រាជធានីបាងកក៖ ក្រោយពេលមានបណ្ដឹងតវ៉ា ជុំវិញការជំទាស់នឹងការតែងតាំងជាថ្មីរបស់មេដឹកនាំគណបក្សប្រឆាំងឈ្នះឆ្នោត ក្រោយការខកខានមិនទទួលបានសំឡេងគាំទ្រភាគច្រើន ពីសមាជិកសភាទាំង២រួចមក ឥឡូវនេះ សភាថៃ បានសម្រេចពន្យារពេលបោះឆ្នោត ដោយគ្មានការកំណត់ ហើយរង់ចាំរហូតដល់មានការសម្រេច ពីតុលាការធម្មនុញ្ញ។
សារព័ត៌មានរបស់ថៃ Bangkok Post បានចេញផ្សាយ នៅថ្ងៃពុធ ទី២៦ ខែកក្កដា ថា លោកប្រធានសភា វ៉ាន់ មូហាម៉ាត់ ណ័រ ម៉ាថា (Wan Muhamad Noor Matha) បានសម្រេចពន្យារពេ ល ដោយគ្មានការកំណត់ ចំពោះគម្រោងបោះឆ្នោតជ្រើសរើសនាយករដ្ឋមន្ដ្រី នៅថ្ងៃព្រហស្បតិ៍ ទី២៧ ខែកក្កដា ដោយរង់ចាំ រហូតដល់តុលាការធម្មនុញ្ញ សម្រេច លើករណីបដិសេធតែងតាំងជាថ្មីរបស់សភា សម្រាប់ប្រធានគណបក្សឆ្ពោះទៅមុខ (Move Forward Party) ហៅកាត់ MFP លោក ភីថា លីមចារឿនរ៉ាត (Pita Limjaroenrat) ឈរឈ្មោះជានាយករដ្ឋមន្ដ្រីទី៣០របស់ប្រទេសថៃ។
លោក វ៉ាន់ មូហាម៉ាត់ ណ័រ ម៉ាថា បានបញ្ជាក់ កាលពីថ្ងៃអង្គារ ថា គាត់បានសម្រេចចិត្តពន្យារការប្រជុំរួមរបស់សភាទាំង២ ដោយគ្មានការកំណត់ រហូតដល់មានការសម្រេចចិត្តរបស់តុលាការ។ សកម្មភាពបែបនេះ បានកើតឡើង ក្រោយពេលគាត់មានការពិគ្រោះយោបល់ជាមួយនឹងក្រុមមន្ដ្រីច្បាប់របស់រដ្ឋសភា និង ក្រុមទីប្រឹក្សារបស់គាត់។
ពាណិជ្ជកម្ម
លោក វ៉ាន់ មូហាម៉ាត់ ណ័រ ម៉ាថា ប្រធានសភា និង អតីតប្រធានសភា បានបញ្ជាក់ ថា ពួកគេមានទស្សនៈយល់ឃើញ ថា ប្រសិនបើការបោះឆ្នោតនាយករដ្ឋមន្ត្រី នឹងនៅតែបន្តធ្វើ តាមការគ្រោងទុក នៅថ្ងៃព្រហស្បតិ៍ (ទី២៧ ខែកក្កដា) ខាងមុខនោះ វាអាចនឹងនាំឱ្យមានបញ្ហា ក្រោយពេលតុលាការធម្មនុញ្ញ ធ្វើសេចក្តីសម្រេចរបស់ខ្លួន នាពេលក្រោយ។ ដូច្នេះការពន្យារពេលកិច្ចប្រជុំ នៅថ្ងៃព្រហស្បតិ៍ នឹងធ្វើឲ្យកិច្ចប្រជុំជាច្រើន ដែលមានគ្រោងនឹងធ្វើ នៅថ្ងៃពុធ ជាមួយនឹងសម្ពន្ធភាពចម្រុះ គណបក្សនយោបាយផ្សេងៗទៀត និង សមាជិកព្រឹទ្ធសភា នាពេលឥឡូវនេះ វាមិនមែនជាការចាំបាច់នោះដែរ។
លោកប្រធានសភា វ៉ាន់ មូហាម៉ាត់ ណ័រ ម៉ាថា បានសង្កត់ធ្ងន់ ថា ហេតុផលមួយផ្សេងៗទៀត សម្រាប់ការពន្យារពេលកិច្ចប្រជុំរួមគ្នារបស់សភាទាំង២នេះ ក៏ដោយសារតែសមាជិកសភាជាន់ទាបជាប់ឆ្នោត និង សមាជិកព្រឹទ្ធសភាជាច្រើនរូប មានការព្រួយបារម្ភ ថា ពួកគេនឹងមិនអាចទៅចូលរួមអបអរសារទរព្រះរាជពិធីបុណ្យចម្រើនព្រះជន្មរបស់ព្រះមហាក្សត្រ នៅក្នុងខេត្តរៀងៗខ្លួនរបស់ពួកគេ នៅថ្ងៃសុក្រ ខាងមុខនេះ ប្រសិនបើការអង្គុយប្រជុំយូរ នៅក្នុងរដ្ឋសភា។ ប៉ុន្ដែក្រោយការសម្រេចរបស់តុលាការធម្មនុញ្ញ សមាជិកសភាទាំង២របស់ប្រទេសថៃនឹងវិលត្រឡប់ មកអង្គុយប្រជុំរួមគ្នា ដើម្បីបោះឆ្នោតជ្រើសរើសនាយករដ្ឋមន្ដ្រីម្ដងទៀត។
