បន្ទាប់ពីកញ្ញានីតា វរវង្ស ធ្លាប់បានបង្ហើបប្រាប់ថា នាងនឹងធ្វើអោយខ្លួនលេចធ្លោក្នុងការសម្ដែងភាពយន្ដនោះ ថ្មីៗនេះគេសង្កេតឃើញថា នាងពិតជាដណ្ដើមបានប្រជាប្រិយភាពពីមហាជនពិតប្រាកដមែន។
កន្លងមកតារាសម្ដែងរូបស្រស់នីតា វរវង្សបាននិយាយប្រាប់ថា នាងចង់អោយទស្សនិកជនជាច្រើនទទួលស្គាល់នូវទេពកោសល្យសម្ដែងរបស់ខ្លួន ដោយសារតែនាងមាននិស្ស័យតាំងពីកំណើតផង និងមានឈាមជ័រជាអ្នកសិល្បៈផង។ ជាការពិតថ្មីៗនេះនាងតែងតែមានវត្ដមានក្នុងការសម្ដែងភាពយន្ដភាគរបស់ស្ថានីយទូរទស្សន៍ជាច្រើន។ជាក់សម្ដែងនាពេលខាងមុខឆាប់ៗនេះនាងនឹងបង្ហាញខ្លួននៅក្នុងរឿ«មិត្ដឫស្យា»។
ជួបក្នុងពិធីក្រុងពាលីរឿង«មិត្ដឫស្យា»ដែលជាវណ្ណកម្មថី្មរបស់ស្ថានីទូរទស្សន៍ប៉ុស្ដិ៍លេខ៥ កញ្ញានីតា វរវង្ស បានប្រាប់ថា កន្លងមកនាងទទួលបានការសម្ដែងច្រើននៅក្នុងរឿងភាគទូរទស្សន៍ ហើយភាគច្រើនសម្ដែងជាតួកាច។ យ៉ាងណាម៉ិញនៅក្នុងរឿង«មិត្ដឫស្យា»នេះអ្នកដឹកនាំរឿងក៏តម្រូវអោយនាងសម្ដែងជាតួឆ្នាស់ដែរ។
កញ្ញា នីតា វរវង្ស បញ្ជាក់ថា៖«កាលពីចូលសិល្បៈដំបូងខ្ញុំធ្លាប់ប្រាថ្នាចង់សម្ដែងជាតួអង្គធំមួយរូបដែរ ពិសេសតួស្លូតតែម្ដង ប៉ុន្ដែក្រោយពីសម្ដែងជាច្រើនរឿងត្រូវបានអ្នកដឹកនាំរឿងប្រាប់ថា ទម្រង់មុខខ្ញុំស៊ីទៅនឹងតួឆ្នាស់ គួបផ្សំនឹងមានការគាំទ្រទៅលើតួអង្គបែបនេះផងខ្ញុំគិតថា ទោះបីជាតួងកាចឆ្នាស់ក៏ខ្ញុំសប្បាយចិត្ដដែរ ព្រោះការសម្ដែងផ្ដោតសំខាន់លើការគាំទ្រ។ បើទស្សនិកជនគាំទ្រលើតួអង្គឆ្នាស់ដូច្នេះមានតែខ្ញុំប្រឹងបង្កើនទេពកោសល្យខ្លួនបន្ថែមទៀត»។
ទោះជាយ៉ាងនេះក្ដីតារាសម្ដែងវ័យក្មេង ដែលទទួលបានបទពិសោធន៍ច្រើនរឿងហើយនោះ បានប្រាប់ទៀតថា ក្នុងការងារសិល្បៈទោះបីជាអោយនាងសម្ដែងតួអង្គប្រភេទណាក៏នាងអាចទៅរួចដែរ តែអ្វីសំខាន់គឺនាងត្រូវធ្វើតម្រូវចិត្ដអ្នកគាំទ្រខ្លួន។ ជាមួយគ្នានេះដែរនាងក៏បង្ហាញក្ដីរំពឹងក្នុងរឿង«មិត្ដឫស្យា»ថាពិតជាមានការគាំទ្រជាងមុន។ នាងនឹងប្រឹងប្រែងអោយអស់ពីសមត្ថភាពមិនអោយចាញ់រឿងមុនៗឡើយ។ម្យ៉ាងរឿងនេះក៏បានចូលរួមសម្ដែងពីសំណាក់តារាល្បីៗជាច្រើនផងដែរ៕