រដ្ឋធានីប៉េកាំង៖ ក្រោយអវត្ដមានរយៈពេលយូររបស់ប្រមុខការទូតចិន នោះមក លោក បូហ្ស៊ីយួ (Bo Zhiyue) ជាសាស្ដ្រាចារ្យ និង ជាស្ថាបនិក ហើយក៏ជាប្រធានវិទ្យាស្ថាន Bo Zhiyue China ព្រមទាំងជាអ្នកតាមដាននយោបាយ បានអះអាង ថា ការបាត់មុខ រយៈពេលយូររបស់ប្រមុខការទូតចិន នឹងគូសបញ្ជាក់ អំពីបញ្ហាធ្ងន់ធ្ងរ សម្រាប់ប្រធានាធិបតីចិន លោក ស៊ី ជិនពីងXi Jinping)។
សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី២០ ខែកក្កដា ថា លោក គិន គាង (Qin Gang) រដ្ឋមន្ត្រីក្រសួងការបរទេសចិន មិនបានបង្ហាញខ្លួនជាសាធារណៈ អស់រយៈពេលជាង៣សប្តាហ៍កន្លងមកហើយ។ អវត្ដមានរបស់ប្រមុខការទូតរូបនេះ បានបង្កឱ្យមានការលើកឡើងខុសៗគ្នា ទាំងនៅក្នុង និង ក្រៅប្រទេសចិន អំពីទីកន្លែងលាក់ខ្លួនរបស់គាត់។ ជាមួយនឹងអវត្តមានដ៏យូររបស់លោករដ្ឋមន្ត្រីការបរទេសចិន នឹងបង្កការពិបាក សម្រាប់លោកប្រធានាធិបតី ស៊ី ជិនពីង សម្រាប់គម្រោងរបស់ចិន ជាប្រទេសមួយ ដ៏មានឥទ្ធិពលខ្លាំងក្លា នៅលើពិភពលោក។
លោកប្រមុខការទូត រូបនេះ បានបង្ហាញខ្លួនចុងក្រោយ នៅថ្ងៃទី២៥ ខែមិថុនា ឆ្នាំ២០២៣ ស្ថិតក្នុងរដ្ឋធានីប៉េកាំង ប្រទេសចិន ខណៈគាត់បានជួបជាមួយនឹងក្រុមមន្ដ្រីជាច្រើន មកពីប្រទេសវៀតណាម រុស្ស៊ី និង ស្រីលង្កា។ ចាប់តាំងពីពេលនោះមក គាត់បានលុបចោលនូវកិច្ចប្រជុំជាច្រើន ហើយក៏មិនបានទៅចូលរួម នៅក្នុងកិច្ចប្រជុំកំពូលប្រចាំឆ្នាំរបស់ប្រជាជាតិអាស៊ីអាគ្នេយ៍ នៅក្នុងប្រទេសឥណ្ឌូណេស៊ី ផងដែរ។ ប៉ុន្ដែកាលពីសប្តាហ៍មុន អ្នកស្នងតំណែងមុនរបស់គាត់ គឺអតីតរដ្ឋមន្ត្រីក្រសួងការបរទេស និង ជាសមាជិកការិយាល័យនយោបាយបច្ចុប្បន្ន លោក វ៉ាំង យី (Wang Yi) ក៏បានតៅចូលរួម នៅក្នុងកិច្ចប្រជុំនោះ នៅក្នុងឋានៈជាប្រមុខការទូតរបស់គាត់។
