រាជធានីបាងកក៖ ស្របពេលតុលាការធម្មនុញ្ញ និង សភាទាំង២របស់ប្រទេសថៃ កំពុងតែមានចំណាត់ការរៀងៗខ្លួន ប្រឆាំងនឹងមេបក្សប្រឆាំងឈ្នះឆ្នោត នោះ បេក្ខភាពនាយករដ្ឋមន្ដ្រី មកពីគណបក្សរបស់កូនស្រីលោក ថាក់ស៊ីន អតីតនាយករដ្ឋមន្ដ្រី បានប្រាប់ អំពីវិធីសាស្ដ្រ ស្វែងរកសំឡេងគាំទ្រឲ្យបានច្រើន សម្រាប់ឈានដល់ការបង្កើតរដ្ឋាភិបាលថ្មី។
សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃសុក្រ ទី២១ ខែកក្កដា ថា លោក ស្រេតថា ថាវីស៊ីន (Srettha Thavisin) ជាបេក្ខជននាយករដ្ឋមន្ដ្រី បានបញ្ជាក់ ថា គណបក្សភឿថៃ នឹងប្រឆាំងយ៉ាងដាច់ខាត ចំពោះការប្រែប្រួលណាមួយ មកលើច្បាប់ពាក់ព័ន្ធនឹងការប្រមាថដល់ព្រះមហាក្សត្រ ប្រសិនបើគណបក្សរបស់ខ្លួន ដឹកនាំរដ្ឋាភិបាល។ ចំណែករូបរាងសម្ពន្ធភាព ដឹកនាំ ដោយគណបក្សភឿថៃ នៅមិនទាន់ត្រូវបានបញ្ចប់នៅឡើយ។
អ្នកជំនាញសេដ្ឋកិច្ច និង ពាណិជ្ជកម្ម រូបនេះ បានថ្លែង កាលពីថ្ងៃព្រហស្បតិ៍ ថា ប្រសិនបើគណបក្សភឿថៃ តែងតាំងបេក្ខភាពនាយករដ្ឋមន្ត្រីរបស់ខ្លួន នៅក្នុងការប្រជុំរួមគ្នាបន្ទាប់របស់សភា និង ព្រឹទ្ធសភា នៅថ្ងៃទី ២៧ ខែកក្កដា នោះនឹងមិនទាន់រាប់បញ្ចូលលទ្ធភាពកែប្រែ ឬ លុបចោលមាត្រាទី១១២ នៃក្រមព្រហ្មទណ្ឌនេះទេ។ បើមិនដូច្នេះទេ គណបក្សភឿថៃ នឹងមិនទទួលបាននូវការគាំទ្រ មកពីគណបក្សនយោបាយ និង សមាជិកព្រឹទ្ធសភា នោះឡើយ។ … ប្រសិនបើយើងដឹកនាំ បញ្ហានេះ នឹងត្រូវតែបញ្ឈប់។
ពាណិជ្ជកម្ម
បុរសវ័យ៦០ឆ្នាំ និង ជាមនុស្សដ៏គួរឲ្យទុកចិត្តបំផុតរបស់លោក ថាក់ស៊ីន ស៊ីណាវ៉ាត្រា រូបនេះត្រូវគេជឿថា នឹងក្លាយជាបេក្ខភាពនាយករដ្ឋមន្ត្រី ដែលទំនងបំផុត បន្ទាប់ពីលោក ភីថា លីមចារឿនរ៉ាត (Pita Limjaroenrat) មេដឹកនាំគណបក្សឆ្ពោះទៅមុខ (Move Forward) ហៅកាត់ MFP ដែលបានឈ្នះនូវការបោះឆ្នោតសកល បានរងបរាជ័យ មិនបានទទួលសំឡេងភាគច្រើនគ្រប់គ្រាន់ ពីសភា និងព្រឹទ្ធសភា កាលពីថ្ងៃទី ១៣ ខែកក្កដា។ ក្រុមអ្នកប្រឆាំង បាននិយាយជំទាស់នឹងការប្តេជ្ញាចិត្តរបស់គណបក្សចលនាឆ្ពោះទៅមុខ ធ្វើវិសោធនកម្មច្បាប់ ពាក់ព័ន្ធនឹងការប្រមាថព្រះមហាក្សត្រ នៅក្នុងអំឡុងពេលជជែកដេញដោលគ្នា នៅមុនការបោះឆ្នោត។
ការប៉ុនប៉ងជាលើកទី២របស់លោក ភីថា ដើម្បីទទួលបានតំណែងនាយករដ្ឋមន្ដ្រី កាលពីថ្ងៃពុធ (ទី១៩ ខែកក្កដា) ត្រូវបានខកខាន ក្រោយពេលសមាជិកសភា និង ព្រឹទ្ធសភា បានលើកឡើង ថា បទប្បញ្ញត្តិរបស់សភា ហាមឃាត់នូវការតែងតាំងម្តងទៀត សម្រាប់អ្នកបរាជ័យលើកទី១។ នេះជាគំរូមួយ សម្រាប់ការប៉ុនប៉ង នាពេលអនាគតរបស់លោក ស្រេតថា ឬ សមាជិសភាផ្សេងទៀត។
