រដ្ឋធានីកៀវ៖ រហូតមកដល់ពេលនេះ មេដឹកនាំក្រុងកៀវ កំពុងតែគិតពិចារណាឡើងវិញ អំពីយុទ្ធសាស្ដ្ររបស់ខ្លួន ក្រោយពេលការបញ្ជូនគ្រឿងយុទ្ធោបករណ៍ជាច្រើនទៅកាន់សមរភូមិ បានរងការខូចខាត អស់ចំនួន២០ភាគរយ ហើយអ៊ុយក្រែន បានសម្រេចចិត្ត វាយបកយឺតៗ ដើម្បីកាត់បន្ថយនូវការខាតបង់ ខណៈកម្លាំងទាហានរុស្ស៊ី ក៏បានបាត់បង់រថចម្បាំង ជាង១ម៉ឺនគ្រឿង និង គ្រឿងសឹកយ៉ាងច្រើនផងដែរ។
សារព័ត៌មាន Euronews បានចេញផ្សាយ កាលពីថ្ងៃចន្ទ ទី១៧ ខែកក្កដា ដោយបានដកស្រង់ប្រភពពីសារព័ត៌មានរបស់សហរដ្ឋអាមេរិក New York Times រាយការណ៍ ថា អ៊ុយក្រែន បានបាត់បង់គ្រឿងសព្វាវុធ និង រថចម្បាំងរបស់ខ្លួន ប្រហែល២០ភាគរយ នៅលើសមរភូមិប្រយុទ្ធជាមួយនឹងកម្លាំងទាហានរុស្ស៊ី។ គ្រឿងយុទ្ធភណ្ឌទាំងនេះ បានរងនូវការខូចខាត និង ត្រូវបានកម្ទេចចោលពីគូសត្រូវ នៅក្នុងរយៈពេលប៉ុន្មានសប្ដាហ៍ នៃយុទ្ធនាការវាយបករបស់រដ្ឋាភិបាលក្រុងកៀវ។
ជាមួយនឹងការខូចខាតគ្រឿងសឹកដ៏ច្រើនបែបនេះ ទើបក្រុមមន្ដ្រីជាន់ខ្ពស់របស់អ៊ុយក្រែន ពិចារណាឡើងវិញ អំពីយុទ្ធសាស្ដ្ររបស់ខ្លួន ហើយសម្រេចចិត្ត វាយបករុលទៅយឺតៗ ដើម្បីកាត់បន្ថយនូវការខូចខាតដល់កម្លាំងទ័ព និង គ្រឿងយុទ្ធោបករណ៍។
ស្របគ្នានេះដែរ លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន ក៏បានស្វាគមន៍ដល់ប្រធានាធិបតីកូរ៉េខាងត្បូង លោក យូន ស៊ុក-យូល (Yoon Suk-Yeol) ធ្វើដំណើរមកកាន់រដ្ឋធានីកៀវ កាលពីថ្ងៃសៅរ៍ ចុងសប្ដាហ៍កន្លងទៅនេះ។ លោកប្រធានាធិបតី ហ្សេឡែនស្គី បានសង្កត់ធ្ងន់ទៅលើសារៈសំខាន់របស់ជំនួយបរទេស ខណៈក្រុមមន្ត្រីអ៊ុយក្រែន បានជួបពិភាក្សាជាមួយប្រទេសចំនួន២០ នៅក្នុងរយៈពេលពីរសប្តាហ៍ដំបូង នៃខែកក្កដានេះ។
លោកប្រធានាធិបតី ហ្សេឡែនស្គី បានសង្កត់ធ្ងន់ ថា «ឥឡូវនេះ ល្បឿនសម្រាប់ការបញ្ចប់សង្គ្រាម គឺអាស្រ័យដោយផ្តាល់លើការគាំទ្រជាសកលរបស់បណ្ដាប្រទេសផ្សេងៗ សម្រាប់អ៊ុយក្រែន។ យើងកំពុងតែធ្វើអ្វីគ្រប់យ៉ាង តាមតែអាចធ្វើទៅបាន ដើម្បីធានា ថា ការគាំទ្របែបនេះ នឹងពឹងផ្អែកខ្លាំង និង មានអត្ថន័យតាមដែលអាចធ្វើទៅបាន»។
ដោយឡែក បណ្ដាញទូរទស្សន៍អារ៉ាប់អន្ដរជាតិ Alarabiya បានផ្សាយ នៅថ្ងៃចន្ទ នេះដែរ ថា ថា បើតាម Oryx ជាប្លុកយោធា ជាអ្នកកត់ត្រា អំពីការបាត់បង់គ្រឿងយុទ្ធោបករណ៍របស់ភាគីជម្លោះទាំងសងខាង គឺរុស្ស៊ី និង អ៊ុយក្រែន បានអះអាង ថា ទាហានរុស្ស៊ី បានបាត់បង់សម្ភារៈយោធា និង រថចម្បាំង ជាង ១១ ០០០គ្រឿង ចាប់តាំងពីការចាប់ផ្ដើមវាយលុក នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។
ប្លុកយោធា Oryx បានរាយការណ៍ ថា ជាសរុបមក រុស្ស៊ី បានបាត់បង់ រថចម្បាំង ចំនួន ១១ ១៤៦គ្រឿង ដោយក្នុងនោះ មានចំនួន ៧ ៤៥៩គ្រឿង ត្រូវបានកម្ទេចចោល, ចំនួន ៤២៥គ្រឿង បានរងការខូចខាត, ចំនួន ៤២២គ្រឿង ត្រូវបោះបង់ចូល និង ចំនួន ២ ៨៤០គ្រឿង ត្រូវបានភាគីអ៊ុយក្រែន រឹបអូសយក។
ក្រៅពីនេះ ទាហានរុស្ស៊ី បានបន្ដបាត់បង់រថក្រោះ ចំនួន ២ ១៣៦គ្រឿង ដោយក្នុងនោះ មានចំនួន ១ ៣៥២គ្រឿង ត្រូវបានកម្ទេច, ចំនួន ១២១គ្រឿង ខូចខាត, ចំនួន ១២១ ត្រូវបោះបង់ចោល និង ចំនួន ៥៤៨គ្រឿង ត្រូវបានរឹបអូស។ រថក្រោះទាំងនោះ រួមដូចជា មូដែល T-62M (តេ-៦២អឹម), T-62MV (តេ-62 អឹមវី), T-64A, T-64BV, T-72A, T-72B, T-72BA, T-72B3, T-80BV, T-80U, T-80BVM, T-90A, និង T-90M។ បន្ថែមពីលើនេះ ទាហានរុស្ស៊ី ក៏បានបន្ដបាត់បង់យន្ដហោះចម្បាំង ឧទ្ធម្ភាគចក្រ និង នាវាចម្បាំងយ៉ាងច្រើន ស្របពេលរថយន្ដចម្បាំងផ្សេងៗទៀត ត្រូវបានអ៊ុយក្រែន ចាប់បាន និង បាញ់កម្ទេចចោល នៅលើសមរភូមិ រួមមាន រថយន្ដឈ្លបយកការណ៍ BRM-1(K), BRDM-2, MT-LB, MT-LBVM and MT-LBVMK, MT-LB និង MT-LBu …ជាដើម៕
