សារព័ត៌មានញូសវីក បានចេញផ្សាយនៅថ្ងៃទី២៥ ធ្នូនេះថា មន្ត្រីការទូតជាន់ខ្ពស់របស់ទីក្រុងម៉ូស្គូបានអះអាងថា ប្រទេសរុស្ស៊ីកំពុងប្រឹងប្រែងអស់ពីសមត្ថភាពដើម្បីបញ្ជៀសជម្លោះជាមួយសហរដ្ឋអាមេរិក ប៉ុន្តែប្រទេសទាំងពីរហាក់ដូចជាស្ថិតនៅលើវិថីដ៏គ្រោះថ្នាក់មួយ ដែលអាចនាំទៅរកការប៉ះទង្គិចគ្នាដោយសារតែកង្វះទំនាក់ទំនង។
នៅពេលដែលត្រូវបានសួរកាលពីថ្ងៃចន្ទអំពីលទ្ធភាពនៃការផ្ទះសង្គ្រាមរវាងសហរដ្ឋអាមេរិក ដែលដឹកនាំអង្គការណាតូជាមួយនឹងប្រទេសរុស្ស៊ី រដ្ឋមន្ត្រីការបរទេសរុស្ស៊ី លោក Sergey Larov បានប្រាប់សារព័ត៌មានស្ពុតនិករុស្ស៊ីថា «គ្រាប់ៗគ្នានៅលើពិភពលោកនេះបានយល់ច្បាស់អំពីរឿងនេះ រឿងដែលពាក់ព័ន្ធទៅនឹងសង្គ្រាមរវាងមហាអំណាចទាំងពីរ រុស្ស៊ី និងសហរដ្ឋអាមេរិកនឹងមានផលវិបាកមហន្តរាយសម្រាប់មនុស្សជាតិ»។ លោកបានបន្ទរតាមការព្រមានពីមុនថា «មិនបាច់សង្ស័យថាមានអ្នកណាឈញនះលើសង្គ្រាមនុយក្លេអ៊ែរទេ ហើយក៏មិនគួរបញ្ចេញវាដែរ»។
លោកឡាវរ៉ូវបាននិយាយថា ក្រុងវ៉ាស៊ីនតោន និងសម្ព័ន្ធមិត្តរបស់ខ្លួន ស្រមៃដល់មហិច្ឆតាភូមិសាស្ត្រនយោបាយរបស់ពួកគេ ហើយមិនត្រៀមខ្លួនដើម្បីសម្របខ្លួនទៅនឹងការពិតដែល មិនបានផ្លាស់ប្តូរបំណងរបស់ខ្លួនឡើយ។ ជាលទ្ធផលលោកបាននិយាយថា ការសន្ទនាគ្នាត្រូវបានផ្អាកហើយ កិច្ចព្រមព្រៀងអន្តរជាតិដូចជាសន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF) កំពុងស្ថិតនៅក្នុងគ្រោះថ្នាក់នៃការលុបចោល ដែលបង្កើតនូវសមីការកាន់តែគ្រោះថ្នាក់ថែមទៀត។
កាលពីខែមុន លោកត្រាំបាននិយាយថា អាមេរិកនឹងដកខ្លួនចេញពីសន្ធិសញ្ញានុយក្លេអ៊ែរចម្ងាយមធ្យម ដោយសារតែរុស្ស៊ីបានរំលោភលើសន្ធិសញ្ញានុយក្លេអ៊ែរ។
លោកពូទីនបាននិយាយកាលពីថ្ងៃអង្គារថា រុស្ស៊ីនឹងត្រូវបង្ខំឱ្យចាត់វិធានការបន្ថែម ដើម្បីពង្រឹងសន្តិសុខរបស់ខ្លួន ប្រសិនបើទីក្រុងវ៉ាស៊ីនតោនដកខ្លួនចេញពីសន្ធិសញ្ញា នុយក្លេអ៊ែរ។ អ្នកនាំពាក្យរបស់លោក គឺលោក Dmitry Peskov បាននិយាយកាលពីថ្ងៃសុក្រ ថា ប្រទេសរុស្ស៊ីនឹងត្រូវកំណត់គោលដៅទៅលើគ្រាប់មីស៊ីលអាមេរិក ដែលមានបំណងដាក់តម្លើងនៅអឺរ៉ុប។
សូមបញ្ជាក់ថា ចាប់តាំងពីភាពតានតឹងរវាងរុស្ស៊ី និងសហរដ្ឋអាមេរិកបានកើនឡើងកាន់តែខ្លាំងមក ជាពិសេសបន្ទាប់ពីអាមេរិកគម្រាមដកខ្លួនចេញពីសន្ធិសញ្ញានុយក្លេអ៊ែរមក រុស្ស៊ីបានគម្រាម និងបានទន្ទេញថា គ្មានអ្នកណារស់ទេ គ្មានអ្នកណាឈ្នះទេ នៅក្នុងសង្គ្រាមនុយក្លេអ៊ែរ ហើយថា រុស្ស៊ីនឹងឡើងឋានសួរ ព្រោះរុស្ស៊ីជាអ្នកត្រូវគេវាយ ដូច្នេះអ្នកឡើងឋានសួរគឺរុស្ស៊ី៕
Home ព្រឹត្តិការណ៍ថ្មីៗ ជាថ្មីម្តងទៀត រុស្ស៊ីព្រមានពីការផ្ទុះសង្គ្រាមនុយក្លេអ៊ែរជាមួយសហរដ្ឋអាមេរិក ដោយសារតែអសន្ទិដ្ឋិភាពធ្ងន់ធ្ងរ