(ទីក្រុងតូក្យូ)៖ ជប៉ុននៅតែចាត់ទុកកម្មវិធីអាវុធនុយក្លេអ៊ែររបស់ប្រទេសនេះថាជាការគម្រាមកំហែងដ៏ធ្ងន់ធ្ងរមកលើខ្លួនដដែល បើទោះបីជាមានការធូស្រាលផ្នែកនយោបាយនៅក្នុងតំបន់ឧបទ្វីបកូរ៉េយ៉ាងណាក៏ដោយ។ នេះបើតាមឯកសាររបស់ក្រសួងការពារជាតិជប៉ុន ដែលបាននិយាយនៅថ្ងៃអង្គារទី២៨ សីហានេះ។
ឯកសារនោះបាននិយាយថា «ដោយពិចារណាលើការពិតដែលថា កូរ៉េខាងជើងហាក់ដូចជាមាន និងដាក់ពង្រាយមីស៊ីល Nodong រាប់រយគ្រាប់ដែលមានសមត្ថភាពវាយប្រហារទៅដល់ស្ទើរគ្រប់ផ្នែកនៃប្រទេសជប៉ុន ក៏ដូចជាការរីកចម្រើនខាងសមត្ថភាពអភិវឌ្ឍន៍ និងប្រតិបត្តិការនៃអាវុធនុយក្លេអ៊ែរ និងគ្រាប់មីស៊ីល តាមរយៈការសាកល្បងនុយក្លេអ៊ែរម្តងហើយម្តងទៀត ហើយមីស៊ីលផ្លោងដែលបានបាញ់បង្ហោះរហូតមកដល់ពេលនេះ មិនមានការប្រែប្រួលណាមួយ ក្នុងការទទួលស្គាល់ជាមូលដ្ឋាន ពាក់ព័ន្ធទៅនឹងការគម្រាមកំហែងនៃអាវុធ និងគ្រាប់មីស៊ីលរបស់កូរ៉េខាងជើងនៅឡើយទេ»។
យោងទៅតាមឯកសារដដែលនោះ ជប៉ុនក៏នឹងពង្រឹងបណ្តាញការពារដែនអាកាសរបស់ខ្លួន តាមរយៈការដាក់ឱ្យប្រើប្រាស់នូវប្រព័ន្ធការពារមីស៊ីល ដែលបាញ់ចេញពីដីផលិតឡើងដោយអាមេរិកប្រភេទ Aegis Ashore។
ឯកសារនោះបន្តថា «ដើម្បីការពារជប៉ុនឲ្យបានគ្រប់ពេលវេលា វាចាំបាច់ក្នុងការបង្កើនសមត្ថភាពការពារមីស៊ីលផ្លោង។ ដូច្នេះក្រុមប្រឹក្សាសន្តិសុខជាតិ និងគណៈរដ្ឋមន្ត្រីបានអនុម័យលើការណែនាំនូវប្រព័ន្ធការពារមីស៊ីល Aegis កាលពីខែធ្នូ ២០១៧»។
ទីក្រុងតូក្យូគ្រោងនឹងដាក់ពង្រាយប្រព័ន្ធការពារគ្រាប់មីស៊ីលប្រភេទនេះ ដើម្បីការពារប្រទេសពីការវាយប្រហារដោយគ្រាប់មីស៊ីលពីសំណាក់កូរ៉េខាងជើង។
កាលពីខែកក្កដា ប្រធានផ្នែកស៊ើបការណ៍ជាតិអាមេរិក លោក Daniel Coats មានការសង្ស័យថា កូរ៉េខាងជើងនឹងធ្វើការរុះរើកម្មវិធីនុយក្លេអ៊ែររបស់ខ្លួន ក្នុងរយៈពេល ១ឆ្នាំ។ ប៉ុន្តែថ្មីៗកន្លងទៅនេះ ប្រព័ន្ធផ្សព្វផ្សាយរបស់អាមេរិកបានចេញផ្សាយថា កូរ៉េខាងជើងកំពុងតែផលិតគ្រាប់មីស៊ីលប្រភេទថ្មីបន្ថែមទៀត ដែលអាចវាយទៅដល់ទឹកដីកូរ៉េខាងជើងបាន។ ប្រទេសនេះថ្មីៗនេះ ក៏បានផ្អាកការរុះរើនូវកម្មវិធីអាវុធនុយក្លេអ៊ែររបស់ខ្លួនបន្ថែមទៀតដែរ។
សូមរំឭកថា កាលពីឆ្នាំមុន កូរ៉េខាងជើងបានធ្វើការបាញ់គ្រាប់មីស៊ីលស្ទើរៀងរាល់ខែ ជាពិសេសចំពេលដែលប្រទេសនេះប្រារព្ធនូវកម្មវិធីអ្វីមួយឡើង។ ក្រៅពីបាញ់មីស៊ីលរំលងទឹកដីជប៉ុន ប្រទេសមួយនេះ ក៏បានគម្រាមបាញ់គ្រាប់មីស៊ីលទៅទម្លាក់នៅក្នុងរង្វង់ដែនដីនៃកោះហ្គាំផងដែរ។ កាលនោះលោកត្រាំបានចេញសេចក្តីថ្លែងការណ៍តបវិញទាំងក្តៅក្រហាយថា កូរ៉េខាងជើងនឹងត្រូវជួបជាមួយភ្លើង និងកំហឹង៕DNT-NEWS
Home ព្រឹត្តិការណ៍ថ្មីៗ ទីក្រុងតូក្យូ៖ កូរ៉េខាងជើងមានគ្រាប់មីស៊ីល Nodong និងកំពុងតែដាក់ពង្រាយមីស៊ីលទាំងនេះរាប់រយគ្រាប់