រាជធានីរីយ៉ាដ (Riyadh)៖ រដ្ឋាភិបាលក្រុងវ៉ាស៊ីនតោន បានបញ្ជូននាវាចម្បាំងដ៏ទំនើប ចំនួន២គ្រឿង និង កម្លាំងទាហានម៉ារីន ជាង៣ពាន់នាក់ ទៅដាក់ពង្រាយ នៅសមុទ្រក្រហម ចំពេលមានការគំរាមកំហែងកាន់តែខ្លាំងឡើង ពីអ៊ីរ៉ង់ និង រុស្ស៊ី នៅតំបន់មជ្ឈិមបូព៌ា ហើយឥឡូវនេះ មន្ទីរបញ្ចកោណ បានអះអាងជាថ្មី អំពីការប្ដេជ្ញាចិត្តរបស់សហរដ្ឋអាមេរិក ចំពោះចំណងទំនាក់ទំនងយោធាដ៏រឹងមាំ ជាមួយនឹងប្រទេសអារ៉ាប៊ីសាអូឌីត។
បណ្ដាញទូរទស្សន៍អារ៉ាប់អន្ដរជាតិ Alarabiya News បានផ្សាយ កាលពីព្រឹក ថ្ងៃព្រហស្បតិ៍ ទី១០ ខែសីហា ថា មន្ទីរបញ្ចកោណ នៃក្រសួងការពារជាតិសហរដ្ឋអាមេរិក បានបញ្ជាក់ កាលពីថ្ងៃពុធ (ទី៩ ខែសីហា) ថា សហរដ្ឋអាមេរិក បានធានាជាថ្មីនូវការប្ដេជ្ញាចិត្តរបស់ខ្លួន ដល់ប្រទេសអារ៉ាប៊ីសាអូឌីត ចំពោះចំណងទំនាក់ទំនងយោធាដ៏រឹងមាំ ជាមួយនឹងព្រះរាជាណាចក្រនៅតំបន់មជ្ឈិមបូព៌ាមួយនេះ។
ប្រធានគោលនយោបាយកំពូលរបស់មន្ទីរបញ្ចកោណ បានធ្វើអត្ថាធិប្បាយបែបនេះ នៅក្នុងអំឡុងពេលនិយាយតាមទូរស័ព្ទ ជាមួយព្រះអង្គម្ចាស់ អាប់ឌូលរ៉ាម៉ាន់ ប៊ីន អាយយ៉ាហ្វ អាល់-មូគ្រីន( Abdulrahman bin Ayyaf al-Muqrin) អនុរដ្ឋមន្ត្រី ក្រសួងការពារជាតិរបស់អារ៉ាប៊ីសាអូឌីត។
លោកវរសេនីយ៍ ម៉ាទីន មេន័រស៍ (Martin Meiners) អ្នកនាំពាក្យ មន្ទីរបញ្ចកោណ បានបញ្ជាក់ នៅក្នុងសេចក្តីថ្លែងការណ៍មួយ ថា «លោកស្រី សាសា អិន. បេឃ័រ (Sasha N. Baker) អនុរដ្ឋមន្ត្រី មន្ទីរបញ្ចកោណ ទទួលបន្ទុកគោលនយោបាយ បានសាទរដល់សមភាគីរបស់លោកស្រី ចំពោះការតែងតាំង កាលពីពេលថ្មីៗនេះ។ លោកស្រីអនុរដ្ឋមន្ដ្រី ក៏បានអះអាងឡើងវិញ អំពីការប្តេជ្ញាចិត្តរបស់សហរដ្ឋអាមេរិក ចំពោះភាពជាដៃគូការពារជាតិដ៏រឹងមាំ ជាមួយនឹងប្រទេសអារ៉ាប៊ីសាអូឌីត»។
អ្នកនាំពាក្យ ក្រសួងការពារជាតិសហរដ្ឋអាមេរិក រូបនេះ បានបន្ថែម ថា មន្ត្រីទាំងពីរប្រទេសនេះ ក៏បានគូសបញ្ជាក់ អំពីការស៊ូទ្រាំ និង សារៈសំខាន់ សម្រាប់ភាពជាដៃគូយុទ្ធសាស្ត្រ រវាងសហរដ្ឋអាមេរិក និង អារ៉ាប៊ីសាអូឌីត អស់រយៈពេលជាង៨០កន្លងមកនេះ។
កាលពីដើមឆ្នាំ២០២៣ សហរដ្ឋអាមេរិក និង អារ៉ាប៊ីសាអូឌីត បានបញ្ចប់នូវសមយុទ្ធ ប្រឆាំងនឹងដ្រូនរួមគ្នា ជាលើកដំបូងរបស់ប្រទេសទាំង២ នៅឯមជ្ឈមណ្ឌលសាកល្បងយោធាថ្មី ស្ថិតក្នុងរាជធានីរីយ៉ាដ។ កងទ័ព នៃប្រទេសទាំង២នេះ កាលពីចុងខែឧសភា កន្លងទៅ ក៏បានធ្វើសមយុទ្ធយោធារួមគ្នា នៅក្នុងប្រទេសអារ៉ាប៊ីសាអូឌីត។ សមយុទ្ធ Eagle Resolve 23 ត្រូវបានរៀបំឡើង សម្រាប់ពង្រឹងសមូហភាព រវាងសហរដ្ឋអាមេរិក-អារ៉ាប៊ីសាអូឌីត និង ក្រុមប្រឹក្សាសហប្រតិបត្តិការឈូងសមុទ្រ (GCC) របស់ប្រទេសជាដៃគូ ក៏ដូចជា ការធ្វើឱ្យប្រសើរឡើងនូវអន្តរប្រតិបត្តិការរបស់កងកម្លាំង ដើម្បីរួមចំណែកជួយដល់ស្ថិរភាព នៅក្នុងតំបន់។
មន្ទីរបញ្ចកោណ បានបញ្ជាក់ ថា នេះជាលើកដំបូង ដែលសមយុទ្ធពហុដែន បានផ្តោតជាចម្បងលើកិច្ចការពារដែនអាកាស មីស៊ីល និង ការរារាំងនៅដែនសមុទ្រ។
កងនាវារបស់ប្រទេសអារ៉ាប៊ីសាអូឌីត ក៏បានរួមដំណើរជាមួយនាវាចម្បាំងរបស់សហរដ្ឋអាមេរិក ដែលទើបនឹងដាក់ពង្រាយ នៅសមុទ្រក្រហម។ ទាហានម៉ារីនរបស់សហរដ្ឋអាមេរិក ជាង ៣០០០នាក់ និង នាវាពិឃាដ បំពាក់ដោយមីស៊ីលដឹកនាំ បានទៅដល់តំបន់មជ្ឈិមបូព៌ា កាលពីថ្ងៃអាទិត្យ ដើម្បីឆ្លើយតបទៅនឹងការគំរាមកំហែងរបស់អ៊ីរ៉ង់ និង រុស្ស៊ី នៅក្នុងរយៈពេលប៉ុន្មានខែកន្លងទៅថ្មីៗនេះ នៅក្នុងអ្វីដែលជាផ្នែកមួយ នៃការដាក់ពង្រាយ នៅមុនការប្រកាស៕
