រាជធានីបាងកក៖ នាយករដ្ឋមន្ដ្រីដ៏មានឥទ្ធិពលបំផុតរបស់ប្រទេសថៃ ត្រូវបានមេដឹកនាំយោធា ធ្វើរដ្ឋប្រហារ បណ្ដាញចេញពីអំណាច កាលពី១៧ឆ្នាំមុន ប៉ុន្ដែឥឡូវមេដឹកនាំយោធាទាំងនោះ បានបង្ហាញសញ្ញាគាំទ្រ ដល់ដំណើរវិលត្រឡប់របស់លោក ថាក់ស៊ីន មកកាន់ប្រទេសកំណើត ហើយពួកគេចង់មើលឃើញ ពីឱកាសផ្សះផ្សាជាតិឡើងវិញផងដែរ។
សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃព្រហស្បតិ៍ ទី២៧ ខែកក្កដា ថា លោកឧត្ដមសេនីយ៍ សុនធី ប៊ូនយ៉ារ៉ាតគ្លីន (Sonthi Boonyaratglin) អតីតអគ្គមេបញ្ជាការកងយោធពលភូមិន្ទថៃ បានដឹកនាំធ្វើរដ្ឋប្រហារយោធា ផ្ដួលរំលំរដ្ឋាភិបាលជាប់ឆ្នោតរបស់លោកនាយករដ្ឋមន្ដ្រី ថាក់ស៊ីន ស៊ីណាវ៉ាត្រា (Thaksin Shinawatra) នៅក្នុងអំឡុងខែកញ្ញា ឆ្នាំ២០០៦។ ប៉ុន្ដែក្រោយពេលលោក ថាក់ស៊ីន រស់នៅនិរទេសខ្លួន អស់រយៈពេល១៧ឆ្នាំកន្លងមក ខណៈប្រទេសថៃ ក៏នៅតែមានជម្លោះនយោបាយបន្ថែមទៀតនោះ ទើបមេដឹកនាំរដ្ឋប្រហារថៃ ងាកមកគាំទ្រ ដល់ដំណើរវិលត្រឡប់របស់លោក ថាក់ស៊ីន មកកាន់ប្រទេសថៃ ហើយចង់ឃើញប្រទេសអាស៊ានមួយនេះ មានឱកាសល្អ សម្រាប់ការផ្សះផ្សាជាតិ។
លោកឧត្ដមសេនីយ៍ អតីតអគ្គមេបញ្ជាការកងយោធពលភូមិន្ទថៃ រូបនេះ កាលពីថ្ងៃព្រហស្បតិ៍ បានបញ្ជាក់ ថា លោក ថាក់ស៊ីន មានសិទ្ធិវិលមកប្រទេសកំណើតរបស់គាត់វិញ ហើយនឹងផ្ដល់ឱកាសដល់គាត់ ចូលទៅក្នុងប្រព័ន្ធយុត្ដិធម៌ និង ដោះស្រាយសំណុំរឿងតាមផ្លូវច្បាប់ ប្រឆាំងនឹងរូបគាត់។
ពាណិជ្ជកម្ម
បើតាមលោកឧត្ដមសេនីយ៍ សុនធី បានឲ្យដឹងទៀត ថា លោក ថាក់ស៊ីន បានប្រាប់គាត់ តែប៉ុន្មានថ្ងៃប៉ុណ្ណោះ បន្ទាប់ពីការធ្វើរដ្ឋប្រហារយោធា នាអំឡុងខែកញ្ញា ឆ្នាំ២០០៦ ថា គាត់ជាសុភាពបុរស និង មានអត្តចរិតល្អ ហើយគាត់ក៏កំពុងតែទន្ទឹងរង់ចាំនូវការផ្សះផ្សាជាតិ។
ដោយសារតែគណបក្សភឿថៃ កំពុងតែព្យាយាមដឹកនាំបង្កើតរដ្ឋាភិបាលថ្មីនោះ លោកឧត្ដមសេនីយ៍ សុនធី បានបញ្ជាក់ ថា គណបក្សភឿថៃ ទំនងជានឹងផ្តោត ទៅលើការស្វែងរកដំណោះស្រាយ ជុំវិញបញ្ហាជម្លោះ នៅក្នុងប្រទេស។ កូនស្រីពៅរបស់លោក ថាក់ស៊ីន គឺលោកស្រី ផេថុងថាន ស៊ីណាវ៉ាត្រា (Paetongtarn Shinawatra) ក៏ជាបេក្ខនារីនាយករដ្ឋមន្ត្រីមួយរូបរបស់គណបក្សភឿថៃ ផងដែរ។
