច ដល់បណ្ដាប្រទេសនានា នៅតំបន់អឺរ៉ុប ហើយមានប្រទេសខ្លះ បានរត់ទៅស្នើសុំចូលជាសមាជិករបស់អង្គការសន្ធិសញ្ញាអាត្លង់ទិកខាងជើង ហៅកាត់ ណាតូ (តាមភាសាអង់គ្លេស) ឬ អូតង់ (តាមភាសាបារាំង) ខណៈឥឡូវ តួកគី បានបើកភ្លើងខៀវ ដល់ប្រទេសស៊ុយអែត ឲ្យចូលរួមរស់ជាមួយនឹងអង្គការសម្ពន្ធមិត្តយោធាដ៏ខ្លាំងក្លារបស់ពិភពលោកមួយ ក្រោយពេលប្រទេសហ្វាំងឡង់ដ៍ បានក្លាយជាសមាជិកទី៣១ កាលពីខែមេសា ឆ្នាំ២០២៣កន្លងទៅ។
សារព័ត៌មានរបស់ចក្រភពអង់គ្លេស BBC បានផ្សាយ កាលពីព្រឹក ថ្ងៃអង្គារ ទី១១ ខែកក្កដា ថា លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការអង្គការណាតូ បានបញ្ជាក់ ថា លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី បានបើកភ្លើងខៀវ គាំទ្រដល់ប្រទេសស៊ុយអែត ឲ្យចូលជាសមាជិករបស់អង្គការសម្ពន្ធមិត្តយោធារបស់បស្ចិមលោក។ ដូច្នេះមេដឹកនាំតួកគី នឹងបញ្ជូនការស្នើសុំរបស់ប្រទេសស៊ុយអែត ទៅកាន់រដ្ឋសភាតួកគី ស្ថិតក្នុងរដ្ឋធានីអង់ការ៉ា ដើម្បីធានាដល់ការធ្វើសច្ចាប័ន បើកផ្លូវឲ្យប្រទេសណ័រឌិកមួយនេះ ក្លាយជាសមាជិកទី៣២របស់អង្គការណាតូ។
ជាមួយគ្នានេះដែរ លោក អូលីហ្វ គ្រីស្ទើសសុន (Ulf Kristersson) នាយករដ្ឋមន្ដ្រីស៊ុយអែត បានថ្លែង ថា «ខ្ញុំសប្បាយចិត្តយ៉ាងខ្លាំង ព្រោះវាជាថ្ងៃដ៏ល្អបំផុតមួយ សម្រាប់ស៊ុយអែត»។
កាលពីដំបូងឡើយ តួកគី បានរារាំងដល់ការដាក់ពាក្យស្នើសុំរបស់ស៊ុយអែត ចូលជាសមាជិករបស់អង្គការណាតូ អស់រយៈពេលជាច្រើនខែកន្លងមកហើយ ដោយរដ្ឋាភិបាលអង់ការ៉ា បានចោទប្រកាន់ ដល់រដ្ឋាភិបាលស្ដុកខុម (Stockholm) កំពុងតែផ្ដល់ជម្រកស្នាក់នៅ សម្រាប់កងជីវពលរបស់ជនជាតិឃឺដ (Kurd)។
តួកគី ជាសមាជិកមួយ នៅក្នុងចំណោមប្រទេសជាសមាជិកទាំង៣១របស់អង្គការណាតូ ទើបរដ្ឋាភិបាលក្រុងអង់ការ៉ា ប្រើប្រាស់សិទ្ធិវេតូ រារាំងដល់ប្រទេសថ្មីណាមួយចូលរួម នៅក្នុងអង្គការសម្ពន្ធមិត្តយោធាដ៏ខ្លាំងក្លារបស់បស្ចិមលោកមួយនេះ។ ប្រទេសហ្វាំងឡង់ដ៍ ក៏ធ្លាប់ត្រូវបានតួកគី រារាំងផងដែរ មុននឹងបានក្លាយជាសមាជិកទី៣១ផ្លូវការរបស់អង្គការណាតូកាលពីខែមេសា ឆ្នាំ២០២៣។ ប៉ុន្ដែឥឡូវនេះ ប្រទេសស៊ុយអែត បានទទួលសញ្ញាវិជ្ជមាន សម្រាប់ដំណើរឆ្ពោះទៅកាន់សមាជិកទី៣២របស់អង្គការយោធាមួយនេះ ក្រោយពេលមានកិច្ចព្រមព្រៀង រវាងក្រុងអង់ការ៉ា និង ក្រុងហែលស៊ីនគី (Helsinki) កាលពីល្ងាច ថ្ងៃចន្ទ។
ជាប្រតិកម្មទៅនឹងព័ត៌មានដ៏ល្អមួយនេះ លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ ថា គាត់ស្វាគមន៍ ចំពោះការប្តេជ្ញាចិត្តរបស់ប្រធានាធិបតីតួកគី លោក អេដូហ្គេន សម្រាប់ដំណើរការ«ផ្តល់សច្ចាប័នដ៏ឆាប់រហ័ស» នៅពេលនេះ។
