រដ្ឋធានីកៀវ៖ ទាហានរបស់រុស្ស៊ី បានវាយប្រហារយ៉ាងសន្ធាប់ ដោយមីស៊ីល និង តាមអាកាស ប្រឆាំងនឹងហេដ្ឋារចនាសម្ព័ន្ធស៊ីវិល នៅក្នុងប្រទេសអ៊ុយក្រែន បណ្ដាលឲ្យខូចខាត គិតជាទឹកប្រាក់ អស់រាប់រយពាន់លានដុល្លារ ចាប់តាំងពីមេដឹកនាំវិមានក្រឹមឡាំង លោក វ្ល៉ាឌីមៀ ពូទីន បានបញ្ជាឲ្យកងទ័ពរបស់គាត់ ចូលលុកលុយទៅលើប្រទេសជិតខាង កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក ប៉ុន្ដែឥឡូវនេះ កងទ័ពការពារទឹកដីរបស់ក្រុងកៀវ មានលទ្ធភាពការពារដែនអាកាសរបស់ខ្លួន រហូតធ្វើឲ្យលោកប្រធានាធិបតី ហ្សេឡែនស្គី បានអួតអាង អំពីប្រសិទ្ធភាព នៃប្រព័ន្ធការពាររបស់សហរដ្ឋអាមេរិក និង អាល្លឺម៉ង់។
សារព័ត៌មាន មានមូលដ្ឋាន នៅសិង្ហបុរី Channel News Asia បានចេញផ្សាយ កាលពីព្រឹក ថ្ងៃចន្ទ ទី៧ ខែសីហា ថា លោក វ៉ូឡូឌីមៀ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានអះអាង កាលពីថ្ងៃអាទិត្យ (ទី៦ ខែសីហា) ថា ឥឡូវនេះ អ៊ុយក្រែន កំពុងតែមើលឃើញ អំពីលទ្ធផលដ៏សំខាន់បំផុត ពីប្រព័ន្ធការពារដែនអាកាសរបស់សហរដ្ឋអាមេរិក និង អាល្លឺម៉ង់ ថ្វីបើមានរលកវាយប្រហារតាមអាកាស ពីកម្លាំងទាហានរុស្ស៊ី បាញ់ស្រោច សំដៅមកលើជនស៊ីវិល និង អគារលំនៅឋាន នៅក្នុងរដ្ឋធានីកៀវ និង ទីក្រុងនានារបស់អ៊ុយក្រែន យ៉ាងណាក៏ដោយ។
ដោយឡែក មន្ដ្រីរដ្ឋាភិបាលក្រុងកៀវ បានរាយការណ៍ ថា កម្លាំងទាហានរុស្ស៊ី បានបាញ់ទម្លាក់ដ្រូនមួយគ្រឿង ដែលហោះសំដៅមកវាយប្រហារជាលើកទី៣ នៅក្នុងរដ្ឋធានីមូស្គូ នៅក្នុងរយៈពេល១សប្ដាហ៍កន្លងមកនេះ ខណៈភាគីជម្លោះទាំង២ បានអះអាង អំពីការវាយប្រហារស្ពានចំនួន២ តភ្ជាប់ពីឧបទ្វីបគ្រីមៀ (Crimea) ទៅកាន់ដីគោក។
កម្លាំងទាហានរុស្ស៊ី និង អ៊ុយក្រែន បានបង្កើនការវាយប្រហារ ដាក់គ្នាទៅវិញទៅមក ប្រឆាំងនឹងឃ្លាំងអាវុធ ហើយហេដ្ឋារចនាសម្ព័ន្ធ គាំទ្រដល់សង្គ្រាម ខណៈក្រុងកៀវ កំពុងតែព្យាយាមបណ្តេញកងកម្លាំងរុស្ស៊ី ដែលកាន់កាប់ទឹកដីរបស់ខ្លួន នៅទូទាំងភាគខាងត្បូង និងភាគខាងកើតរបស់ប្រទេសអ៊ុយក្រែន ចាប់តាំងពីការឈ្លានពានរបស់ក្រុងមូស្គូ ចាប់តាំងពីថ្ងៃទី២៤ ខែកុម្ភៈ ឆ្នាំ២០២២ រហូតមក។