លោកឧត្ដមសេនីយ៍ បានសង្កត់ធ្ងន់ ថា «ប្រសិនបើកើតមានជម្លោះ នៅក្នុងប្រទេស វាមានការពិបាកខ្លាំង នៅក្នុងការគ្រប់គ្រងប្រទេសជាតិ។ បញ្ហានេះ ក៏ជាឱកាសដ៏ល្អបំផុត សម្រាប់ប្រទេសជាតិ ត្រូវតែដោះស្រាយបញ្ហាទាំងនេះ»។
លោកឧត្ដមសេនីយ៍ សុនធី បានបន្ដ ថា គាត់ជាសិស្សជំនាន់ទី៦ នៃសាលាត្រៀមរបស់កងយោធពលខេមរភូមិន្ទថៃ ហើយលោក ថាក់ស៊ីន ជាសិស្សប្អូន នៅសាលាដូចគ្នានេះ។ សិស្សទាំងអស់ ត្រូវបានអប់រំឲ្យចេះស្រឡាញ់ជាតិ សាសនា និង ព្រះមហាក្សត្រ។
លោកឧត្ដមសេនីយ៍ សុនធី បានបន្ថែម ថា «យើងដឹង ថា ស្ថាប័នរាជវង្ស បានរួមចំណែកអ្វីខ្លះ សម្រាប់កសាងប្រទេសជាតិ។ ខ្ញុំជឿជាក់ ថា ព្រះអង្គ នៅតែមានភក្តីភាពបែបនេះជានិច្ច»។
លោកស្រី ផេថុងថាន ស៊ីណាវ៉ាត្រា (Paetongtarn Shinawatra) ជាកូនស្រីពៅរបស់លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្ដ្រីថៃ បានប្រកាស នៅលើបណ្ដាញសង្គម Instagram កាលពីថ្ងៃពុធ ថា លោក ថាក់ស៊ីន នឹងមកដល់អាកាសយានដ្ឋាន ដន មឿង (Don Mueang) នាថ្ងៃទី១០ ខែសីហា។
លោកស្រី ផេថុងថាន ជាបេក្ខនារីមួយរូប នៅក្នុងចំណោមបេក្ខជននាយករដ្ឋមន្ដ្រី ទាំង៣រូបរបស់គណបក្សភឿថៃ បានសរសេរ នៅចំថ្ងៃខួបកំណើត គម្រប់៧៤ឆ្នាំរបស់លោក ថាក់ស៊ីន ជាឪពុករបស់លោកស្រី ថា «ខ្ញុំស្ទើរតែមិនគួរឲ្យចង់ជឿ ថា អ្វីៗដែលខ្ញុំកំពុងតែសរសេរ នៅពេលនេះ គឺឪពុករបស់ខ្ញុំ នឹងធ្វើមាតុភូមិនិវត្ដន៍ មកដល់អាកាសយានដ្ឋានដនមឿង នៅថ្ងៃទី១០ ខែសីហា ខាងមុខនេះ»។
លោកស្រី បានសរសេរបន្ដ ថា « ដំណឹងនេះ ធ្វើឲ្យគ្រួសាររបស់យើង មានទាំងសេចក្ដីត្រេកអរផង និង ការព្រួយបារម្ភផង។ ប៉ុន្ដែយើងទាំងអស់គ្នា ត្រូវតែគោរពនូវការសម្រេចចិត្តរបស់ឪពុកយើង»។
ជាមួយគ្នានេះដែរ លោកស្រី ផេថុងថាន បានជូនពរដល់ឪពុករបស់លោកស្រី ជាមួយនឹងក្ដីសង្ឃឹម ថា ឪពុករបស់លោកស្រី នឹងមានសុខភាពល្អ ហើយមានសុវត្ថិភាព។ គាត់អាចបំពេញតាមគោលបំណងរបស់គាត់បាន ដោយនាំចៅៗរបស់គាត់ ទៅសាលារៀន ជាប្រចាំថ្ងៃ។ ឪពុករបស់លោកស្រី ជានាយករដ្ឋមន្ត្រី ហើយត្រូវបានប្រជាជនថៃទូទៅ ទទួលស្គាល់ ថា គាត់បានចូលរួមចំណែក ជួយកសាងដល់ប្រទេសជាតិ ច្រើនជាងគេ។ ប៉ុន្តែគាត់ក៏បានប្រឈមនឹងការលំបាកខ្លាំង និង ការបៀតបៀនជាច្រើនផងដែរ៕
