រាជធានីបាងកក៖ ស្របពេលសភាបានសម្រេចផ្អាកនូវការបោះឆ្នោតជ្រើសរើសនាយករដ្ឋមន្ដ្រី ដោយរង់ចាំការសម្រេចរបស់តុលាការធម្មនុញ្ញ មុននឹងដំណើរការនីតិវិធីរបស់ខ្លួនបន្ដទៀតនោះ ក្រុមអ្នកតវ៉ា គាំទ្រលទ្ធិប្រជាធិបតេយ្យ បានប្រមូលផ្ដុំគ្នា អំពាវនាវដល់គណបក្សភឿថៃ ត្រូវតែរក្សានូវភាពស្មោះត្រង់ សម្រាប់សម្ពន្ធភាពចម្រុះទាំង៨គណបក្សរបស់ខ្លួន ហើយជំរុញឲ្យសមាជិកសភា លាលែងចេញពីតំណែងរបស់ពួកគេ។
សារព័ត៌មានរបស់ថៃ The Nation បានចេញផ្សាយ កាលពីរសៀល ថ្ងៃសុក្រ ទី២៨ ខែកក្កដា ថា ក្រុមបាតុករគាំទ្រលទ្ធិប្រជាធិបតេយ្យ បានប្រមូលផ្តុំគ្នា នៅតាមផ្លូវ Ratchaprasong (រ៉ាតចាប្រាសុង) ស្ថិតក្នុងទីក្រុងបាងកក កាលពីថ្ងៃព្រហស្បតិ៍ ដោយបានទាមទារឱ្យសមាជិកព្រឹទ្ធសភា លាលែងចេញពីតំណែងរបស់ពួកគេ។ បន្ថែមពីលើនេះ ក្រុមអ្នកតវ៉ា ក៏បានជំរុញឲ្យសម្ពន្ធភាពចម្រុះទាំង៨គណបក្ស ត្រូវតែរក្សានូវគោលជំហររបស់ខ្លួន នៅក្នុងការបង្កើតរដ្ឋាភិបាលចម្រុះថ្មី បន្ដដឹកនាំប្រទេសថៃ ឆ្ពោះទៅរកការរីកចម្រើនជាថ្មីឡើងវិញ។
ហ្វូងបាតុករ ជាច្រើនក្រុម រួមមាន រណសិរ្សរួបរួមធម្មសភា និង បាតុកម្មម៉ូខេលួងរីមណាម (Mokeluang Rimnam), ថាលូវ៉ាង (ThaluWang) និង ចលនាប្រជាជនដើម្បីសង្គម (P-Move) បានចាប់ផ្តើមធ្វើបាតុកម្ម នៅវេលាម៉ោង៥ល្ងាច។
ពាណិជ្ជកម្ម
ក្រុមអ្នកតវ៉ា បានលើកបដា នៅលើស្ពានដើរ ហើយបានយកស្ព្រៃបាញ់ជាសារ នៅលើដងផ្លូវនោះ។ បន្ថែពីលើនេះ ពួកគេក៏បានរៀបចំសារចំអក ព្យួរនៅលើផ្លូវដើរនោះ ដើម្បីរំឭកដល់ក្រុមបាតុករ ដែលបានស្លាប់ នៅក្នុងអំឡុងធ្វើបាតុកម្ម ប្រឆាំងនឹងរដ្ឋាភិបាលថៃ ក្រោមការដឹកនាំរបស់លោកនាយករដ្ឋមន្ត្រី អាភីស៊ីត វេចាជីវ៉ា (Abhisit Vejjajiva) នាអំឡុងឆ្នាំ២០១០។
ក្រុមបាតុករ បានជំរុញឲ្យសមាជិកព្រឹទ្ធសភា ទាំង២៤៩នាក់ ត្រូវតែស្ដាប់នូវសំឡេងរបស់ប្រជាជន ហើយគណបក្សភឿថៃ ត្រូវតែរក្សានូវគោលជំហររបស់ខ្លួន នៅក្នុងការបង្កើតរដ្ឋាភិបាល តាមបែបលទ្ធិប្រជាធិបតេយ្យ ជាមួយនឹងគណបក្សឆ្ពោះទៅមុខ។