ជួរមន្ដ្រីដែលបានផ្តល់ឲ្យ ដោយក្រសួងការបរទេសចិន សម្រាប់លោក Qin បានខកខានចូលរួមកិច្ចប្រជុំអាស៊ាន ដោយសារតែហេតុផលសុខភាព។ ប៉ុន្ដែគេមិនមានព័ត៌មានលម្អិត អំពីលក្ខណៈជំងឺរបស់គាត់នោះឡើយ។ ចំណែកអវត្តមានរយៈពេលយូររបស់ប្រមុខការទូតចិន ក៏មិនត្រូវបានគេកត់សម្គាល់នោះដែរ ហើយបញ្ហានេះ ក៏កំពុងតែបង្កឱ្យមានការអត្ថាធិប្បាយច្របូកច្របល់ពាសវាលកាល ជុំវិញអំពីកន្លែងលាក់ខ្លួនរបស់គាត់ និង ស្ថានភាពទំនាក់ទំនងជាអន្តរជាតិរបស់ប្រទេសចិន នៅក្នុងអំឡុងពេលវេលាការទូតដ៏មមាញឹកនោះ។
ប្រទេសចិន តែងតែរក្សានូវការសម្ងាត់យ៉ាងខ្លាំង ពាក់ព័ន្ធនឹងសុខភាពរបស់មេដឹកនាំ នៃប្រទេសមហាយក្សអាស៊ីមួយនេះ។ ប៉ុន្ដែនៅពេលគេបានសាកសួរ កាលពីថ្ងៃទី៧ ខែកក្កដា សម្រាប់សំណើសុំឆ្លើយតប ពាក់ព័ន្ធទៅនឹងអត្ថបទមួយ ត្រូវបានចុះផ្សាយ នៅលើគេហទំព័រព័ត៌មាននយោបាយរបស់សហរដ្ឋអាមេរិក Politico ដែលបានដកស្រង់នូវការលើកឡើង អំពីសុខភាពរបស់លោករដ្ឋមន្ដ្រី Qin នោះ លោក វ៉ាង វេនប៊ីន (Wang Wenbin) អ្នកនាំពាក្យ ក្រសួងការបរទេសចិន បានអះអាង ថា «គាត់មិនបានដឹង អំពីរបាយការណ៍នេះឡើយ»។
រយៈពេល៤ថ្ងៃ ក្រោយមក អ្នកនាំពាក្យ រូបនេះ បានបញ្ជាក់ ថា លោករដ្ឋមន្ដ្រី នឹងមិនទៅចូលរួម នៅក្នុងកិច្ចប្រជុំអាស៊ាន ដោយសារតែបញ្ហាសុខភាពរបស់គាត់។ ប្រសិនបើលោកប្រមុខការទូតចិន ពិតជាបានធ្លាក់ខ្លួនឈឺមែន វាទំនងជា ថា គាត់នឹងវិលត្រឡប់ទៅធ្វើការវិញ នៅក្នុងរយៈពេលចន្លោះពីរទៅបីថ្ងៃក្រោយមក។
បើទោះជាយ៉ាងនេះក្តី សេចក្ដីរាយការណ៍ដែលមិនបានបញ្ជាក់ឲ្យបានច្បាស់នោះ បានចាប់ផ្តើមផ្សព្វផ្សាយ ថា អវត្តមានរបស់លោករដ្ឋមន្ដ្រី Qin បានផ្សារភ្ជាប់ទៅនឹងទំនាក់ទំនងស្នេហាជាមួយនឹងអ្នកកាសែតម្នាក់ ហើយគាត់ត្រូវបានគេនិយាយ ថា ពួកគេមានកូនក្រៅចំណងអាពាហ៍ពិពាហ៍ ថែមទៀតផង។ ក្រៅពីនេះ ក៏នៅមានពាក្យចចាមអារ៉ាមជាច្រើនផ្សេងទៀតផងដែរ។
