ទោះបីជាមានឱកាសបានក្លាយតួឯកជាច្រើនរឿងក៏ដោយ ប៉ុន្ដែកញ្ញា ព្រះកាយ ច័ន្ទ បានសម្ដែងនូវក្ដីកង្វល់យ៉ាងខ្លាំង គ្រាដែលក្ដីកង្វល់នេះត្រូវបាននាងចាត់ទុកថា ជារឿងរសើបសម្រាប់ទស្សនិកជនទូទាំងប្រទេស ក្នុងឱកាសដែលនាងក្ដាប់បានតំណែងតួឯកស្រីនៅក្នុងរឿង«ពិសស្នេហ៍» ជាវណ្ណកម្មថ្មីមួយទៀតរបស់ស្ថានីយទូរទស្សន៍ប៉ុស្ដិ៍លេខ៥។
បន្ទាប់ពីបញ្ចប់ពិធីក្រុងពាលីរឿង«ពិសស្នេហ៍» កញ្ញា ព្រះកាយ ច័ន្ទ បានបង្ហាញពីទឹកមុខរីករាយលាយឡំនឹងក្ដីបារម្ភនៅពេលផ្ដល់បទសម្ភាសន៍ដល់បណ្ដាសារព័ត៌មានក្នុងស្រុកជាច្រើនថា នាងមានភាពសប្បាយរីករាយដោយសារតែអ្នកដឹកនាំរឿងនៅស្ថានីយទូរទស្សន៍ប៉ុស្ដិ៍លេខ៥ បានផ្ដល់ឱកាសឲ្យនាងសម្ដែងជាតួឯកស្រីតួឈ្មោះ រាជនីស្ងួន ដែលជាស្រី្ដរបាំនៅក្នុងរឿងនេះ។ អ្វីដែលធ្វើឲ្យនាងរំភើបនោះគឺនាងជាអតីតសិស្សរបាំនៅក្នុងសាលាវិចិត្រសិល្បៈដែលមានការហាត់រៀនបានយ៉ាងត្រឹមត្រូវជិត២០ឆ្នាំមកហើយ ប៉ុន្ដែពុំដែលបានយកទេពកោលសល្យនេះមកបង្ហាញទស្សនិកជនឡើយ។
កញ្ញា ព្រះកាយ ច័ន្ទ បញ្ជាក់ក្នុងរឿង«ពិសស្នេហ៍»នេះដូចជាការផ្ដល់ឱកាសសម្រាប់ខ្ញុំឲ្យបង្ហាញទេពកោសល្យរាំរបាំទៅកាន់អ្នកគាំទ្រនិងទស្សនិកជនរបស់ខ្ញុំដូច្នេះដែរ»។ ទោះយ៉ាងណានាងក៏បង្ហាញការ ព្រួយបារម្ភទៅលើសម្លៀកបំពាក់បុរាណ ពិសេសនោះគឺម្កុជ តែម្ដង។ ដោយនាងប្រាប់ទៀតថា ម្កុជរបស់នាងដែលត្រូវពាក់លើក្បាល ជាគំរូម្កុដស្ដ្រីរបាំ តាំងពី១០០ឆ្នាំមុនម្លេះ ជាស្ត្រីរបាំលាបមុខស។ ហើយម្កុដ នេះពុំសូវមានច្រើនទេ ហើយក៏ពិបាកស្វែងរកដែរ។ ប្រសិនបើធ្វើក៏ត្រូវប្រើពេលយូដែរ ម្កុដដែលនាងយកមកគ្រងលើក្បាលនេះគឺវាពុំទាន់ត្រូវក្បាល ឬត្រូវស្ដង់ដារនូវឡើយទេ។
ព្រះកាយ ច័ន្ទ បន្ដខុសស្ដង់ដានោះមិនមែនខុសក្បាច់បុរាណទេ រាល់ក្បាច់រចនាគឺត្រឹមត្រូវតាមទម្រង់បុរាណទាំងអស់ ខុសត្រង់ម្កុដនេះតូចជាក្បាលរបស់នាង ព្រោះគេត្រូវយកមកពាក់ឲ្យគ្របល់ថ្ងាស ប៉ុន្ដែ ម្កុដតូចជាងក្បាល ដូច្នេះពេលពាក់ទៅម្កុដ មិនបានគ្របដល់ថ្ងាសតាមស្ដង់ដារ។ ដូច្នេះហើយនាងបារម្ភថា នឹងអាចទទួលរងការរិះគន់ពីប្រិយមិត្ដ និងអ្នកដែលមានជំនាញខាងរបាំបុរាណ។ ទោះយ៉ាងណាព្រះកាយច័ន្ទ អះអាងថា នាងនឹងខិតខំស្វែងរកម្កុជនេះពីសំណាក់គ្រូ និងអ្នកអង្គម្ចាស់មួយរូបដែលមានម្កុដនេះនៅក្នុងដៃ។ ជាងនេះនាងនឹងយកឈុតសម្លៀកបំពាក់បុរាណ និងម្កុដនោះទៅរក្សាទុកដាក់នៅផ្ទះឲ្យបានល្អបំផុតរហូតដល់ថ្ងៃបញ្ចប់ការថត ព្រោះនាងជឿថាសំលៀកបំពាក់បុរាណបែបនេះមានការតំដមច្រើន មិនអាចទុកចោលផ្ដេសផ្ដាសឡើយ។
ពាក់ព័ន្ធនឹងការរាំរបាំវិញនោះត្រូវបាននាងអះអាងថា ទោះបីជានាងខានរាំរបាំបុរាណប្រហែល៧ឆ្នាំទៅហើយក្ដី ប៉ុន្ដែនាងគ្មានការបារម្ភទេ ព្រោះរាល់ក្បាច់មូលដ្ឋាននៃការរាំ និងទម្រង់នៃការរាំនាងចាំយ៉ាងច្បាស់ ពិសេសនោះមុនពេលថតចេញថតនាងបានព្យាយាមទៅហ្វឹកហាត់ជាមួយលោកគ្រួអ្នកគ្រូឡើងវិញដើម្បីធ្វើយ៉ាងណារំលឹកនូវទេពកោសល្យចាស់ឡើងវិញ។ កញ្ញាព្រះកាយ ច័ន្ទ បន្ថែមថា«រាល់ការសម្ដែងតែងមានការសរសើរនឹងរិះគន់យ៉ាងណាខ្ញុំសុំចិត្ដទស្សនិកជន និងបងប្អូនទាំងអស់ ប្រសិនបើការសម្ដែងរបស់ខ្ញុំមានការខ្វះខាតលើសលោះ សូមអភ័យទោសផង។ ក្នុងរឿងនេះខ្ញុំនឹងប្រឹងប្រែងសម្ដែង នឹងហ្វឹកហាត់រាល់ចំណុចណាមួយដែលខ្ញុំយល់ថា វាមិនទាន់គ្រប់គ្រាន់ដើម្បីបំពេញឲ្យបានល្អដើម្បីបម្រើអារម្មណ៍ពុកម៉ែបងប្អូន»៕
