រដ្ឋធានីកៀវ៖ ក្រោយការដណ្ដើមកាន់កាប់ឧបទ្វីបគ្រីមៀ (Crimea) ដោយគ្មានការបង្ហូរឈាម កាលពីអំឡុងឆ្នាំ២០១៤នោះមក រដ្ឋាភិបាលក្រុងមូស្គូ បានសាសង់ស្ពាន តភ្ជាប់ពីដីគោករបស់ប្រទេសរុស្ស៊ី មកកាន់ឧបទ្វីបនេះ ហើយមេដឹកនាំវិមានក្រឹមឡាំង ក៏បានទៅសម្ពោធស្ពានដ៏វវែងនៅតំបន់អឺរ៉ុបមួយនេះ ដោយផ្ទាល់ ប៉ុន្ដែឥឡូវ ស្ពាននោះ បានរងនូវការវាយប្រហារជាថ្មីទៀត រហូតធ្វើឲ្យក្រុមមន្ដ្រីរបស់លោក ពូទីន ខឹងសម្បាយ៉ាងខ្លាំង និង បានចោទប្រកាន់ទៅលើកងកម្លាំងពិសេសរបស់អ៊ុយក្រែន ជាអ្នកនៅពីក្រោយ។
សារព័ត៌មាន Al Jazeera បានចេញផ្សាយ កាលពីរសៀល ថ្ងៃចន្ទ ទី១៧ ខែកក្កដា ថា បើតាមសេចក្ដីរាយការណ៍ ដោយមិនបានបញ្ជាក់ អំពីអត្ដសញ្ញា បានអះអាង ថា សំឡេងបំផ្ទុះ បានលាន់ឮ កាលពីព្រឹក ថ្ងៃចន្ទ។ ឧបទ្ទវហេតុនោះ បានបណ្ដាលឲ្យមនុស្សចំនួន៣នាក់ រងគ្រោះថ្នាក់ ហើយក្នុងនោះមានកូនស្រីម្នាក់រងរបួស ខណៈឪពុក និង ម្ដាយ បានបាត់បង់ជីវិត។
លោក វ្ល៉ាឌីមៀ កុនស្ដានទីណូវ (Vladimir Konstantinov) ប្រធានក្រុមប្រឹក្សារដ្ឋគ្រីមៀ លើកបន្ដុប ដោយរុស្ស៊ី បានអះអាង ថា ការវាយប្រហារមកលើស្ពាន Kerch (ឃើច) ឬ ស្ពានគ្រីមៀ ត្រូវបានបង្កឡើង ដោយរបបភេរវកររបស់អ៊ុយក្រែន។
បើតាមប្រភពព័ត៌មានមួយផ្សេងទៀត ពីទីភ្នាក់ងារសន្ដិសុខអ៊ុយក្រែន បានប្រាប់ដល់បណ្ដាញទូរទស្សន៍ BBC ថា ជនជាតិរុស្សី ជាអ្នកស្ថិតនៅពីក្រោយការវាយប្រហារ ដោយការប្រើប្រាស់ដ្រូនរត់លើផ្លូវទឹក។ ចំណែកផ្លូវថ្នល់ នៅលើស្ពាននេះ បានបិទ ប៉ុន្ដែផ្លូវរថភ្លើង នៅតែដំណើរការដដែល។
ស្ពានគ្រីមៀ ត្រូវបានលោកប្រធានាធិបតី ពូទីន ទៅសម្ពោធដោយផ្ទាល់ និង បានដាក់ឲ្យប្រើប្រាស់ នៅក្នុងអំឡុងឆ្នាំ២០១៨។ ស្ពានមួយនេះ បានសាងសង់ សម្រាប់ផ្លូវរថយន្ដ និង ផ្លូវរថភ្លើង ធ្វើដំណើរទៅមក ដោយតភ្ជាប់ពីដីគោករបស់ប្រទេសរុស្ស៊ី មកកាន់ឧបទ្វីបគ្រីមៀ។ ប៉ុន្ដែស្ពានគ្រីមៀនេះ បានបិទលែងដំណើរការមួយរយៈ កាលពីខែតុលា ឆ្នាំ២០២២ ក្រោយការបំផ្ទុះដ៏ធំមួយ បានបង្កឲ្យមានអណ្ដាតភ្លើង ឆាបឆេះលើរថភ្លើងដឹកប្រេង ហើយទើបតែនឹងបើកឲ្យដំណើរការឡើងវិញ កាលពីខែកុម្ភៈ ឆ្នាំ២០២៣។
