រដ្ឋធានីកៀវ៖ ថ្វីបើផែនការវាយបករំដោះទឹកដីរបស់រដ្ឋាភិបាលក្រុងកៀវ មានសកម្មភាពយឺតៗ មិនដូចការគ្រោងទុក ក៏ពិតមែន ប៉ុន្ដែកងទ័ពការពារទឹកដីរបស់អ៊ុយក្រែន នៅតែមានលទ្ធភាព វាយរុញច្រានកម្លាំងទាហានរុស្ស៊ី ជាបន្ដបន្ទាប់ ខណៈទាហានរបស់ក្រុងមូស្គូ មិនអាចវាយរុលទៅមុខបាន នៅលើសមរភូមិជាច្រើន ស្ថិតក្នុងទីក្រុងលីម៉ាន់-គូព្យានស្ក៍ (Lyman–Kupyansk)។
គេហទំព័ររបស់បណ្ដាញទូរទស្សន៍អារ៉ាប់អន្ដរជាតិ Alarabiya News បានផ្សាយ កាលពីព្រឹក ថ្ងៃអង្គារ ទី១ ខែសីហា ឆ្នាំ២០២៣ ថា ក្រុមមន្ដ្រីយោធាអ៊ុយក្រែន បានអះអាង ថា គិតត្រឹមវេលានេះ កម្លាំងទាហានរុស្ស៊ី នៅតែមិនអាចវាយរុលទៅមុខ ប្រឆាំងនឹងកងទ័ពការពារទឹកដីរបស់អ៊ុយក្រែន នៅសមរភូមិប្រយុទ្ធណាមួយនោះឡើយ។ ប៉ុន្ដែផ្ទុយទៅវិញ អ៊ុយក្រែន បានវាយលុកទៅលើទាហានរុស្ស៊ី ឲ្យរងបរាជ័យ នៅលើទីលានប្រយុទ្ធជាច្រើន ស្ថិតក្នុងទីក្រុងលីម៉ាន់-គូព្យានស្ក៍។
ទីភ្នាក់ងារសារព័ត៌មានរដ្ឋរបស់អ៊ុយក្រែន Ukrinform បានចេញផ្សាយ កាលពីថ្ងៃចន្ទ ថា លោក ស៊ើរហ៊ី ឆេរេវ៉ាទី (Serhii Cherevaty) អ្នកនាំពាក្យ កងទ័ពអ៊ុយក្រែន នៅលើសមរភូមិតំបន់បូព៌ា បានបញ្ជាក់ ថា កម្លាំងទាហានរុស្ស៊ី មិនទទួលបានលទ្ធផលជាវិជ្ជមាន នៅលើសមរភូមិលីម៉ាន់-គូព្យានស្ក៍ នោះឡើយ។ ប៉ុន្ដែកម្លាំងទាហានរុស្ស៊ី មានតែលទ្ធផលអវិជ្ជមានតែប៉ុណ្ណោះ។ បន្ថែមពីលើនេះ គ្រឿងសឹករបស់សត្រូវ ជាច្រើន ត្រូវបានកងទ័ពអ៊ុយក្រែន វាយប្រហារ កម្ទេចចោល រួមមាន រថក្រោះ ប្រភេទ T-72 (តេ-៧២), រថចម្បាំង ប្រភេទ Tyulpan (ទីយូលប៉ាន់) បាញ់គ្រាប់កាំភ្លើងត្បាល់ស្វ័យប្រវត្ដិ ទំហំ២៤០មិល្លីម៉ែត្រ, ឃ្លាំងគ្រាប់រំសេវ, យានយន្ដ និង ដ្រូន។
ពាណិជ្ជកម្ម
អគ្គសេនាធិការ កងទ័ពអ៊ុយក្រែន បានបញ្ជាក់ ថា នៅលើសមរភូមិគូព្យានស្ក៍ គឺកងទ័ពអ៊ុយក្រែន នៅតែបន្ដរក្សាការការពារយ៉ាងរឹងមាំ ហើយបន្ដវាយលុក ប្រកបដោយជោគជ័យ ទៅលើកម្លាំងរបស់រុស្ស៊ី នៅភាគខាងកើត ទីក្រុងបេរេស្ដូវ (Berestov) ស្ថិតក្នុងតំបន់ខាគីវ (Kharkiv) និង នៅជិតទីក្រុងណូវ៉ូសេលីវស្គេ ( Novoselivske) ស្ថិតក្នុងតំបន់លូហានស្ក៍ (Luhansk)។ ជាមួយគ្នានេះដែរ កម្លាំងទាហានរុស្ស៊ី បានវាយប្រហារតាមអាកាស នៅជិតទីក្រុងឌ្រូហ្សេលីវប៊ីវកា (Druzheliubivka) ស្ថិតក្នុងតំបន់ដូណែតស្ក៍ (Donetsk) ។ កាំភ្លើងធំ និង កាំភ្លើងត្បាល់ ត្រូវបានបាញ់ប្រហារ ទៅលើទីតាំងជាង១០កន្លែង រួមមាន អូដ្រាដណេ (Odradne), កូឡូឌៀស្នេ (Kolodiazne), កាមីយ៉ាន់កា (Kamyanka), ហ្វីហូលីវកា (Fyholivka), ណូវ៉ូមលីស្ក៍ (Novomlynsk) និង ហ្សាផាដណេ (Zapadne) ស្ថិតក្នុងតំបន់ខាគីវ (Kharkiv)។
