បើទោះជាបានក្លាយជាអ្នកជំនួញ និងមានតំណែងជាទីប្រឹក្សា ប្រចាំក្រសួងមួយ ប៉ុន្តែតារាចម្រៀងចាស់វស្សា ដែលត្រូវគេស្គាល់ថាជាពិធីករវិទ្យុជាតិផង បានអះអាងថាលោកមិនបោះបង់ការងារសិល្បៈនោះទេ ដោយលោកទើបនឹងធ្វើអ្នកសិល្បៈភាគច្រើនចាប់អារម្មណ៍នឹងការផលិតកម្មកម្សាន្តបន្តផ្ទាល់មួយ ដែលជាកម្មវិធីទទួលបានការគាំទ្រខ្ពស់មួយ នៅលើបណ្ដាញហ្វេសប៊ុកនោះផង។ ក្រៅពីធ្វើអោយកម្មវិធីកម្សាន្តមួយនេះ លេចរូបរាងកាន់តែខ្លាំង លោកក៏បានប្រកាសថានឹងបញ្ចេញស្នាដៃអោយសកម្មជួយជំរុញដល់វិស័យសិល្បៈផងដែរ។
លោក កុយ ស៊ីឌឿន ម្ចាស់ផលិតកម្មឌីភី និយាយថា ការផលិតកម្មវិធីកម្សាន្ត ដែលលោកបានផ្សាយបន្តផ្ទាល់លើផេកក្លិបសិល្បៈឌីភី ដែលមហាជនបានឃើញនៅរៀងរាល់ថ្ងៃអង្គារ និងថ្ងៃព្រហស្បតិ៍ ចាប់ពីម៉ោង៧ដល់ម៉ោង៩យប់នោះ មិនមែនជាការចំណាយតិចតួចនោះទេ ដោយសារតែលោកបានរៀបចំទម្រង់កម្មវិធីទាំងមូល អោយមានលក្ខណៈមិនខុសពីកម្មវិធីរបស់ទូរទស្សន៍មួយ ក្នុងបំណងអោយតារាសិល្បៈចាស់ក្មេងប៉ះគ្នា។
លោកថាកម្មវិធីកម្សាន្តមួយនេះ លោកតែងអញ្ជើញតារាសិល្បៈល្បីៗទាំងផ្នែកយុវវ័យ និងតារាជើងចាស់មួយរូប អោយផ្ដល់កិច្ចសម្ភាសន៍ជុំគ្នា ដោយមិនប្រកាន់ថាជាតារាសម្ដែង តារាចម្រៀង ឬតារាកំប្លែង នោះឡើយ ដោយក្រៅពីបង្ហាញសមត្ថភាពសិល្បៈ ក៏ផ្ដល់បទពិសោធន៍អោយគ្នាទៅវិញទៅមក។ បំណងទាំងមូលរបស់កម្មវិធី លោកថាចង់គាស់កកាយតារាមួយចំនួន ដែលមហាជនចង់ភ្លេចមុខអោយមានឱកាសបង្ហាញស្នាដៃជាថ្មី ជាពិសេសគឺបានបញ្ចេញសំលេង និងរូបពិតអោយមហាជនបានឃើញ។ ក្នុងនោះលោកថាកម្មវិធី មិនផ្ដោតតែលើការច្រៀងរាំ និងការបង្ហាញសមត្ថភាពរបស់សិល្បករនោះទេ ប៉ុន្តែក៏ផ្ដោតជាសំខាន់លើសំនួរឈ្នះរង្វាន់ ដែលសំនួរទាំងនោះសុទ្ធតែពាក់ព័ន្ធពីវប្បធម៌ និងច្បាប់ចរាចរណ៍ និងពីចំណេះដឹងប្រចាំថ្ងៃ ដែលមនុស្សមើលរំលង។
លោក កុយ ស៊ីឌឿន បញ្ជាក់ថាអ្វីដែលលោកបានធ្វើ គឺដោយសារតែចង់រួមចំណែកជួយអោយសកម្មភាពសិល្បករមានការផុសផុស ជាពិសេសគឺបានរួមចំណែកជួយអោយកេរ្តិ៍ឈ្មោះរបស់តារាសិល្បៈមួយចំនួនអណ្ដែតឡើងអោយកាន់តែប្រសើរ អ៊ីចឹងហើយទើបលោកប្រកាសចំណាយផលិតកម្មវិធីទាំំងមូល ដោយមិនខ្វល់ពីការខាតបង់។ លោកគម្រោងនឹងធ្វើកម្មវិធីមួយចំនួនផ្សេងទៀត ដែលអាចជំរុញអោយមានការឈានឡើងក្នុងនាមជាអ្នកសិល្បៈមួយរូប ដើម្បីបង្ហាញថាបើទោះជាលោកបានក្លាយជាអ្វី ក៏លោកនៅតែជាអ្នកសិល្បៈ។ យ៉ាងណាមិញ លោកថាកម្មវិធីបន្តផ្ទាល់ដែលលោកបានផលិតរៀងរាល់ថ្ងៃអង្គារ និងថ្ងៃព្រហស្បតិ៍នោះ នឹងកាត់នៅថ្ងៃអង្គារចោល ចាប់ពីរដូវប្រាំងតទៅ ដោយសារតែក្នុងពេលនោះ លោកក៏រវល់ ហើយតារាសិល្បៈល្បីៗភាគច្រើន ក៏មិនងាយអញ្ជើញ៕DNT-NEWS