ជាមួយគ្នានេះ ក្រុមបាតុករ ក៏បានជំរុញដល់បណ្ដាគណបក្សនយោបាយទាំងអស់ និង ក្រុមសមាជិកព្រឹទ្ធសភា ត្រូវតែឈប់គិត ថា ការធ្វើវិសោធនកម្មច្បាប់ ត្រង់មាត្រា ១១២ ពាក់ព័ន្ធនឹងការប្រមាថព្រះមហាក្សត្រ មិនមែនមានគោលបំណង ផ្តួលរំលំរបបរាជានិយមនោះឡើយ។ ការកែប្រែច្បាប់នេះ មានគោលបំណងដ៏សំខាន់បំផុត ស្វែងរកដំណោះស្រាយដ៏ត្រឹមត្រូវ និង យុត្តិធម៌ សម្រាប់ប្រទេសជាតិ។
លោក ថាតចាពុង កៃដាម (Thatchapong Kaedam) ជាសកម្មជនខាងនយោបាយ បានអះអាង ថា ប្រសិនបើគណបក្សភឿថៃ ក្បត់នឹងសម្ពន្ធមិត្តនោះ មានន័យយ៉ាងប្រាកដ ថា គណបក្សភឿថៃ ក៏នឹងត្រូវប្រឈមមុខនឹងការផ្តន្ទាទោស ពីប្រជាជនផងដែរ។ គណបក្សភឿថៃ គួរតែប្រកាន់ខ្ជាប់ ដោយយ៉ាងម៉ឺងម៉ាត់បំផុត ចំពោះគោលជំហររបស់ខ្លួន ដើម្បីគេចចេញពីគម្រោងរបស់ក្រុមគណបក្សអភិរក្សនិយម។
លោក ថាតចាពុង កៃដាម បានបន្ថែម ថា អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា និង សកម្មជនជាច្រើនទៀត បានរត់ភៀសខ្លួន គេចចេញពីប្រទេសថៃ ដើម្បីបញ្ចៀសពីការចោទប្រកាន់ខាងនយោបាយ។ ដូច្នេះពួកគេ ត្រូវតែមានសិទ្ធិ វិលត្រឡប់មកកាន់មាតុប្រទេសរបស់ពួកគេវិញ។ ទន្ទឹមគ្នានេះ គ្រប់ភាគីទាំងអស់ គួរតែគោរពតាមសំឡេងឆ្នោតរបស់ប្រជាពលរដ្ឋ មានគោលបំណងទប់ស្កាត់នូវការប៉ះទង្គិចគ្នាជាថ្មីម្តងទៀត រវាងក្រុមបាតុករ និង ក្រុមប៉ូលិសប្រឆាំងកុបកម្ម ដូចជាហេតុការណ៍ បានផ្ទុះឡើង នៅចំណុចប្រសព្វ Din Daeng (ឌិន ដែង) កាលពីឆ្នាំមុន។
លោក សុមយ៉ូត ព្រុកសាកាមស៊ុក (Somyot Pruksakamsuk) មេដឹកនាំក្រុមអ្នកប្រជាធិបតេយ្យ បានថ្លែង កាលពីថ្ងៃទី២៤ ខែមិថុនា ថា សមាជិកព្រឹទ្ធសភា និង តុលាការធម្មនុញ្ញ គួរតែត្រូវទទួលនូវការស្តីបន្ទោស ចំពោះការពន្យារពេល នៅក្នុងការបង្កើតរដ្ឋាភិបាល។ ការពន្យារពេលបែបនេះ អាចបណ្តាលឱ្យខូចខាតដល់សេដ្ឋកិច្ច ជាង១០០ពាន់លានបាត (លុយថៃ) ឬស្មើនឹងប្រហែលជាង ២,៩៣ពាន់លានដុល្លារ ($2 934 192 316)។ ចំណែកបំណុលគ្រួសារ អាចនឹងកើនឡើង រហូតដល់៩០ភាគរយ នៃផលិតផលក្នុងស្រុកសរុប (GDP) របស់ប្រទេសថៃ។ នេះមានន័យ ថា ប្រសិនបើប្រជាពលរដ្ឋថៃ មានលុយចំនួន១០០បាត ពួកគាត់នឹងត្រូវចំណាយ រហូតដល់ទៅ៩០បាត ទៅលើការបង់សងប្រាក់បំណុល៕