សេតវិមានរបស់ប្រធានាធិបតីសហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍របស់ខ្លួន ថា «ខ្ញុំត្រៀមខ្លួនរួចរាល់អស់ហើយ សម្រាប់ធ្វើការជាមួយនឹងលោកប្រធានាធិបតី អេដូហ្គេន និង ប្រទេសតួកគី ដើម្បីពង្រឹងនូវកិច្ចការពារ និង ការទប់ស្កាត់ នៅក្នុងតំបន់អឺរ៉ុប-អាត្លង់ទិក (Euro-Atlantic)។ ខ្ញុំក៏ទន្ទឹងរង់ចាំស្វាគមន៍ ចំពោះលោកនាយករដ្ឋមន្ត្រី គ្រីស្ទើសសុន និង ប្រទេសស៊ុយអែត នឹងក្លាយជាសម្ពន្ធមិត្តរបស់អង្គការណាតូ»។
លោក អានណាឡែន ប៊ែរបក់ខ៍ (Annalen Baerbock) រដ្ឋមន្ដ្រី ក្រសួងការបរទេសអាល្លឺម៉ង បានបញ្ជាក់ នៅលើបណ្ដាញសង្គមធ្វីធើរ ថា «ណាតូនឹងសមាជិកទី៣២ ហើយយើងធ្វើរួមគ្នា យើងនឹងមានសុវត្ថិភាព»។
ទន្ទឹមគ្នានេះ លោក រីស៊ី ស៊ូណាក់ (Rishi Sunak) នាយករដ្ឋមន្ដ្រីចក្រភពអង់គ្លេស បានថ្លែង ថា ការចូលរួមរបស់ស៊ុយអែត ជាមួយនឹងអង្គការណាតូ នឹងធ្វើឲ្យយើងទាំងអស់គ្នា កាន់តែមានសុវត្ថិភាពបន្ថែមទៀត។
លោក ជេនស៍ ស្ដូលថែនប៊ឺគ ប្រមុខអង្គការណាតូ បានប្រកាស ថា កិច្ចព្រមព្រៀង កាលពីល្ងាច ថ្ងៃចន្ទ នេះ បានកើតឡើង ក្រោយពេលមានការចរចាគ្នា រវាងប្រធានាធិបតីតួកគី និង មេដឹកនាំស៊ុយអែត នៅក្នុងរដ្ឋធានីវិលនីស (Vilnius) ប្រទេសលីទុយអានី (Lithuanian) ជាកន្លែងដែលអង្គការណាតូ បើកកិច្ចប្រជុំកំពូលរបស់ខ្លួន។ កិច្ចប្រជុំកំពូលរបស់មេដឹកនាំកំពូលរបស់បណ្ដាប្រទេសជាសមាជិកអង្គការណាតូ នេះ នឹងផ្ដោតយ៉ាងសំខាន់បំផុត សម្រាប់គាំទ្រដល់ប្រទេសអ៊ុយក្រែន នៅក្នុងការធ្វើសង្គ្រាមទប់ទល់នឹងការឈ្លានពានរបស់រុស្ស៊ី។
ប្រទេសស៊ុយអែត និង ហ្វាំងឡង់ដ៍ ដែលមានព្រំដែនប្រវែង១៣៤០គីឡូម៉ែត្រ ជាប់ជាមួយនឹងរុស្ស៊ី ធ្លាប់តែប្រកាន់ខ្ជាប់នូវគោលនយោបាយអព្យាក្រឹតភាព អស់រយៈពេលជាច្រើនទសវត្សរ៍កន្លងមកហើយ។ ប៉ុន្ដែប្រទេសណ័រឌិកទាំង២នេះ (Nordic ឬ Norden ជាតំបន់ភូមិសាស្ដ្រ និង វប្បធម៌ នៅតំបន់អឺរ៉ុបខាងជើង និង អាត្លង់ទិកខាងជើង ដោយរាប់បញ្ចូលទាំងរដ្ឋអធិបតេយ្យភាព ដូចជា ដាណាម៉ាក ហ្វាំងឡង់ដ៍ ន័រវ៉ែស ហើយដែនដីស្វ័យភាពកោះហ្វារ៉ូ (Faroe) និង ហ្គ្រីនឡែនដ៍ ( Greenland) ព្រមទាំងតំបន់ស្វ័យភាពអាឡែនដ៍ «Åland» ) បានបោះបង់ចោលនូវគោលនយោបាយរបស់ខ្លួន ហើយបានដាក់ពាក្យស្នើសុំ ចូលជាសមាជិករបស់អង្គការណាតូ នៅក្នុងខែឧសភា ឆ្នាំ២០២២ ក្រោយពេលរុស្ស៊ី បានលើកទ័ពចូលឈ្លានពាន នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។ ប្រទេសហ្វាំងឡង់ដ៍ បានក្លាយជាសមាជិកទី៣១របស់អង្គការណាតូ ជាផ្លូវការ នៅក្នុងខែមេសា ឆ្នាំ២០២៣៕