រដ្ឋធានីមូស្គូ៖ ចាប់តាំងពីសង្គ្រាមរបស់មេដឹកនាំវិមានក្រឹមឡាំង លោក វ្ល៉ាឌីមៀ ពូទីន បានផ្ទុះឡើង នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក កម្លាំងទាហានរបស់ក្រុងមូស្គូ តែងតែវាយប្រហារយ៉ាងសន្ធាប់ មកលើប្រទេសជិតខាងមួយនេះ ប៉ុន្ដែឥឡូវនេះ ស្ថានការណ៍កំពុងតែប្រែប្រួលយ៉ាងខ្លាំង ដោយសារតែកងទ័ពការពារទឹកដីរបស់ក្រុងកៀវ កំពុងតែមានលទ្ធភាព វាយប្រហារជាបន្ដបន្ទាប់ ឆ្លងព្រំដែនចូលជ្រៅ ទៅដល់ខាងក្នុងប្រទេសរុស្ស៊ី។
បណ្ដាញទូរទស្សន៍អារ៉ាប់អន្ដរជាតិ Alarabiya News បានផ្សាយ នៅថ្ងៃចន្ទ ទី៣១ ខែកក្កដា ថា លោក អាឡិកសានដឺរ បូហ្គោម៉ាស (Alexander Bogomaz) ប្រធានតំបន់ប្រ៊ៀនស្ក៍ (Briansk) បានអះអាង នៅថ្ងៃចន្ទ នេះ ថា ដ្រូនរបស់អ៊ុយក្រែន បានវាយប្រហារ ទៅលើស្ថានីយរបស់ប៉ូលិសមួយកន្លែង កាលពីរំលងអធ្រាត្រ នៅតំបន់ប្រ៊ៀនស្ក៍ ប្រទេសរុស្ស៊ី។ ប៉ុន្ដែសកម្មភាពនេះ មិនបានបង្កឲ្យមានគ្រោះថ្នាក់ ដល់មនុស្សណាម្នាក់នោះឡើយ។
លោកប្រធានតំបន់ប្រ៊ៀនស្ក៍ បានសរសេរ នៅលើបណ្ដាញសង្គមតេឡេក្រាម ថា «កងទ័ពអ៊ុយក្រែន បានវាយប្រហារទៅលើស្រុកទ្រូបឆែវស្គី (Trubchevsky) កាលពីយប់ ហើយវាបានធ្វើឲ្យខូចខាតដំបូល និង បង្អួចរបស់អគារស្ថានីយប៉ូលិស ប៉ុន្ដែមិនមានអ្នករងគ្រោះនោះទេ»។
ពាណិជ្ជកម្ម
អាជ្ញាធរក្រុងមូស្គូ កាលពីថ្ងៃអាទិត្យ បានអះអាងផងដែរ ថា កម្លាំងទាហានរុស្ស៊ី បានបាញ់ទម្លាក់យន្តហោះគ្មានមនុស្សបើក ឬ ដ្រូន របស់អ៊ុយក្រែន ហោះសំដៅទៅលើទីក្រុងមូស្គូ និងឧបទ្វីបគ្រីមៀ ដែលបានវាយប្រហារបំផ្លាញអគារការិយាល័យចំនួន២ នៅក្នុងរដ្ឋធានីរបស់រុស្ស៊ី។ សកម្មភាពវាយប្រហារទាំងនេះ បានធ្វើឲ្យអាជ្ញាធរ សម្រេចបិទអាកាសយានដ្ឋានអន្តរជាតិ មួយរយៈពេលខ្លី។
ក្រសួងការពារជាតិរុស្ស៊ី បានបញ្ជាក់ ថា យន្តហោះគ្មានមនុស្សបើក ចំនួន១គ្រឿង បានហោះសំដៅទៅលើទីក្រុងមូស្គូ ហើយត្រូវបានបាញ់ទម្លាក់ នៅជាយទីក្រុងនេះ។ ចំណែកដ្រូនចំនួន២គ្រឿងផ្សេងទៀត ត្រូវបានបង្ក្រាប ដោយប្រព័ន្ធអេឡិចត្រូនិក ខណៈដ្រូនផ្សេងទៀត បានវាយប្រហារ មកលើអគារការិយាល័យមួយ ប៉ុន្ដែមិនមានអ្នករងរបួស។
រដ្ឋធានីមូស្គូ និង តំបន់ជុំវិញរបស់ទីក្រុងនេះ មានចម្ងាយប្រហែល៥០០គីឡូម៉ែត្រ ចេញពីព្រំដែនរបស់អ៊ុយក្រែន ហើយគេកម្រកំណត់ ថា វាជាគោលដៅ សម្រាប់ជម្លោះ នៅក្នុងប្រទេសអ៊ុយក្រែន។ ប៉ុន្ដែរហូតដល់មកដល់ពេលនេះ គេតែងតែឃើញមានការវាយប្រហារ ដោយយន្តហោះគ្មានមនុស្សបើក ជាច្រើនលើកច្រើនសា នាឆ្នាំ២០២៣នេះ៕