ពាណិជ្ជកម្ម
ប្រធានតំបន់គ្រីមៀ លើកបន្តុបដោយរុស្ស៊ី បានអះអាង ថា ស្ពាន Chonhar (ឆុនហារ) តភ្ជាប់ទៅកាន់ឧបទ្វីប ដែលត្រូវបានក្រុងមូស្គូ រឹបអូយកពីអ៊ុយក្រែន កាលពីអំឡុងឆ្នាំ២០១៤ បានរងការខូចខាត ដោយការវាយប្រហារពីមីស៊ីល។ ចំណែកផ្លូវមួយទៀត នៅក្នុងចំណោមផ្លូវទាំងបី តភ្ជាប់ រវាងតំបន់គ្រីមេ និង តំបន់មួយចំនួនរបស់អ៊ុយក្រែន ដែលរុស្ស៊ី បានកាន់កាប់ នៅជិតទីក្រុង Henichesk (ហេនីឆេស្ក៍) បានរងនូវការបាញ់ផ្លោង ហើយអ្នកបើកបរ ជាជនស៊ីវិលម្នាក់ បានរងរបួស។
លោកប្រធានាធិបតី ហ្សេឡែនស្គី បានបញ្ជាក់ នៅក្នុងសុន្ទរកថាជាវីដេអូ នាពេលយប់របស់គាត់ កាលពីថ្ងៃអាទិត្យ ថា ប្រព័ន្ធការពារដែនអាកាសទំនើបៗរបស់បស្ចិមប្រទេស រួមទាំង Patriot ផលិតដោយសហរដ្ឋអាមេរិក និង IRIS-T របស់អាល្លឺម៉ង់ កំពុងបង្ហាញឱ្យឃើញ អំពីប្រសិទ្ធភាពខ្ពស់ ហើយបានផ្តល់លទ្ធផលដ៏គួរឱ្យកត់សម្គាល់រួចមកហើយដែរ។ អ៊ុយក្រែន បានបាញ់ទម្លាក់មីស៊ីលទំនើបៗរបស់រុស្ស៊ី កាលពីសប្តាហ៍មុន ដោយរួមទាំង មីស៊ីលជាច្រើនប្រភេទ ចំនួន៦៥ប្រភេទ និង ដ្រូនវាយប្រហារ ចំនួន១៧៨គ្រឿង រួមទាំង ដ្រូនអត្ដឃាត Shaheds ចំនួន៨៧គ្រឿង។
កងទ័ពអ៊ុយក្រែន បានបញ្ជាក់ នៅក្នុងសេចក្ដីថ្លែងការណ៍ កាលពីល្ងាច ថ្ងៃអាទិត្យ ថា ទាហានរុស្ស៊ី បានបាញ់មីស៊ីល ចំនួន៣០លើក និង ការវាយប្រហារតាមអាកាស ចំនួន៤៨លើក។ ការវាយប្រហារនេះ បានបណ្ដាលឲ្យគ្រោះថ្នាក់ និង រងរបួស នៅក្នុងចំណោមជនស៊ីវិល។ រីឯសំណង់លំនៅឋាន និង ហេដ្ឋារចនាសម្ព័ន្ធស៊ីវិល បានរងការបំផ្លិចបំផ្លាញ។
