រាជធានីបាងកក៖ ក្រោយពេលពួកយោធា បានធ្វើរដ្ឋប្រហារ ហើយធ្វើឲ្យគាត់ត្រូវបង្ខំចិត្តនិរទេសខ្លួនចេញពីប្រទេស នៅមុនថ្ងៃកាត់ទោសគាត់នោះមក ឥឡូវនេះ អតីតនាយករដ្ឋមន្ដ្រីដ៏មានឥទ្ធិពលរបស់ប្រទេសថៃ បានប្រកាស អំពីពេលវេលាដ៏ជាក់លាក់មួយ វិលត្រឡប់មកកាន់ប្រទេសកំណើតរបស់គាត់វិញ។
សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃពុធ ទី២៦ ខែកក្កដា ថា លោកស្រី ផេថុងថាន «អ៊ុនអ៊ីង» ស៊ីណាវ៉ាត្រា (Paetongtarn "Ung Ing" Shinawatra) កូនស្រីរបស់លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្ដ្រីថៃ បានប្រកាស នៅលើបណ្ដាញសង្គមអ៊ិនស្ដាហ្ក្រាម (Instagram) នៅថ្ងៃពុធ ថា ឪពុករបស់លោកស្រី នឹងមកដល់អាកាសយានដ្ឋាន ដន មឿង (Don Mueang) នៅថ្ងៃទី១០ ខែសីហា ខាងមុខនេះ។
លោកស្រី ផេថុងថាន ជាបេក្ខនារីមួយរូប នៅក្នុងចំណោមបេក្ខភាពនាយករដ្ឋមន្ដ្រីចំនួន៣រូបរបស់គណបក្សភឿថៃ បានសរសេរ នៅថ្ងៃខួបកំណើត គម្រប់៧៤ឆ្នាំរបស់បិតាលោកស្រី ថា «ខ្ញុំស្ទើរតែមិនចង់ជឿ ថា អ្វីដែលខ្ញុំកំពុងតែសរសេរ នាពេលនេះ គឺឪពុករបស់ខ្ញុំ នឹងត្រឡប់មកដល់អាកាសយានដ្ឋានដនមឿង នៅថ្ងៃទី១០ ខែសីហា»។
បើតាមបេក្ខនារីនាយករដ្ឋមន្ដ្រីរបស់គណបក្សភឿថៃ រូបនេះ បានឲ្យដឹងទៀត ថា លោកស្រី បានខកខានធ្វើខួបកំណើតឪពុករបស់លោកស្រី ចំនួនត្រឹមតែ៣ដងប៉ុណ្ណោះ ដោយចុងក្រោយបំផុត គឺនៅឆ្នាំនេះ ដោយសារមានការរៀបចំជាច្រើន ត្រូវបានធ្វើឡើង។
ពាណិជ្ជកម្ម
លោកស្រី បានសរសេរបន្ដ ថា «គ្រួសាររបស់យើង មានសេចក្ដីត្រេកអរផង និង ព្រួយបារម្ភផង ប៉ុន្ដែយើងតែងតែគោរព ចំពោះការសម្រេចចិត្តរបស់ឪពុកយើង»។
លោកស្រី ផេថុងថាន បានជូនពរដល់ឪពុករបស់លោកស្រី ជាមួយនឹងក្ដីសង្ឃឹម ថា ឪពុកនឹងមានសុខភាពល្អ និង មានសុវត្ថិភាព ហើយគាត់អាចបំពេញបំណង ចង់បញ្ជូនចៅៗទៅរៀនជាប្រចាំ។ ឪពុករបស់លោកស្រី ជានាយករដ្ឋមន្ត្រី ដែលត្រូវបានទទួលស្គាល់ ថា គាត់បានចូលរួមចំណែក ជួយកសាងដល់ប្រទេសជាតិច្រើនជាងគេ ប៉ុន្តែគាត់ក៏ត្រូវប្រឈមនឹងការលំបាកជាច្រើនផងដែរ។
