លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា ទទួលមរណភាពនៅព្រឹកថ្ងៃទី០៩ ខែកញ្ញា ឆ្នាំ២០១៨ ក្នុងជន្មាយុ៧១ឆ្នាំក្នុងទីក្រុង Zurichនៃប្រទេសស្វីស។ នេះបើយោងតាមសេចក្តីប្រកាសព័ត៌មានរបស់មូលនិធិគន្ធបុប្ជា ។
ជាមួយនេះដែរមូលនិធិគន្ធបុប្ផា តាមរយៈសេចក្តីជូនដំណឹងរបស់ខ្លួន បានផ្តល់ឱកាសដល់សាធារណជនទូទៅអាចចូលរួមសំដែងមរណទុក្ខ និងសេចក្តីរំលឹកដឹងគុណចំពោះវិញ្ញាណក្ខន្ធលោកវេជ្ជបណ្ឌិត បេអាត រីចឈ្នឺរ នៅមជ្ឈមណ្ឌលព័ត៌មាននៃមន្ទីរពេទ្យគន្ធបុប្ឆាភ្នំពេញ (ជិតវត្តភ្នំ) និងនៅមន្ទីរពេទ្យជ័យវរ្ម័នទី៧ក្នុងខេត្តសៀមរាប នាថ្ងៃទី១០ ខែកញ្ញា ចាប់ពីម៉ោង១០ព្រឹកទៅ។
ដោយឡែកសម្រាប់ ក្រសួងសុខាភិបាល តាមរយ:លោក ម៉ម ប៊ុនហេង ជារដ្ឋមន្ត្រី ក៏បានជម្រាបជូនសាធារណជនថា ក្រសួងសុខាភិបាល កំពុងគិតគូររៀបចំពិធីគោរពវិញ្ញាណក្ខន្ធសព ឯកឧត្តមសាស្ត្រាចារ្យ វេជ្ជបណ្ឌិត Beat Richner ដើម្បីសម្តែងនូវការគោរពដល់គាត់ ដែលពិធិគោរពវិញ្ញាណក្ខន្ធសពរបស់គាត់នេះ នឹងប្រព្រឹត្តទៅនៅទីស្តីការក្រសួងសុខាភិបាល នៅថ្ងៃទី១០ ខែកញ្ញា ឆ្នាំ២០១៨ វេលាម៉ោង៣រសៀល ។
នាពេលកន្លងមកម្ចាស់ស្ថាបនិកមន្ទីរពេទ្យគន្ធបុប្ផារូបនេះធ្លាប់បានប្រកាសលាលែងពីតំណែង តាមរយៈសេចក្ដីប្រកាសព័ត៌មានរបស់មន្ទីរពេទ្យគន្ធបុប្ផាចុះថ្ងៃទី២៨ ខែមីនា ឆ្នាំ២០១៨។ មូលហេតុដែលប្រកាសលាឈប់នេះ ដោយសារលោកវេជ្ជបណ្ឌិត Beat Richner ធ្លាក់ខ្លួនឈឺធ្ងន់។លោកBeat Richner នឹងប្រគល់តំណែងតួនាទីទៅឲ្យលោកវេជ្ជបណ្ឌិត Peter Studer ដែលជាអនុប្រធានមន្ទីរពេទ្យនាពេលបច្ចុប្បន្ន។ បច្ចុប្បន្នមន្ទីរពេទ្យគន្ធបុប្ផាមានបុគ្គលិកកំពុងបំរើការងារចំនួនពីរពាន់ប្រាំរយនាក់។ ទោះជាស្ថាបនិករូបនេះ ធ្លាក់ខ្លួនឈឺធ្ងន់យ៉ាងណាក៏ដោយលោកBeat Richner នៅតែអះអាងថា មន្ទីរពេទ្យគន្ធបុប្ផាគ្រប់សាខាទាំងនៅភ្នំពេញ និងសៀមរាបនៅតែដំណើរការធម្មតា។
គួរបញ្ជាក់ផងដែរថា មន្ទីរពេទ្យគន្ធបុប្ផាជួយសង្គ្រោះព្យាបាលកុមារខ្មែររាប់ម៉ឺននាក់ក្នុងមួយឆ្នាំៗឥតគិតថ្លៃ គិតរហូតមកដល់ពេលនេះ មានអាយុកាល ២៦ឆ្នាំហើយ បន្ទាប់ពីដាក់ឲ្យដំណើរការក្នុងឆ្នាំ ១៩៩២។ មន្ទីរពេទ្យគន្ធបុប្ផា ដែលក្នុងមួយថ្ងៃចំណាយជាង ១២ម៉ឺនដុល្លារ ដែលថវិការនេះបានមកពីលោកវេជ្ជបណ្ឌិត Beat Richner បានសម្ដែងសិល្បៈតាមរយៈការលេងសូរឡូ ឬកូដវីយូឡុង ដើម្បីប្រមែប្រមូលថវិកាពីសប្បុរសធម៌ដើម្បីជួយទ្រទ្រង់មន្ទីរពេទ្យគន្ធបុប្ឆានេះ។ បើគិតត្រឹមឆ្នាំ ២០១៦ មន្ទីរពេទ្យគន្ធបុប្ផាចំណាយថវិកាអស់ជាង ៥០០លានដុល្លារក្នុងការព្យាបាលកុមារ។ ហើយ ២៤ឆ្នាំមកនេះមន្ទីរពេទ្យគន្ធបុប្ផាព្យាបាលកុមារចំនួន 16លាននាក់។
ក្នុងនោះ 1.6លាននាក់ស្ថិតនៅក្នុងស្ថានភាពជំងឺធ្ងន់ធ្ងរ។ក្នុងមួយខែៗមន្ទីរពេទ្យគន្ធបុប្ផា នៅភ្នំពេញ និងនៅសៀមរាប បានជួយពិនិត្យ ព្យាបាលជំងឺដោយឥតគិតថ្លៃដល់ប្រជាពលរដ្ឋកម្ពុជាភាគច្រើនជាកុមារជាង ៨ម៉ឺននាក់៕
Home ព្រឹត្តិការណ៍ថ្មីៗ ពលរដ្ឋកម្ពុជា អាចចូលរួមសំដែងមរណទុក្ខ និងសេចក្តីរំលឹកដឹងគុណចំពោះវិញ្ញាណក្ខន្ធលោកវេជ្ជបណ្ឌិត បេអាត រីចឈ្នឺរ ស្ថាបនិកមន្ទីរពេទ្យគន្ធបុប្ផា បាននៅមន្ទីរពេទ្យគន្ធបុប្ឆាភ្នំពេញ (ជិតវត្តភ្នំ)និងនៅមន្ទីរពេទ្យជ័យវរ្ម័នទី៧ក្នុងខេត្តសៀមរាប !