បារាំងត្រូវបានកំណត់ថា នឹងបញ្ជូនយានចម្បាំងទៅកាន់ទៅលានប្រយុទ្ធជាមួយក្រុមបាតុករ ដើម្បីចាត់វិធានការប្រឆាំងក្រុមបាតុករអាវលឿង ដែលបានបំផ្លិចបំផ្លាញទីក្រុងប៉ារីស។
នាយករដ្ឋមន្ត្រីបារាំង លោក Édouard Philippe បាននិយាយកាលពីថ្ងៃព្រហស្បតិ៍ថា កងកម្លាំងសន្តិសុខត្រូវបានកំណត់ថានឹងបញ្ជូនទៅកាន់តំបន់ ដែលកំពុងតែប្រឈមមុខដាក់គ្នាជាមួយនឹងយានចម្បាំង Berliet VXB-170s រួមទាំងប៉ូលីស ៨ពាន់នាក់ ដើម្បីធានានូវសន្តិសុខដល់ទីក្រុងប៉ារីស។ លោកហ្វីលីបបានចង្អុរបង្ហាញពីការបំផ្លិចបំផ្លាញនៃទ្រព្យសម្បត្តិ នៅក្នុងការបង្ហាញពីវិធានការដ៏កម្រមួយ។
លោកហ្វីលីពបានប្រាប់ទូរទស្សន៍បារាំង TF1 ថា: «យើងកំពុងប្រឈមមុខនឹងមនុស្សដែលមិននៅទីនោះ មិនមែនដើម្បីធ្វើបាតុកម្មនោះទេ ប៉ុន្តែដើម្បីបំផ្លិចបំផ្លាញ យើងចង់ធានាថា យើងមិនទុកឱ្យពួកគេធ្វើដូចដែលពួកគេចង់បាននោះទេ»។
យានចម្បាំងបារាំងជាច្រើនត្រូវបានគេសង្កេតឃើញដោយកម្រ នៅក្នុងទីក្រុងធំៗបារាំងជាច្រើន។ យានចម្បាំងប្រភេទនេះ ក៏ត្រូវបានបារាំងធ្លាប់ដាក់ពង្រាយ ដើម្បីជម្លៀសក្រុមសកម្មជន នៅឯសហគមន៍ Notre-Dame-des-Landes កាលពីខែមេសា ហើយយាននេះក៏ត្រូវបានបារាំងដាក់ពង្រាយ ក្នុងកំឡុងពេលនៃកុប្បកម្មកាលពីឆ្នាំ ២០០៥ដែរ។
ប្រទេសបារាំងបានជួបប្រទះភាពវឹកវរនៃភាពចលាចលសង្គមជាញឹកញាប់ ប៉ុន្តែភាពចលាចលដែលកំពុងបន្តនាពេលនេះ ត្រូវបានគេចាត់ទុកថាជាហេតុការណ៍ដ៏អាក្រក់ ដែលប្រទេសនេះមិនដែលបានជួបប្រទះ ក្នុងរយៈពេលកន្លះសតវត្សនេះ ខណៈដែលកុប្បកម្មនេះបង្កឲ្យមានមនុស្សមួយចំនួនបានស្លាប់ និងមនុស្សជាច្រើនត្រូវបានចាប់ខ្លួន។
វិធានការនេះត្រូវបានរៀបចំឡើងដើម្បីប្រយុទ្ធប្រឆាំងនឹងការប្រែប្រួលអាកាសធាតុ ដោយការដំឡើងថ្លៃប្រេងឥន្ធនៈប៉ុន្តែបានធ្វើឱ្យមានកំហឹងយ៉ាងខ្លាំងពីក្រុមអ្នកតវ៉ា ដែលមនុស្សជាច្រើនបានទាមទារនូវការលាលែងពីតំណែងរបស់លោកម៉ាក្រូន៕
