រាជធានីបាងកក៖ ថ្វីបើការបោះឆ្នោតជុំទី១ នៅក្នុងសភា កាលពីថ្ងៃទី១៣ ខែកក្កដា មេដឹកនាំគណបក្សឆ្ពោះទៅមុខ មិនទទួលបានសំឡេងគាំទ្រគ្រប់គ្រាន់ ក្លាយជានាយករដ្ឋមន្ដ្រី យ៉ាងណាក្ដី ប៉ុន្ដែមេដឹកនាំគណចម្រុះទាំង៨គណបក្សនេះ កំពុងតែបន្ដស្វះស្វែងវិធីសាស្ដ្រថ្មីបន្ថែមទៀត សម្រាប់បង្កើតរដ្ឋាភិបាលថ្មីរបស់ប្រទេសថៃ។
សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃចន្ទ ទី១៧ ខែកក្កដា ឆ្នាំ២០២៣ ថា បើតាមប្រភពដ៏ជិតស្និទ្ធ ជាប់ពាក់ព័ន្ធនឹងរឿងរ៉ាវនេះ បានអះអាង ថា មេដឹកនាំរបស់គណបក្សសម្ពន្ធភាពទាំង៨គណបក្ស កំពុងតែស្វះស្វែង បង្កើតរដ្ឋាភិបាលថ្មី។ គណបក្សប្រឆាំងទាំងនេះ ដឹកនាំដោយគណបក្សឆ្ពោះទៅមុខ គ្រោងនឹងពិភាក្សាគ្នា អំពីសកម្មភាពទាំងនេះ នៅថ្ងៃចន្ទ ពោលគឺនៅមុនការបោះឆ្នោតជុំទី២ សម្រាប់ការជ្រើសរើសនាយករដ្ឋមន្ដ្រី នៅថ្ងៃពុធ ទី១៩ ខែកក្កដា។
ប្រភពដដែល បានបន្ដ ថា កិច្ចប្រជុំរបស់គណបក្សទាំង៨នេះ មុនដំបូង គ្រោងនឹងធ្វើឡើង នៅថ្ងៃអង្គារ ប៉ុន្ដែពួកគេក៏បានព្រមព្រៀងគ្នា បន្ថយថ្ងៃ មករៀបចំពិភាក្សា នៅថ្ងៃចន្ទនេះវិញ ដោយសារតែគណបក្សមួយចំនួនរបស់ដៃគូចម្រុះទាំងនេះ គ្រោងនឹងបើកកិច្ចប្រជុំកិច្ចផ្ទៃក្នុងរបស់គណបក្សខ្លួន នឹងត្រូវធ្វើឡើង នៅថ្ងៃអង្គារដែរ។
ប្រភពដដែល បានបន្ដ ថា ប្រសិនបើករណី លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (Move Forward) ហៅកាត់ MFP នៅតែមិនទទួលបានសំឡេងគាំទ្រគ្រប់គ្រាន់ ពីសមាជិកសភា និង ព្រឹទ្ធសភា នៅក្នុងការបោះឆ្នោតជុំទី២ សម្រាប់ការក្លាយជានាយករដ្ឋមន្ត្រី បន្ដទៀតនោះ គណបក្សភឿថៃ ដែលមានសមាជិកសភាច្រើនលំដាប់លេខ២ អាចនឹងត្រូវគេអនុញ្ញាតឱ្យដឹកនាំការបង្កើតរដ្ឋាភិបាលបន្ទាប់ ដោយមានការគាំទ្រ មកពីគណបក្សចម្រុះចំនួន៧ផ្សេងទៀត។
លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ បានបញ្ជាក់ នៅក្នុងឃ្លីបវីដេអូមួយ នៅលើបណ្ដាញសង្គម កាលពីថ្ងៃសុក្រ ទី១៤ ខែកក្កដា ថា ប្រសិនបើគាត់នៅតែបន្ដមិនអាចទទួលបានសំឡេងគាំទ្រគ្រប់គ្រាន់ ពីសភា សម្រាប់ការក្លាយជានាយករដ្ឋមន្ត្រី នៅក្នុងការបោះឆ្នោតជុំទី២នោះ គាត់នឹងបោះបង់ចោលនូវការឈរឈ្មោះនេះ ហើយបើកភ្លើងខៀវ ដល់គណបក្សភឿថៃ ដឹកនាំនូវការបង្កើតរដ្ឋាភិបាល ។