ប្រធានសភាថៃ បានកំណត់យកថ្ងៃព្រហស្បតិ៍ ទី២៧ ខែកក្កដា សម្រាប់តំណាងរាស្ដ្រជាប់ឆ្នោត និង សមាជិកព្រឹទ្ធសភា វិលត្រឡប់មកប្រជុំរួមគ្នា បោះឆ្នោតជ្រើសរើសនាយករដ្ឋមន្ត្រីជាថ្មី ក្រោយការខកខានបោះឆ្នោតជ្រើសរើសនាយករដ្ឋមន្ដ្រី កាលពីថ្ងៃទី១៩ ខែកក្កដា រួចមក។ បើតាមគម្រោងការនោះ គឺបេក្ខជន អាចនឹងមកពីគណបក្សភឿថៃ ដែលជាគណបក្សធំលំដាប់ទី២ នៅក្នុងចំណោមសម្ពន្ធភាពចម្រុះទាំង៨គណបក្ស ដឹកនាំដោយគណបក្សឆ្ពោះទៅមុខ (MFP) របស់លោក ភីថា លីមចារឿនរ៉ាត។
លោក ភីថា និង គណបក្សឆ្ពោះទៅមុខរបស់គាត់ បានបើកផ្លូវដល់គណបក្សភឿថៃ ដើម្បីតែងតាំងបេក្ខជនរបស់ខ្លួន សម្រាប់តំណែងនាយករដ្ឋមន្ត្រី និង ការបង្កើតរដ្ឋាភិបាល ក្រោយពេលគាត់មិនអាចស្វែងរកសំឡេងគ្រប់គ្រាន់ ចំនួន៣៧៥សំឡេង ដើម្បីក្លាយជានាយករដ្ឋមន្ដ្រីថៃ។ គណបក្សភឿថៃ ក៏ប្រឈមមុខនឹងបញ្ហាជាច្រើន ដោយសារតែបណ្ដាគណបក្សនយោបាយរបស់ពួកយោធានិយម នៅខាងក្រៅប្លុកចម្រុះទាំង៨គណបក្សនេះ បានប្រឆាំងនឹងគោលនយោបាយរបស់គណបក្សឆ្ពោះទៅមុខ (MFP) ដែលគ្រោងនឹងធ្វើវិសោធនកម្ម លើមាត្រា១១២ នៃក្រមព្រហ្មទណ្ឌ ពាក់ព័ន្ធនឹងការប្រមាថដល់ព្រះមហាក្សត្រ។
ស្របគ្នានេះដែរ គណបក្សចំនួន៨ នៅក្នុងសម្ពន្ធភាពចម្រុះ ដឹកនាំដោយគណបក្សឆ្ពោះទៅមុខ គ្រោងនឹងជួបប្រជុំគ្នា នៅរសៀល ថ្ងៃអង្គារ ដើម្បីស្តាប់របាយការណ៍វឌ្ឍនភាព មកពីគណបក្សភឿថៃ។ ប៉ុន្តែកិច្ចប្រជុំនោះ បានលុបចោលទៅវិញ នៅនាទីចុងក្រោយ ក្រោយពេលគណបក្សភឿថៃ បានទទួលស្គាល់ ថា វាមានដំណើរការតិចតួច នៅក្នុងសេចក្ដីរាយការណ៍នោះ រហូតមកដល់ពេលនេះ ។
គណបក្សឆ្ពោះទៅមុខ បានទទួច ថា គណបក្ស MFP នឹងនៅតែបន្តកិច្ចខិតខំប្រឹងប្រែងរបស់ខ្លួន សម្រាប់ជំរុញដល់លោក ភីថា ត្រូវតែងតាំងជានាយករដ្ឋមន្ត្រី ថ្វីបើគាត់មិនបានឈ្នះសំឡេងភាគច្រើន ពីសមាជិកសភាទាំងពីរ នៅក្នុងការបោះឆ្នោតជ្រើសរើសនាយករដ្ឋមន្ត្រីថ្មី កាលពីនៅថ្ងៃទី១៣ ខែកក្កដា ឆ្នាំ២០២៣យ៉ាងណាក្ដី។
លោក ភីថា ត្រូវបានតែងតាំងជាថ្មី សម្រាប់តំណែងកំពូលមួយនេះ ដើម្បីឲ្យសមាជិកសភាទាំង២ បោះឆ្នោត នៅថ្ងៃទី១៩ ខែកក្កដា ម្ដងទៀត ប៉ុន្តែសភាបានបដិសេធនូវការតែងតាំងនោះ ដោយផ្អែកលើមូលដ្ឋាននីតិវិធី។ ក្រុមអ្នកប្រឆាំងបានអះអាង ថា ការតែងតែងជាថ្មីបែបនេះសម្រាប់លោក ភីថា បំពារបំពាននឹងបទប្បញ្ញត្តិរបស់សភា លើមាត្រា៤១ ដោយបានហាមមិនឲ្យមានការដាក់សំណើដែលបានទទួលបរាជ័យ នៅក្នុងសម័យប្រជុំសភាដដែល។
ដោយឡែក ក្រុមអ្នកគាំទ្ររបស់លោក ភីថា លីមចារឿនរ៉ាត និង ក្រុមអ្នកសិក្សាស្រាវជ្រាវជាច្រើន បានប្រឆាំងនឹងដំណោះស្រាយរបស់សភា។ ជាមួយគ្នានេះដែរ ពួកគេបានស្នើសុំទៅកាន់តុលាការធម្មនុញ្ញ ដើម្បីសម្រេចអំពីភាពស្របច្បាប់ នៅក្នុងការតែងតាំងជាថ្មីជូនលោក ភីថា សម្រាប់តំណែងនាយករដ្ឋមន្ត្រី៕