ចាប់តាំងពីពួកយោធា បានធ្វើរដ្ឋប្រហារ បណ្ដេញចេញពីអំណាច នៅថ្ងៃទី១៩ ខែកញ្ញា ឆ្នាំ២០០៦រួចមក លោក ថាក់ស៊ីន បានរស់នៅនិរទេសខ្លួន ដោយខ្លួនឯង នៅក្រៅប្រទេស។ ប៉ុន្ដែ លើកលែងតែដំណើរទស្សនកិច្ចរបស់គាត់ មានរយៈពេលខ្លី មកកាន់ប្រទេសថៃ ម្ដង នៅក្នុងអំឡុងឆ្នាំ២០០៨។ នៅក្នុងអំឡុងពេលអវត្តមានរបស់គាត់នោះ នាយកដ្ឋានព្រហ្មទណ្ឌរបស់តុលាការកំពូល សម្រាប់អ្នកកាន់មុខតំណែងនយោបាយ បានកាត់ទោសលោក ថាក់ស៊ីន ឱ្យជាប់ពន្ធនាគារ សរុបរយៈពេល១២ឆ្នាំ។
នៅក្នុងសំណុំរឿងដំបូង លោក ថាក់ស៊ីន ត្រូវបានតុលាការ រកឃើញ ថា មានពិរុទ្ធ ពីបទរំលោភសិទ្ធិអំណាច នៅក្នុងការទិញដីរដ្ឋ ក្នុងតម្លៃទាបជាងតម្លៃទីផ្សារ ដោយលោកស្រី ឃុនយីង ផូតចាម៉ាន ណាភូមបេចារ៉ា (Khunying Potjaman na Pombejra) អតីតភរិយារបស់គាត់ដែលនាំឱ្យមានការជាប់ពន្ធនាគារ រយៈពេល២ឆ្នាំ។ ចំណែកលក្ខន្តិកៈជាប់គុក រយៈពេល ១០ ឆ្នាំ នៃការសម្រេចរបស់តុលាការ បានផុតកំណត់ នៅខែតុលា ឆ្នាំ ២០១៨។
ករណីទី២ បាននាំឱ្យជាប់ពន្ធនាគាររយៈពេល២ឆ្នាំ សម្រាប់អតីតនាយករដ្ឋមន្ត្រី ដែលកំពុងរត់គេចខ្លួន ដោយសារតែគាត់ត្រូវបានគេរកឃើញ ថា មានពិរុទ្ធភាព ពាក់ព័ន្ធនឹងករណីឆ្នោត២ និង ៣ខ្ទង់។
ករណីទី៣ លោក ថាក់ស៊ីន បានទទួលការកាត់ទោស ដាក់ពន្ធនាគារ រយៈពេល៣ឆ្នាំ ពីបទរំលោភបំពានតួនាទីរបស់គាត់ ដោយផ្តល់ប្រាក់កម្ចីចំនួន៤ពាន់លានបាត ដល់ប្រទេសមីយ៉ាន់ម៉ា តាមរយៈធនាគារ Export-Import (Exim) របស់ប្រទេសថៃ។ ថវិកាទាំងនេះ ត្រូវបានប្រើប្រាស់ សម្រាប់ទិញឧបករណ៍ ពីក្រុមហ៊ុនទូរគមនាគមន៍ ដែលជាកម្មសិទ្ធិរបស់គ្រួសាររបស់គាត់។
សំណុំរឿងទី៤ បានបណ្តាលឱ្យគាត់ ជាប់ពន្ធនាគាររយៈពេល៥ឆ្នាំ ក្រោយពេលតុលាការ បានរកឃើញ ថា គាត់មានកំហុសឆ្គង នៅក្នុងការប្រើប្រាស់បុគ្គលិកក្នុងស្រុក កាន់កាប់ភាគហ៊ុន នៅក្នុងក្រុមហ៊ុន Shin Corp ដែលជាក្រុមហ៊ុនទូរគមនាគមន៍ ត្រូវបានហាមឃាត់ សម្រាប់អ្នកតំណែងការិយាល័យនយោបាយណាមួយ។ ចំណែកលក្ខន្តិកៈ នៃការកំណត់សម្រាប់សេចក្តីសម្រេចរបស់តុលាការ លើសំណុំរឿងទី២ ទី៣ និងទី៤ មិនទាន់ផុតកំណត់ឡើយ៕