នៅពេលស្នើសុំការអត្ថាធិប្បាយ លើការអះអាង ថា លោក ស្រេតថា ថាវីស៊ីន (Srettha Thavisin) ជាបេក្ខជននាយករដ្ឋមន្ត្រីមួយរូប នៅក្នុងចំណោមបេក្ខជននាយករដ្ឋមន្ត្រី ចំនួន៣រូបរបស់គណបក្សភឿថៃ អាចនឹងត្រូវតែងតាំង ឲ្យឈរឈ្មោះ សម្រាប់តំណែងនាយករដ្ឋមន្ត្រី នៅក្នុងការបោះឆ្នោតជុំទី២នោះ លោក ភូមថាម វេឆាយ៉ាឆៃ (Phumtham Wechayachai) អគ្គលេខាធិការគណបក្សភឿថៃ បានបញ្ជាក់ កាលពីថ្ងៃអាទិត្យ ថា គណបក្សភឿថៃ អាចនឹងត្រូវតែងតាំងបេក្ខជនរបស់ខ្លួន សម្រាប់ការបោះឆ្នោតជុំទី២នេះ ប្រសិនបើគណបក្សចម្រុះ ចំនួន៧ផ្សេងទៀត ផ្តល់ភ្លើងខៀវឲ្យ។
លោក ភូមថាម បានឆ្លើយតាមនឹងការសាកសួរ ជុំវិញផែនការរបស់គណបក្សឆ្ពោះទៅមុខ ដើម្បីធ្វើវិសោធនកម្ម លើមាត្រា ២៧២ នៃរដ្ឋធម្មនុញ្ញ ដើម្បីដកសិទ្ធិអំណាចរបស់ព្រឹទ្ធសភា ចូលរួម នៅក្នុងការបោះឆ្នោតជ្រើសរើសនាយករដ្ឋមន្ដ្រី ថា គណបក្សភឿថៃ និង គណបក្សឆ្ពោះទៅមុខ នៅមិនទាន់ឈានដល់កិច្ចព្រមព្រៀងជាមួយគ្នា លើបញ្ហានេះទេ។ ករណីនេះ ក៏នឹងអាចលើកយកមកពិភាក្សាគ្នា នៅក្នុងកិច្ចប្រជុំរបស់គណបក្សចម្រុះទាំង៨ នៅថ្ងៃចន្ទ។
លោកអគ្គលេខាធិការគណបក្សភឿថៃ បានបញ្ជាក់ ថា ប្រសិនបើគណបក្សឆ្ពោះទៅមុខ នៅតែទទូចបន្ដស្នើសុំ តែងតាំងលោក ភីថា លីមចារឿនរ៉ាត សម្រាប់ការឈរឈ្មោះជាថ្មីនោះ គណបក្សភឿថៃ នឹងត្រូវតែពន្យល់ អំពីរបៀបដែលគណបក្សនេះ មានគម្រោងប្រមែប្រមូលសំឡេងគាំទ្រឲ្យគ្រប់គ្រាន់ សម្រាប់ជួយគាត់ ជាពិសេស ការគាំទ្រ មកពីសមាជិកព្រឹទ្ធសភាចំនួន២៥០នាក់ នៅក្នុងការបោះឆ្នោតជុំទីពីរ។ ដូច្នេះបញ្ហានេះ នឹងត្រូវតែមានចម្លើយច្បាស់លាស់ នៅមុនការបោះឆ្នោតជុំទី២ នៅថ្ងៃពុធ ទី១៩ ខែកក្កដា។