ដោយឡែក ទីភ្នាក់ងារសន្តិសុខអ៊ុយក្រែន បានចេញសេចក្តីថ្លែងការណ៍ជាផ្លូវការមួយ ទាក់ទងនឹងការវាយប្រហារ ទៅលើស្ពាន Kerch នោះដែរ។ ប៉ុន្ដែពួកគេមិនបានទទួលស្គាល់ អំពីការជាប់ពាក់ព័ន្ធណាមួយនោះឡើយ។ ចំណែកព័ត៌មានលម្អិតទាំងអស់ ទាក់ទងនឹងការបំផ្ទុះស្ពាននេះ នឹងត្រូវប្រកាស ក្រោយពេលទទួលជ័យជម្នះ។
បើតាមទម្លាប់ជាធម្មតារបស់រដ្ឋាភិបាលអ៊ុយក្រែន តែងតែមិនទទួលស្គាល់ ដោយចំហ អំពីការជាប់ពាក់ព័ន្ធរបស់ខ្លួន នៅក្នុងការវាយប្រហារបែបនេះ។ ក្រុងកៀវ តែងតែផ្តល់សេចក្តីថ្លែងការណ៍មិនច្បាស់លាស់ ដែលបង្ហាញ ថា កងកម្លាំងអ៊ុយក្រែន អាចនៅពីក្រោយសកម្មភាពទាំងនេះ។
លោកស្រី ម៉ារៀ ហ្សាខារ៉ូវ៉ា (Maria Zakharova) អ្នកនាំពាក្យ ក្រសួងការបរទេសរុស្ស៊ី បានអះអាង ថា អ៊ុយក្រែន ស្ថិតនៅពីក្រោយការវាយប្រហារនេះ។ រីឯទីភ្នាក់ងារចារកម្មរបស់សហរដ្ឋអាមេរិក និង ចក្រភពអង់គ្លេស ជាអ្នកជំនួយការ ជួយដល់រដ្ឋាភិបាលក្រុងកៀវ។ ប៉ុន្ដែលោកស្រី មិនបានបង្ហាញភស្ដុតាងដ៏ជាក់លាក់ណាមួយនោះឡើយ។
លោកស្រី អ្នកនាំពាក្យ ក្រសួងការបរទេសរុស្ស៊ី បានបញ្ជាក់ ថា «ការសម្រេចចិត្តនានា ត្រូវបានសម្រេចឡើង ដោយក្រុមមន្ដ្រីអ៊ុយក្រែន និង ពួកយោធា ជាមួយនឹងការចូលរួម ដោយផ្ទាល់ ពីក្រុមទីភ្នាក់ងារចារកម្មរបស់សហរដ្ឋអាមេរិក និង អង់គ្លេស ហើយអ្នកនយោបាយ។ សហរដ្ឋអាមេរិក និង ចក្រភពអង់គ្លេស ជាអ្នកទទួលខុសត្រូវ លើរចនាសម្ព័ន្ធរដ្ឋភេរវករ»។
គណៈកម្មាធិការជាតិប្រឆាំងនឹងភេរវកម្មរបស់រុស្ស៊ី បានអះអាង ថា ការវាយប្រហារនេះ បានបណ្ដាលឲ្យខូចខាតស្ពាន និង បានសម្លាប់មនុស្សចំនួន២នាក់។ សកម្មភាពទាំងនេះ ត្រូវបានវាយប្រហារ ដោយដ្រូនរត់លើផ្ទៃទឹករបស់កងទ័ពជើងទឹកអ៊ុយក្រែន។ រីឯអាជ្ញាធរ កំពុងតែជំរុញឲ្យស៊ើបអង្កេត អំពីការវាយប្រហារអំពើភេរវកម្មនេះ។
បើតាមសារព័ត៌មាន នៅក្នុងស្រុក បានរាយការណ៍ ថា ការបំផ្ទុះស្ពានគ្រីមៀ បានកើតឡើង កាលពីវេលារំលងអធ្រាត្រ៕