អគ្គសេនាធិការ កងទ័ពអ៊ុយក្រែន បានបង្ហោះនៅលើបណ្ដាញសង្គមហ្វេសប៊ុក កាលពីថ្ងៃចន្ទ ទី៣១ ខែកក្កដា ថា បើគិតចាប់តាំងពីការផ្ទុះសង្គ្រាមមុនដំបូង នៅថ្ងៃទី២៤ ខែកុម្ភៈ ឆ្នាំ២០២២ ដល់ថ្ងៃទី៣១ ខែកក្កដា ឆ្នាំ២០២៣ កងទ័ពអ៊ុយក្រែន បានសម្លាប់ទាហានរុស្ស៊ី នៅលើសមរភូមិ ចំនួន ២៤៦ ១៩០នាក់ ដោយរាប់បញ្ចូលទាំងការសម្លាប់ កាលពី២៤ម៉ោងមុន ចំនួន៤៩០នាក់។
ប្រភពដដែល បានបន្ដ ថា ក្រៅពីនេះ អ៊ុយក្រែន ក៏បានបាញ់កម្ទេចគ្រឿងសឹករបស់រុស្ស៊ី យ៉ាងច្រើនផងដែរ រួមមាន យន្ដហោះចម្បាំង ចំនួន ៣១៥គ្រឿង, ឧទ្ធម្ភាគចក្រ ចំនួន៣១១គ្រឿង, នាវាចម្បាំងតូចធំចំនួន១៨គ្រឿង, រថក្រោះចំនួន៤ ២១១គ្រឿង, រថពាសដែក ចំនួន ៨ ១៨៨គ្រឿង, ប្រព័ន្ធកាំភ្លើងធំ ចំនួន ៤ ៨១៦គ្រឿង, ប្រព័ន្ធរ៉ុក្កែតចម្រុះ ចំនួន៦៨៨គ្រឿង, ប្រព័ន្ធការពារដែនអាកាស ចំនួន៤៦០គ្រឿង, មីស៊ីលគ្រូស ចំនួន ១៣៤៧គ្រឿង, ដ្រូន ចំនួន ៤០១៧គ្រឿង, រថយន្ដដឹកប្រេង និង យានយន្ដ ចំនួន៧២៩២គ្រឿង និង គ្រឿងចក្រពិសេស ចំនួន ៧១៥គ្រឿង។
ដោយឡែក រុស្ស៊ី វិញ បានអះអាង កាលពីថ្ងៃចន្ទ ថា ទាហានរបស់ខ្លួន បានបាញ់ទម្លាក់យន្ដហោះវាយប្រហាររបស់អ៊ុយក្រែន ប្រភេទ Su-25 ចំនួន១គ្រឿង, កម្ទេចដ្រូន ចំនួន២៣គ្រឿង និង បាញ់ស្ទាក់គ្រាប់រ៉ុក្កែតហាម៉ាស (HIMARS) ផលិតដោយអាមេរិក ចំនួន១២គ្រាប់។
បើតាមទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី Tass បានឲ្យដឹង ថា លោក អ៊ីហ្គ័រ កូណាសែនកូវ (Igor Konashenkov) អ្នកនាំពាក្យ ក្រសួងការពារជាតិរុស្ស៊ី បានអះអាង ថា ប្រព័ន្ធការពារដែនអាកាសរបស់ខ្លួន បានបាញ់ទម្លាក់យន្ដហោះរបស់អ៊ុយក្រែន ប្រភេទ Su-25 (ស៊ូ-២៥) ចំនួន១គ្រឿង នៅតំបន់ដូណែស្ក៍។ ក្រៅពីនេះ កម្លាំងទាហានរុស្ស៊ី ក៏បានកម្ទេចដ្រូនរបស់សត្រូវ ចំនួន២៣គ្រឿងបន្ថែមទៀត។
បើទោះជាយ៉ាងណាក៏ដោយ សេចក្ដីរាយការណ៍ទាំងនេះ គ្រាន់តែជាការអះអាងរបស់ភាគីជម្លោះទាំង២ រវាងអ៊ុយក្រែន និង រុស្ស៊ី តែប៉ុណ្ណោះ ប៉ុន្ដែគេមិនទាន់ឃើញ មានប្រភពឯករាជ្យណាមួយ បញ្ជាក់នោះដែរ។ មិនតែអ៊ុយក្រែន នោះឡើយ សូម្បីតែរុស្ស៊ី ជាមហាអំណាចយោធាកំពូលលំដាប់លេខ២ នៅលើពិភពលោក តែងតែលាក់បាំង ចំនួនទាហានរបស់ខ្លួន រងគ្រោះថ្នាក់ ស្លាប់ និង រងរបួស ក្រោមហេតុផល វាជាកិច្ចការសន្ដិសុខជាតិ៕