លោក ភីថា លីមចារឿនរ៉ាត មេដឹកនាំគណបក្សឆ្ពោះទៅមុខ បានខកខាន មិនអាចប្រមូលសំឡេងគាំទ្រឲ្យគ្រប់គ្រាន់ ពីសភា សម្រាប់ជួយឲ្យគាត់ កាន់កាប់តំណែងនាយករដ្ឋមន្ត្រី នៅក្នុងការបោះឆ្នោតជុំទី១ កាលពីថ្ងៃព្រហស្បតិ៍ ទី១៣ ខែកក្កដា។ មាត្រាទី១១២ នៃក្រមព្រហ្មទណ្ឌ ត្រូវគេបានស្គាល់ ថា ជាច្បាប់ពាក់ព័ន្ធនឹងការប្រមាថព្រះមហាក្សត្រនោះ ក៏ត្រូវបានគណបក្សរបស់គាត់ មានគម្រោងធ្វើវិសោធនកម្មនោះ ក៏នឹងក្លាយជាមូលហេតុចម្បង សម្រាប់ជំរុញឲ្យសមាជិកព្រឹទ្ធសភាជាច្រើន បដិសេគាំទ្រដល់ការតែងតាំងគាត់ ជានាយករដ្ឋមន្ដ្រី។
ក្រោមច្បាប់រដ្ឋធម្មនុញ្ញថៃ ចែងថា នាយករដ្ឋមន្ដ្រី ត្រូវតែទទួលបានសំឡេងគាំទ្រ យ៉ាងតិច ៣៧៦នាក់ ពីក្នុងចំណោមសមាជិកសភា ៥០០នាក់ និង សមាជិកព្រឹទ្ធសភា ចំនួន២៥០នាក់។ ប៉ុន្ដែបច្ចុប្បន្ន សម្ពន្ធមិត្តចំនួន៨គណបក្ស ដឹកនាំដោយគណបក្សឆ្ពោះទៅមុខ មានសមាជិកសភាសរុប ៣១២នាក់ នៅក្នុងរដ្ឋសភា ឬសភាជាន់ទាប។
សភាទាំង២របស់ប្រទេសថៃ កាលពីថ្ងៃព្រស្បតិ៍ ទី១៣ ខែកក្កដា បានប្រជុំរួម និង បោះឆ្នោតជ្រើសរើសនាយករដ្ឋមន្ត្រីថ្មី។ ប៉ុន្ដែលោក ភីថា លីមចារឿនរ៉ាត ប្រធានគណបក្សឆ្ពោះទៅមុខ ទទួលបានសំឡេងគាំទ្រមិនគ្រប់គ្រាន់ តាមច្បាប់កំណត់ សម្រាប់តំណែងនាយករដ្ឋមន្ដ្រីថៃ។
មេដឹកនាំគណបក្សឆ្ពោះទៅមុខ លោក ភីថា ត្រូវការសំឡេងគាំទ្រ យ៉ាងតិចបំផុតចំនួន៣៧៥សំឡេង មកពីក្នុងចំណោមសមាជិកសភា ចំនួន៥០០នាក់ និង សមាជិកព្រឹទ្ធសភា ចំនួន២៥០នោះ ខណៈឥឡូវសមាជិកព្រឹទ្ធសភា នៅសល់តែ ចំនួន២៤៩នាក់ ដោយសារសមាជិកព្រឹទ្ធសភាម្នាក់ បានលាលែងពីតំណែង នៅមុនថ្ងៃបោះឆ្នោតនាយករដ្ឋមន្ដ្រី ត្រឹមតែ១ថ្ងៃ។ នៅក្នុងចំណោមសមាជិកសភាទាំង២នោះ បានចូលរួមបោះឆ្នោតគាំទ្រលោក ភីថា ឲ្យធ្វើជានាយករដ្ឋមន្ដ្រី ត្រឹមតែចំនួន៣២៤សំឡេង ដោយរួមបញ្ចូលទាំងសមាជិកព្រឹទ្ធសភា ចំនួន១៣សំឡេងផងដែរ។ រីឯសំឡេងប្រឆាំង មានចំនួន១៨២សំឡេង និង អនុបវាទ ចំនួន១៩៩សំឡេង។
សភារបស់ប្រទេសថៃ គ្រោងនឹងរៀបចំការបោះឆ្នោតជាថ្មី នៅសប្តាហ៍នេះ។ បេក្ខជនដដែល នឹងនៅតែអាចឈរឈ្មោះជាម្ដងទៀត ឬ ក៏បេក្ខជនផ្សេង ត្រូវបានតែងតាំងឱ្យចូលរួមប្រជែងតំណែងកំពូលមួយនេះ។ រីឯនីតិវិធីរបស់សភា នឹងត្រូវធ្វើឡើង រហូតទាល់តែមានបេក្ខជនណាម្នាក់ ទទួលបានសំឡេងគាំទ្រគ្រប់គ្រាន់ ដោយមិនបានកំណត់ពីចំនួន នៃការបោះឆ្នោត ឬ កាលបរិច្ឆេទផុតកំណត់នោះទេ៕