លោកស្រី ហ្វ៊ូ ស៊ាវទៀន (Fu Xiaotian) មានកំណើតកើតជា នៅក្នុងប្រទេសចិន និង បានទៅសិក្សា នៅសកលវិទ្យាល័យ Cambridge ចក្រភពអង់គ្លេស។ លុះក្រោយមក លោកស្រី បានក្លាយជាពិធីការិនី និង ជាអ្នកផលិតកម្មវិធី Talk with World Leaders របស់ប្រព័ន្ធផ្សព្វផ្សាយហុងកុង Phoenix TV ។ លោកស្រី បានសម្រាលកូនប្រុសម្នាក់ ឈ្មោះ Er-Kin កាលពីខែវិច្ឆិកា ឆ្នាំ២០២២ នៅសហរដ្ឋអាមេរិក។ ចំណែករូបថត នៃការបង្ហោះនៅលើបណ្ដាញសង្គមចិន Weibo ត្រូវបានគេរាយការណ៍ ថា បានធ្វើឡើង ដោយលោកស្រី ហ្វ៊ូ នៅមុនថ្ងៃទី១៩ ខែមីនា ដែលជាខួបកំណើតគម្រប់វ័យ៥៧ឆ្នាំរបស់លោក Qin ដោយមានការជូនពរឪពុករបស់កូនប្រុសរបស់លោកស្រី ថា «រីករាយថ្ងៃកំណើត»។
ប្រសិនបើការលើកឡើង អំពីទំនាក់ទំនងស្នេហាក្រៅចំណងអាពាហ៍ពិពាហ៍ ក្លាយជាការពិតមែននោះ លោក Qin អាចនឹងឃ្លាចេញពីការអនុគ្រោះខាងនយោបាយ។ បើទោះជារឿងស្នេហាលួចលាក់ មិនមែនជាបទឧក្រិដ្ឋកម្ម នៅក្នុងប្រទេសចិន ក៏ពិតមែន ប៉ុន្ដែច្បាប់របស់បក្សកុម្មុយនិស្តចិន បានហាមឃាត់ដល់សមាជិកនយោបាយរបស់ខ្លួន «ជាប់ពាក់ព័ន្ធនឹងចំណងទំនាក់ទំនងផ្លូវភេទមិនត្រឹមត្រូវ ជាមួយអ្នកដទៃ»។
លោក ឡេ ហ្សេងហ្វ៊ូ (Lei Zhengfu) អតីតលេខាបក្សស្រុក Beibei ទីក្រុង Chongqing ប្រទេសចិន ក៏ត្រូវបានផ្ដន្ទាទោស ដាក់ពន្ធនាគារ រយៈពេល១៣ឆ្នាំ កាលពីអំឡុងឆ្នាំ២០១៣ ពីបទស៊ីសំណូក ក្រោយការបែកធ្លាយខ្សែអត់វីដេអូសិចមួយ ហើយត្រូវបានបង្ហោះ នៅលើបណ្ដាញអ៊ិនធើណេត កាលពីដើមឆ្នាំនោះ។
លោក ហ្សាង ហ្កាវលី (Zhang Gaoli) អតីតសមាជិកគណៈកម្មាធិការអចិន្ត្រៃយ៍ នៃការិយាល័យនយោបាយ និង ជាអតីតនាយករងប្រតិបត្តិ មិនត្រូវបានស៊ើបអង្កេតជាផ្លូវការ ពីបទសហាយស្មន់ នោះទេ បើទោះជាតារាវាយកូនបាល់ចិន កញ្ញា ផេង ស៊ូអាយ (Peng Shuai) បានចោទប្រកាន់ជាចំហ នៅក្នុងឆ្នាំ២០២១ ថា នាងត្រូវបានលោក ហ្សាង ហ្កាវលី ចាប់រំលោភ ហើយបានផ្ញើទិដ្ឋភាពនេះ ជាសាធារណៈ រយៈពេលពីរទៅបីសប្តាហ៍ ហើយក្រោយមកបានក៏បដិសេធ ថា មិនបានចោទប្រកាន់ទៅវិញ។
ទំនាក់ទំនងសេ្នហាក្រៅចំណងអាពាហ៍ពិពាហ៍របស់លោក Qin នឹងអាចត្រូវច្រានចោល ដោយសារតែវាជាពាក្យចចាមអារ៉ាម ប្រសិនបើលោកប្រធានាធិបតី ស៊ី មានទំនុកចិត្តខ្លាំងលើគាត់៕