បើទោះជាយ៉ាងណា រុស្ស៊ី បានច្រានចោល អំពីការកំណត់គោលដៅ វាយប្រហារទៅលើមន្ទីរពេទ្យស៊ីវិល និង មន្ទីរពេទ្យយោធា នៅក្នុងប្រតិបត្ដិការពិសេសទ្រង់ទ្រាយធំរបស់ខ្លួន ដែលបានសម្លាប់មនុស្ស រាប់ម៉ឺននាក់ ជម្លៀសមនុស្សរាប់លាននាក់ និង ការបំផ្លិចបំផ្លាញទីក្រុងនានា នៅក្នុងប្រទេសអ៊ុយក្រែន។
ដោយឡែក នៅក្នុងប្រទេសរុស្ស៊ី ឯណោះវិញ អាកាសយានដ្ឋានវីនូកូវ៉ូ (Vnukovo) របស់ទីក្រុងមូស្គូ បានផ្អាកជើងហោះហើរ កាលពីថ្ងៃអាទិត្យ ដោយលើកឡើង អំពីហេតុផលមិនជាក់លាក់នៅខាងក្រៅការគ្រប់គ្រងរបស់ខ្លួន។ អភិបាលក្រុងម៉ូស្គូ លោក ស៊ើរហ្គេ សូបយ៉ានីន Sergei Sobyanin បានអះអាង ថា យន្តហោះគ្មានមនុស្សបើក ឬ ដ្រូនមួយគ្រឿង ត្រូវបានបាញ់ទម្លាក់ នៅភាគខាងត្បូង នៃរដ្ឋធានីមូស្គូ។
ក្រសួងការពារជាតិរុស្ស៊ី បានបញ្ជាក់ នៅមុននេះ ថា រុស្ស៊ី បានវាយប្រហារ ដោយជោគជ័យទៅលើមូលដ្ឋានទ័ពអាកាសអ៊ុយក្រែន នៅតំបន់ភាគខាងលិច Rivne (រីវណេ) និង Khmelnytskyi (ខ្មែលនីតស្គី) ហើយតំបន់ហ្សាប៉ូរីសហ្សា (Zaporizhzhia) នាភាគខាងត្បូងរបស់ប្រទេសអ៊ុយក្រែន។ ទាហានរុស្ស៊ី បានវាយប្រហារជាក្រុម ដោយប្រើប្រាស់អាវុធដ៏ជាក់លាក់ រយៈចម្ងាយឆ្ងាយ និង វាយប្រហារពីសមុទ្រ ហើយគោលដៅទាំងអស់ ត្រូវបានកម្ទេច។
មន្ត្រីជាន់ខ្ពស់ មកពីប្រទេសចំនួន៤០ រួមមាន សហរដ្ឋអាមេរិក ចិន និង ឥណ្ឌា…ជាដើម បានជួបពិភាក្សាគ្នា នៅក្នុងប្រទេសអារ៉ាប៊ីសាអូឌីត កាលពីថ្ងៃសៅរ៍ និងថ្ងៃអាទិត្យ ស្វះស្វែងរកពិធីដោះស្រាយជម្លោះ រវាងប្រទេសរុស្ស៊ី និង អ៊ុយក្រែន។ ប៉ុន្តែកិច្ចប្រជុំនេះ បានបញ្ចប់ទៅដោយមិនមានសកម្មភាពជាក់ស្តែង លើសពីការប្តេជ្ញាចិត្ត នៅក្នុងការពិគ្រោះយោបល់បន្ថែមទៀតនោះទេ។
កិច្ចប្រជុំនេះ ក្លាយជាផ្នែកមួយ នៃការជំរុញការទូត ដោយអ៊ុយក្រែន សម្រាប់ការកសាងនូវការគាំទ្រលើសពីអ្នកគាំទ្ររបស់លោកខាងលិចស្នូលរបស់ក្រុងកៀវ ។ លោក អេនឌ្រី យើរម៉ាក (Andriy Yermak) ប្រធានខុទ្ទកាល័យរបស់លោកប្រធានាធិបតី ហ្សេឡែនស្គី បានអះអាង ថា ការពិភាក្សា មានផលិតភាពខ្លាំង ប៉ុន្តែមិនបានផ្តល់ព័ត៌មានលម្អិតនោះឡើយ៕
