ការប្រកួតប្រជែងនៅលើទីអវកាស ស្មើនឹងការប្រកួតប្រដាល់ទម្ងន់យក្សពិភពលោកដែរ។ ប្រទេសមហាអំណាចអវកាសទាំង២ សហរដ្ឋអាមេរិក និងអតីតសហភាពសូវៀត បានប្រឈមដាក់គ្នានៅលើវេទិការពិភពលោក ជាមួយនឹងការធ្វើដំណើរទៅកាន់ឋានព្រះចន្ទ័ និងដណ្តើមគ្នាគ្រប់គ្រងដែនអវកាស ហើយនៅពេលនោះដែរ អតីតសហភាពសូវៀត បានបញ្ជូនស្ត្រីលើកដំបូងគេទៅកាន់ទីអវកាស គឺនាង Valentina Tereshkova ដើម្បីជួយសម្រេចមហិច្ឆតាអវកាសរបស់របស់ខ្លួន។
នាង Valentina Tereshkova កើតនៅក្នុងភូមិដ៏តូចមួយឈ្មោះ Maslennikovo ស្ថិតនៅភាគកណ្តាលប្រទេសរុស្ស៊ី។ ឪពុកម្តាយរបស់នាង មានដើមកំណើតមកពីបេឡារូស ដោយបម្រើការងារជាតៃកុងត្រាក់ទ័រ និងជាកម្មកររោងចក្រ។
នាងបានចាប់ផ្តើមចូលរៀននៅវ័យ៦ឆ្នាំ និងបានឈប់ទៅវិញនៅអាយុ១៦ឆ្នាំ ដោយបញ្ចប់ការសិក្សាលើមុខវិជ្ជាឆ្លងឆ្លងព័ត៌មាន។ កាលនៅជាយុវតី នាងបានចាប់ផ្តើមធ្វើការនៅរោងចក្រផលិតសំបកកង់រថយន្ត ហើយបន្ទាប់មក បានចំណាយពេល៧ឆ្នាំ បម្រើការនៅរោងចក្រតម្បាញ។
ដោយគ្មានសញ្ញាប័ត្រផ្លូវការនោះ នាងបានចុះឈ្មោះរៀននៅកម្មវិធីបណ្តុះបណ្តាលបច្ចេកទេស ហើយនៅទីបញ្ចប់នាងក៏ទទួលបានសញ្ញាប័ត្រ។ អំឡុងពេលនោះ ឪពុករបស់នាង បានស្លាប់អំឡុងពេលធ្វើសង្គ្រាមឲ្យរុស្ស៊ី នៅក្នុងសង្គ្រាមលោកលើកទី២ ដែលការបាត់បង់នេះហើយ កាន់តែធ្វើឲ្យនាងឈឺចាប់ខ្លាំងថែមមួយកម្រិតទៀត។ ដោយមានក្តីស្រមៃចង់ក្លាយជាតារា នាងក៏ចង់ធ្វើអ្វីមួយបន្ថែមទៀត ដូចជាការផ្សងព្រេង ។ តាំងពីនាងនៅក្មេងមកម្ល៉េះ នាងចាប់អារម្មណ៍លើការលោតឆ័ត្រយោង ដូច្នេះហើយ នាងក៏បានចូលរួមជាមួយក្លិបអវកាសក្នុងស្រុក។
នៅទីនោះ នាងមានទម្លាប់មួយគឺលោតពីលើអាកាស។ ក្លិបបានផ្តល់វគ្គបណ្តុះបណ្តាពិសេសដែលនាងត្រូវការដើម្បីចូលរួមការប្រកួតលោតឆ័ត្រយោងលើកដំបូងរបស់នាង។ នៅថ្ងៃទី២១ ខែឧសភា ឆ្នាំ១៩៥៩ នៅវ័យ២២ឆ្នាំ នាង Tereshkova បានបញ្ចប់ការលោតពីលើអាកាសរបស់នាង។
នាងស្រលាញ់ការលោតពីលើអាកាសខ្លាំងណាស់ ហើយនៅរយៈពេល២ឆ្នាំបន្ទាប់ នាងបានលោតឆ័ត្រយោងជិត១០០លើកទៅហើយ ត្រឹមអាយុ២៤ឆ្នាំប៉ុណ្ណោះ។ ទោះបីជាយ៉ាងណាក៏ដោយ វាមិនទាន់គ្រប់គ្រាន់នោះទេ នាងមានបំណងប្រាថ្នាមួយទៀត ចូលរួមការងារជាមួយទីភ្នាក់ងារអវកាសរុស្ស៊ី។
ឱកាសទទួលបានការងារមួយនេះ មានតិចតួចខ្លាំងណាស់ ដោយសារតែនាងគ្មានការអប់រំ ឬចំណេះដឹងខាងអវកាស ប៉ុន្តែនាងក៏បានដាក់ពាក្យ ពេលដឹងថា ទីភ្នាក់ងារអវកាសរុស្ស៊ី ស្វែងរកស្ត្រីម្នាក់បញ្ជូនទៅកាន់ទីអវកាស។
ក្រោយការត្រៀមខ្លួនអស់រយៈពេលជាច្រើនខែ វាដល់ពេលដែលនាង Tereshkova បញ្ចប់បេសកកម្មរបស់នាង។ នៅថ្ងៃទី១៦ ខែមិថុនា ឆ្នាំ១៩៦៣ នាង Tereshkova បានឡើងលើជើងទម្រ Baikonur Cosmodromeបច្ចុប្បន្នស្ថិតនៅក្នុងប្រទេសកាហ្សាក់ស្ថាន ហើយបានចូលទៅក្នុងយានអវកាស Wostok 6 ដែលមាន១បន្ទប់សម្រាប់មនុស្សម្នាក់។
នាង Tereshkova បានចំណាយពេល៧០នាទីនៅទីអវកាស វិលតាមគន្លងផែនដី៤៩ជុំ និងបានមើលឃើញថ្ងៃរះ៤៧លើក។ នាងបានទាក់ទងមកកាន់យានអវកាសរុស្ស៊ីមួយគ្រឿងផ្សេងទៀតផងដែរ គឺយាន Wostok 5 តាមវិទ្យុទាក់ទង ហើយវាបានក្លាយជាការទំនាក់ទំនងនៅលើទីអវកាសលើកដំបូងគេ មិនធ្លាប់ដែលធ្វើឡើងកាលពីមុន។
នៅវ័យ២៦ឆ្នាំ នាង Tereshkova មិនត្រឹមតែក្លាយជាស្ត្រីលើកដំបូងគេទៅដល់ទីអវកាសប៉ុណ្ណោះទេ ប៉ុន្តែនាងបានក្លាយជាអវកាសយានិកវ័យក្មេងជាងគេបំផុត ត្រូវបានបញ្ជូនទៅទីអវកាសផងដែរ៕
Home ព្រឹត្តិការណ៍ថ្មីៗ មកស្គាល់ស្ត្រីលើកដំបូងគេដែលទីភ្នាក់ងារអវកាសរុស្ស៊ី បានបញ្ជូនទៅកាន់ទីអវកាស