រដ្ឋធានីកៀវ៖ រដ្ឋាភិបាលក្រុងកៀវ កំពុងតែភ័យខ្លាចយ៉ាងខ្លាំង ដល់សន្ដិសុខរបស់ប្រទេសជាតិ ហើយកំពុងតែចាប់ផ្ដើម ចរចាជាមួយនឹងសហរដ្ឋអាមេរិក ដើម្បីសុំការធានា ដល់សន្ដិសុខរបស់ប្រទេសរងគ្រោះមួយនេះ សម្រាប់ត្រៀមខ្លួនទប់ទល់ ប្រឆាំងនឹងការឈ្លានពានរបស់រុស្ស៊ី នាពេលអនាគត។
សារព័ត៌មានរបស់សិង្ហបុរី CNA បានចេញផ្សាយ កាលពីព្រឹក ថ្ងៃចន្ទ ទី៣១ ខែកក្កដា ថា លោក អេនឌ្រីយ យើរម៉ាក (Andriy Yermak) ប្រធានខុទ្ទការល័យរបស់ប្រធានាធិបតីអ៊ុយក្រែន បានអះអាង កាលពីថ្ងៃអាទិត្យ (ថ្ងៃទី៣០ ខែកក្កដា) ថា អ៊ុយក្រែន នឹងចាប់ផ្តើម ពិគ្រោះយោបល់ ជាមួយសហរដ្ឋអាមេរិក នៅសប្តាហ៍នេះ ស្ដីអំពីការធានាដល់សន្តិសុខ សម្រាប់រដ្ឋាភិបាលក្រុងកៀវ ខណៈកំពុងតែរង់ចាំ ចូលរួមជាមួយនឹងអង្គការណាតូ។
លោក អេនឌ្រីយ យើរម៉ាក បានសរសេរ នៅតាមបណ្ដាញសង្គមតេឡេក្រាម ថា «យើងកំពុងតែចាប់ផ្ដើមចរចាជាមួយនឹងសហរដ្ឋអាមេរិក នៅសប្ដាហ៍នេះ»។
ប្រធានខុទ្ទការល័យរបស់ប្រធានាធិបតីអ៊ុយក្រែន រូបនេះ បានសង្កត់ធ្ងន់ ថា « ការធានាសន្តិសុខ សម្រាប់អ៊ុយក្រែន នឹងក្លាយជាការពិត សម្រាប់កាតព្វកិច្ច រយៈពេលវែង ដោយធានាអំពីសមត្ថភាពរបស់អ៊ុយក្រែន នៅក្នុងទប់ស្កាត់ ប្រឆាំងនឹងការឈ្លានពានរបស់រុស្ស៊ី ជាថ្មី នាពេលអនាគត។ គោលបំណងទាំងនេះ នឹងត្រូវព្រាងធ្វើឡើងយ៉ាងច្បាស់ អំពីទម្រង់ និង យន្តការ សម្រាប់កិច្ចគាំទ្រ។ ការធានាទាំងនេះ នឹងមានប្រសិទ្ធភាព រហូតដល់ពេលអ៊ុយក្រែន ក្លាយជាសមាជិកផ្លូវការរបស់អង្គការណាតូ»។
ពាណិជ្ជកម្ម
នៅក្នុងកិច្ចប្រជុំកំពូលរបស់អង្គការណាតូ នៅក្នុងរដ្ឋធានីវីលនីស (Vilnius) ប្រទេសលីទុយអានី បានគាំទ្រជួយដល់ប្រទេសអ៊ុយក្រែន ទប់ទល់ ប្រឆាំងនឹងការឈ្លានពានរបស់រុស្ស៊ី អស់រយៈពេល១៧ខែ កន្លងមកនេះ។ ប្រទេសនីមួយៗ បានប្ដេជ្ញាផ្ដល់អាវុធជាថ្មី ជួយដល់រដ្ឋាភិបាលក្រុងកៀវ ខណៈកាលបរិច្ឆេទគ្មានការកំណត់ សម្រាប់សមាជិកភាពរបស់អ៊ុយក្រែន ដោយសារតែសង្គ្រាមកំពុងតែបន្ត។
បណ្ដាប្រទេសមានសេដ្ឋកិច្ចរីកចម្រើនបំផុត G7 រួមមាន កាណាដា បារាំង អាល្លឺម៉ង អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក បានយល់ព្រម សម្រាប់អនុញ្ញាតដល់ប្រទេសនីមួយៗ ចរចា លើកិច្ចព្រមព្រៀង ផ្តល់នូវការធានាដល់សន្តិសុខ និង ជួយអ៊ុយក្រែន ពង្រឹងកម្លាំងយោធារបស់ពួកគេ។
បើតាមការធ្វើអត្ថាធិប្បាយរបស់លោក យើរម៉ាក បានលើកឡើង ថា ប្រទេសជាង១០ផ្សេងទៀត បានចូលរួមសេចក្តីប្រកាសរបស់បណ្ដាប្រទេស G7 ។ បច្ចុប្បន្ននេះ អ៊ុយក្រែន កំពុងតែចរចា អំពីលក្ខខណ្ឌ សម្រាប់ការធានា នាពេលអនាគត ជាមួយប្រទេសនីមួយៗ៕