រដ្ឋធម្មនុញ្ញរបស់ប្រទេសថៃ អនុញ្ញាតដល់សមាជិកព្រឹទ្ធសភា ដែលត្រូវបានតែងតាំង ចំនួន២៤៩នាក់ (ពីមុន២៥០នាក់ ខណៈម្នាក់លាលែងពីតំណែង) ចូលរួមបោះឆ្នោតជ្រើសរើសបេក្ខភាពនាយករដ្ឋមន្ដ្រី រួមជាមួយនឹងសមាជិកសភា ចំនួន៥០០រូប។ ប៉ុន្ដែសមាជិកព្រឹទ្ធសភា ភាគច្រើន បានបង្ហាញយ៉ាងច្បាស់ ថា ពួកគេមិនគាំទ្រដល់បេក្ខភាពណាមួយ ចេញពីសម្ពន្ធភាពគណបក្សទាំង៨នេះ ដោយរាប់បញ្ចូលទាំងគណបក្សឆ្ពោះទៅមុខ រហូតល្គឹកណា ចុងក្រោយ មិនពាក់ព័ន្ធនឹងមាត្រាទី១១២។
បើទោះជាយ៉ាងណាក៏ដោយ លោក ស្រេតថា បានបញ្ជាក់ទៀត ថា គាត់រំពឹង ថា សម្ពន្ធភាពទាំង៨គណបក្ស នឹងពិភាក្សាគ្នា អំពីកិច្ចខិតខំប្រឹងប្រែង បង្កើតសម្ពន្ធភាពម្តងទៀត នៅល្ងាច ថ្ងៃព្រហស្បតិ៍ ឬ នៅថ្ងៃសុក្រ។ ប៉ុន្ដែនៅពេលមានការសាកសួរ ថា តើការខិតខំប្រឹងប្រែងរបស់លោក ភីថា សម្រាប់ការក្លាយជានាយករដ្ឋមន្ត្រី បានដល់ទីបញ្ចប់ ឬយ៉ាងណានោះ បេក្ខជននាយករដ្ឋមន្ដ្រី មកពីគណបក្សភឿថៃ រូបនេះ បានមានប្រសាសន៍ ថា វាអាស្រ័យទៅលើទិដ្ឋភាពច្បាប់ពាក់ព័ន្ធ។
បុរសវ័យ៦០ឆ្នាំ ជាអតីតប្រធានក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ថៃ Sansiri Pcl បានបន្ថែម ថា គាត់មានការខកចិត្ត ចំពោះការបោះឆ្នោតរួមគ្នា ប្រឆាំងនឹងការតែងតាំងលោក ភីថា កាលពីថ្ងៃពុធ (ទី១៩ ខែកក្កដា) ប៉ុន្តែយើងត្រូវតែដកយកបញ្ហានេះចេញ ហើយបន្តដំណើរទៅមុខទៀត។
នៅក្នុងនាមជាបេក្ខភាពនាយករដ្ឋមន្ត្រី លោក ស្រេតថា បានបន្ដ ថា គាត់ត្រូវតែត្រៀមខ្លួន ដើម្បីជំរុញនូវការអភិវឌ្ឍសេដ្ឋកិច្ច ខណៈការធ្វើវិសោធនកម្មរដ្ឋធម្មនុញ្ញ ក៏មានសារៈសំខាន់ផងដែរ។
លោក ប៊ីយ៉ាប៊ុត សាំកានុកគូល (Piyabutr Saengkanokkul) អតីតអគ្គលេខាធិការ គណបក្សអនាគតឆ្ពោះទៅមុខ ដែលត្រូវបានលាយចោល បានព្រមានប្រឆាំងនឹងកិច្ចខិតខំប្រឹងប្រែងរួមគ្នា ដើម្បីរារាំងដល់គណបក្ស MFP នៅក្នុងការបង្កើតរដ្ឋាភិបាល។ គាត់បានសរសេរ នៅលើហ្វេសប៊ុក ថា ចាំបាច់ត្រូវតែរារាំងដល់សមាជិកព្រឹទ្ធសភា និង តំណាងរាស្ដ្រចំនួន ១៨៨រូប មកពីគណបក្សនយោបាយ ចំនួន១០ផ្សេងៗទៀត បញ្ចៀនូវការគាបសង្កត់ មកលើសម្ពន្ធភាពចម្រុះទាំង៨គណបក្ស ដើម្បីដកគណបក្ស MFP ចេញ ជាថ្នូរនឹងការបោះឆ្នោតរបស់ពួកគេ គាំទ្រដល់បេក្ខភាពនាយករដ្ឋមន្ត្រីថ្មី៕
