រដ្ឋធានីកៀវ៖ ស្របពេលសហរដ្ឋអាមេរិក បានសម្រេចផ្ដល់ជំនួយយោធាថ្មី មានទំហំទឹកប្រាក់ ១៣០០លានដុល្លារ ជួយដល់ប្រទេសអ៊ុយក្រែន បន្ថែមទៀតនោះ រុស្ស៊ី បានបញ្ជូនកងទ័ពជើងទឹករបស់ខ្លួន ទៅធ្វើសកម្មភាព កាន់តែខ្លាំងក្លាឡើង នៅសមុទ្រខ្មៅ។
ពាណិជ្ជកម្ម
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃសុក្រ ទី២១ ខែកក្កដា ថា កងទ័ពជើទឹករបស់រុស្ស៊ី បានធ្វើសមយុទ្ធយោធា បាញ់គ្រាប់ពិត នៅក្នុងសមុទ្រខ្មៅ។ សកម្មបែបនេះ បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពេលវិមានក្រឹមឡាំង បានប្រកាស ថា រុស្ស៊ី នឹងពិចារណាលើនាវាចម្បាំងជាច្រើន ធ្វើនាវាចរណ៍ទៅកាន់ប្រទេសអ៊ុយក្រែន តាមគោលដៅយោធាដ៏មានសក្តានុពលតាមផ្លូវទឹក។
ក្រសួងការពារជាតិរុស្ស៊ី បានបញ្ជាក់ ថា នាវាផ្ទុកមីស៊ីលរបស់កងនាវាសមុទ្រខ្មៅរបស់រុស្ស៊ី បានអនុវត្ដនូវការបាញ់មីស៊ីលគ្រាប់ពិតប្រឆាំងនឹងនាវា ទៅលើនាវាជាគោលដៅកំណត់ ស្ថិតនៅភាគពាយព្យ នៃសមុទ្រខ្មៅ។ រីឯកងនាវា និង កងទ័ពអាកាស ក៏បានអនុវត្ដនូវសកម្មភាពនេះ នៅក្នុងតំបន់ដាច់ដោយឡែកពីគ្នា ដោយបានបិទនូវការធ្វើនាវាចរណជាបណ្ដោះអាសន្ន ហើយក៏បានអនុវត្តវិធានការមួយចំនួន សម្រាប់រារាំងកប៉ាល់ ដែលប្រព្រឹត្តល្មើសផងដែរ។
ដោយឡែក សហរដ្ឋអាមេរិក កាលពីថ្ងៃពុធ បានប្រកាសផ្តល់ជំនួយយោធាថ្មីបន្ថែមទៀត មានទំហំទឹកប្រាក់ ចំនួន១៣០០លានដុល្លារ ជួយដល់ប្រទេសអ៊ុយក្រែន។ នៅក្នុងជំនួយសន្ដិសុខថ្មី មានទំហំទឹកប្រាក់ដ៏មហាសាលនោះ ក៏បានរាប់បញ្ចូលទាំងប្រព័ន្ធការពារដែនអាកាស NASAMS (ណាសាមស៍) ចំនួន៤គ្រឿង, ឧបករណ៍បោសសម្អាតមីន, ដ្រូន, គ្រាប់កាំភ្លើងផ្លោង, គ្រាប់បែកទម្លាក់សុក្រឹត, ឧបករណ៍ប្រឆាំងនឹងដ្រូន…ជាដើម៕
